27 ސެޕްޓެމްބަރ 2021 - 10:18
ރާއްޖޭގައި އުޅޭ ބިދޭސީ މަސައްކަތްތެރިންގެ ހައްގުތައް ރައްކާތެރިކުރުމުގައި "މިޝަން ފޯ މައިގްރަންޓް ވޯކާސް" އަށް އެހީވުމަށް އުރީދޫން އެ ޖަމިއްޔާގެ ޑިޖިޓަލް ޕާޓަރުގެ ގޮތުގައި ސޮއިކޮށްފި އެވެ.
މި އެއްބަސްވުމުގައި އުރީދޫން ސޮއިކުރީ އެ ކުންފުނީގެ އިޖުތިމާއީ ޒިންމާގެ ދަށުންނެވެ.
އުރީދޫގެ ޗީފް ކޮމާޝަލް އޮފިސަރު ހުސައިން ނިޔާޒު ވިދާޅުވީ މިޝަން ފޯ މައިގްރަންޓް ވޯކާސް އިން ކުރަމުން އަންނަ މަސައްކަތަކީ މުހިންމު މަސައްކަތެއް ކަމަށެވެ. އެހެންވެ މި އެއްބަސްވުމާ އެކު ކުރިއަށް އޮތްތަނުގައި އެ ޖަމިއްޔާއާ އެކު ތަފާތު ޕްރޮޖެކްޓުތައް ކުރިއަށްގެންދާނެ ކަމަށް އޭނާ ވިދާޅުވި އެވެ.
"ރާއްޖޭގައި މަސައްކަތްކުރާ ބިދޭސިންގެ ހައްގުތަކަށް މި ކުރެވޭ މަސައްކަތުގައި ބައިވެރިވެ ޑިޖިޓަލް ޕާޓްނަރުގެ ގޮތުގައި އުރީދޫގެ ފުރިހަމަ އެއްބާރުލުން ލިބޭނެ. ކުރިއަށް އޮތްތަނުގައި މިޖަމިއްޔާއާ އެކު ފައިދާ ހުރި މުހިންމު ޕްރޮޖެކްޓްތަކާ އެކު ބިދޭސީންގެ ދިރިއުޅުން އިތުރަށް ފާގަތި ކުރުމީ އަޅުގަނޑުމެންގެ އުއްމީދު،" ނިޔާޒު ވިދާޅުވި އެވެ.
މިޝަން ފޯ މައިގްރަންޓް ވޯކާސްގެ ފައުންޑަ އަދި ރައީސް ޑރ. މިނާހް ފާއިޒު ރަޝާދު ވިދާޅުވީ އުރީދޫއާ އެކު ވެވުނު އެއްބަސްވުމާއެކު އެ ޖަމިއްޔާއިން ކުރަމުން އަންނަ މަސައްކަތްތައް ފުޅާވެ ގިނަ ބަޔަކަށް ހިދުމަތް ފޯރުކޮށްދެވޭނެ ކަމަށެވެ.
އުރީދޫ އިން ވަނީ މިދިޔަ ރޯދަ މަހު މިޝަން ފޯ މައިގްރަންޓް ވޯކާސްއާ އެކު ބިދޭސީންނަށް މީލް ޕެކް ވެސް ފޯރުކޮށްދީފަ އެވެ. އެގޮތުން ރޯދަ މަހުގެ ކޮންމެ ހުކުރު ދުވަހަކު 100 މީލް ޕެކް ވަނީ ފޯރުކޮށްދީފަ އެވެ.