28 ސެޕްޓެމްބަރ 2021 - 06:52
ދެ މީހެއްގެ ގުޅުމެއް ވަރުގަދަ ކަމަށް ދައްކަނީ ދެ މީހުން ގިނަ ދުވަހު އެކުގައި އުޅުމުން ކަމަށް ގިނަ މީހުން ގަބޫލުކުރެ އެވެ. ނަމަވެސް މިހެން ގިނަ ދުވަހު އުޅޭ މީހުންގެ ވެސް ހުރިހާ ކަމެއް ބޮއްސުންލައިގެން ގޮސްފައި ހުންނަނީ ވަރަށް ގިނައިންނެވެ.
މިއީ "ސައިކޮލޮޖީ ޓުޑޭ" ގައި އެކަމާ ބެހޭ ގޮތުން ލިޔެފައިވާ ލިޔުމެއްގެ ހުލާސާ ތަރުޖަމާއެކެވެ.
ދެމީހެއްގެ ގުޅުން ދެމެހެއްޓުމަށް އެކަކު އަނެކަކު ވާ ގުރުބާނީގެ ވާހަކަ ވަރަށް އާންމުކޮށް ދެކެވެ އެވެ. އަދި ގުޅުން ރަނގަޅުކުރަން ބޭނުން ވަނީ ނަމަ ބައިވެރިޔާ އެދޭ ހުރިހާ ކަމެއް ކުރަންޖެހޭނެ ކަމަށް ވެސް ދެކެ އެވެ. ނަމަވެސް ގުޅުން ރަނގަޅު ކުރުމަށޭ ކިޔާފައި ތިމާގެ ހުރިހާ އެއްޗެއް ގުރުބާން ކުރުން އެއީ ގުޅުން އިތުރަށް ރަނގަޅުވާނެ ކަމެއް ނޫނެވެ. ތިމާގެ ހުރިހާ އެއްޗެއް އަނެކާ އަށް ގުރުބާން ކުރާކަން ނުޖެހޭނެ އެވެ. ވަކިން ހާއްސަކޮށް ދެ މީހެއްގެ ގުޅުމެއްގައި އެކަކު އެ ހުރިހާ ގުރުބާނީއެއްވެ ހުރިހާ ކޮމްޕްރޮމައިޒް އެއް އެކަކު ކުރަން ޖެހުމަކީ ގުޅުން އިތުރަށް ހީނަރުވާނެ ކަމެކެވެ.
"އަހަރެން ދެކެ ލޯބިވާ ނަމަ، ތިގޮތް ދޫކޮށްލާ" ށޭ ނުވަތަ އެވެނި ކަމެއް ކުރާށޭ ބުނުމަކީ ވަރަށް އާންމުކޮށް ބައިވެރިންގެ މެދުގައި އޮންނަ ކަމެކެވެ. ޝަރުތު ކަނޑައެޅުމަށް ފަހު ކަންކަން ރަނގަޅު ކުރަން ބުނެގެން ގިނަ ފަހަރަށް އެކަމާ ހިތާމަކުރަންޖެހެ އެވެ. މައްސަލަތައް އިތުރުވާން ފަށަނީ ބައިވެރިޔާ ބަދަލުވާން މަޖުބޫރުކުރާ ހިސާބުންނެވެ.
"އަހަރެމެން ދެމީހުންނަކީ އެކައްޗެއްކޭ" ބުނާ ބުނުން ކިތަންމެ ލޯބި ކަމުގައި ވިޔަސް އެއީ ކާމިޔާބު ރަނގަޅު ގުޅުމަކަށް މުހިއްމު ކަމެއް ނޫނެވެ. ބައިވެރިޔާއާ އޮންނަ ގުޅުން ގާތްވުން އެއީ މައްސަލައެއް ނޫނެވެ. ވަރަށް ޕޮޒިޓިވް ނިޝާނެކެވެ. ނަމަވެސް އަމިއްލަ މީހާ އަށް ވެސް ކޮންމެވެސް ވަރެއްގެ ވަގުތުކޮޅެއް ހުސްކޮށްލަން ޖެހެ އެވެ. އަދި ރައްޓެހިންނާ އެކު ވަގުތު ހޭދަކޮށްލުމާއި އަމިއްލައަށް ގަޔާވާ ބައެއް ކަންކަން ކޮށްލުން ކޮންމެހެން ވެސް މުހިންމެވެ.
ބައިވެރިޔާއާ އެކު ކުރާ ހުރިހާ ކަމެއް ކުރާ ނަމަ ބައިވެރިޔާ މަތިން ހަނދާންވާނެ އެއްވެސް ވަގުތެއް ނާންނާނެ އެވެ. އެކަކު އަނެކަކު މަތިން ހަނދާން ކުރުމަށް ޖާގަ ދޭ ނަމަ ގުޅުން އިތުރަށް ވަރުގަދަ ވާނެ އެވެ. ގިނަ ދިރާސާތަކުން ވެސް ބުނަނީ ކައިރީގައި އުޅޭ ބައިވެރިންނަށް ވުރެ ލޯންގް ޑިސްޓަންޓް ރިލޭޝަންގައި އުޅޭ ބައިވެރިންގެ ގުޅުން ވަރުގަދަ ކަމަށެވެ.
ގިނަ މީހުން ގަބޫލުކުރަނީ ދެމީހުންގެ ދޭތެރޭ މައްސަލަ ނުޖެހި އުޅޭ ނަމަ އެއީ ކާމިޔާބު ގުޅުމެއް ކަމަށެވެ. ނޫނެކެވެ. ދެމީހުން އެކުގައި އުޅޭ ނަމަ މައްސަލަތައް ޖެހޭނެ އެވެ. ގިނަ މައްސަލަތައް ޖެހުމަކީ މައްސަލައެއް ކަމަށް ދެކޭ މީހުންނަކީ ގިނަ ފަހަރަށް އެ މީހުންގެ ދިރިއުޅުމުގައި ވެސް އުފަލެއް ނުލިބި އުޅޭ މީހުންނެވެ. އެމީހުން އަބަދުވެސް ބަލާނީ މައްސަލައެއް ކުރިމަތި ވިއަސް އެކަން ހައްލު ކުރުމުގެ ބަދަލުގައި ފަސް އަޅާ ފޮރުވާށެވެ.
ކުދިކުދި މައްސަލަ ޖެހިގެން އެކަން ހައްލު ކުރުމުން، އެފަދަ މައްސަލައެއް ބޮޑުވަރުވެގެން ދިއުމުގެ މަގު ބަންދުވެ އެވެ. ވަގުތީ ހައްލު ހޯދުމަށް ވުރެ ކުރިމަގަށް ވިސްނާފައި ދާއިމީ ހައްލު ހޯދާ އެ ވަގުތަކު އެކަމެއް ނިންމާލުމުން ފަހުން ދެމީހުން ދެމެދުގައި ޖެހޭނެ މައްސަލައެއް ނޯންނާނެ އެވެ.