04 ޑިސެމްބަރ 2016 - 08:32
އެކުވެރިންތަކަކާ އެކު ޕާޓީކުރަމުން މާގިނައިން ރާ ބުއިމުގެ ސަބަބުން ހާޓް އެޓޭކެއް ޖެހިގެން މަރުވި ކަމަށް ނިންމައި މޯޗަރީގެ ފްރިޖްގައި ބާއްވާފައި އޮތް މީހަކު ހޭއަރައިގެން ތެދުވެއްޖެ އެވެ.
އަދި ހޭލެވުމާއެކު ތެދުވެގެން ގެއަށް ދިއުމުގެ ބަދަލުގައި އެ މީހާ އަނެއްކާ ވެސް އެނބުރި ދިޔައީ އެކުވެރިން ކައިރިއަށް ކުރިން ވެސް ރާބޯން އިން ތަނަށެވެ.
ޕޮލެންޑްގެ ނޫސްތަކުގައިވާ މި ޚަބަރުގައި ބުނެފައިވާ ގޮތުގައި އެ ގައުމުގެ އުތުރު ދެކުނުގައި އޮންނަ ރޯޓްސްލާފްގެ ކުޑަކުޑަ އަވަށެއް ކަމަށްވާ ކެމީނާ ގޯރާގައި ހުންނަ ރާބޯތަނެއްގައި އިނދެ 25 އަހަރުގެ ކާމިލް ނަމަކަށްކިޔާ މި މީހާ މާގިނައިން ރާބުއިމުގެ ސަބަބުން ހިތް ހުއްޓި މަރުވީކަމަށް އެ ރަށު ހޮސްޕިޓަލުން ނިންމީ އެވެ. އެހެންވެ އޭނާގެ ޖަނާޒާގެ ކަންތައް ނިމެންދެން އޭނާ އޮތީ ހޮސްޕިޓަލުގެ މޯޗަރީގައި ހުންނަ ފްރިޖްގައި ބާއްވާފަ އެވެ.
މި މީހާ ރާބޯން އިންދާ އުނދަގޫތަކެއް ވާތީ އެތަނުން ނުކުތްތަނާ ވެއްޓުނީ އެވެ. އެތާ ތިބި މީހުން އޭނާ ނޭވާ ލައްވަން ކުރި މަސައްކަތް ނާކާމިޔާބުވުމުން އެމްބިއުލާންސަށް ގުޅައިގެން ގެނަ އެވެ. އަދި އެމްބިއުލަންސްގައި ތިބި ޕެރަ-މެޑިކްސް އިން ވެސް މި މީހާ ނޭވާ ލައްވަން ވަރަށް މަސައްކަތްކުރި އެވެ. އަދި ހޮސްޕިޓަލަށް ގެންގޮސް ޑޮކްޓަރުން އެމީހާ ބަލާފައި އޭނާ މަރުވެފައިވާ ކަމަށް ނިންމައި ހޮސްޕިޓަލުގައި ހުންނަ މޯޗަރީއަށް ލީ އެވެ.
މޯޗަރީގައި ހުރި ފްރިޖްގައި އޮއްވާ މި މީހާ ހޭއަރައިގެން ފްރީޒަރުގެ ދޮރުގައި ތަޅާ އަޑުފައްގަނޑު އިވުމުން އެތާގައި ހުރި ގާޑް އައިސް ފްރިޖް ހުޅުވިއިރު އޭގެ ތެރޭގައި ބަރަހަނާކޮށް އޮތް މީހަކު ބްލެންކެޓެއް ދޭށޭ ގާޑު މީހާ ކައިރީ ބުނި ކަމަށް މީޑިއާ ރިޕޯޓުގައި ބުނެ އެވެ.
ވަގުތުން ފުލުހުންނަށް ގުޅައިގެން ގެނެސް އެމީހާގެ މެޑިކަލް ޗެކްއަޕް ހަދައި މޯގުން ދޫކޮށްލުމުން އެ މީހާ އަވަހަށް ރައްޓެހިން ކައިރިއަށް އަނެއްކާ ވެސް ރާބޯން ދިޔައީ ކަމަށް ވެއެވެ.
މިދިޔަ އަހަރު ރަޝިޔާގައި ވެސް ހަމަ މިފަދަ ހާދިސާއެއް ހިނގާފައި ވެއެވެ. އެ މީހާ ވެސް މާގިނައިން ރާބޮއިގެން ޚަބަރު ހުސްވުމުން ހޭއެރިއިރު އޮތީ ގަބުރުތައް ބަހައްޓާ ފިނިކުރި ފްރިޖެއްގެ ތެރޭގަ އެވެ. ފްރިޖްތެރޭގައި އޮވެ މާ ބޮޑަށް ފިނިވެގެން މި މީހާ ވެސް ފްރިޖްގެ ދޮރުގައި ތަޅާ އަޑުފައްގަނޑަށް އެތާ ހުރި ގާޑް އައިސް ދޮރު ހުޅުވުމުން އެމީހާ ދުވެ ފިލީ ކަމަށް ވެއެވެ.
ޕޮލެންޑްގެ އަންހެނެއް ކަމަށްވާ ޖެނީނާ ކޮލްކީވިޗް، 91، ވެސް 2014 ގައި މިފަދަ ގޮތަކަށް މަރުވީކަމަށް ނިންމައި ފްރިޖެއްގެ ތެރޭގައި ބޭއްވި އެވެ. މި މީހާ ހޭއެރީ އޭގެ ތެރޭގައި އޮންނަތާ 11 ގަޑިއިރު ފަހުންނެވެ.