20 ސެޕްޓެމްބަރ 2021 - 11:18
ވެލެންސިއާ (ސެޕްޓެމްބަރު 20) - މެޗުގެ ފަހު ފަސް މިނެޓްތެރޭ ދެ ލަނޑު ޖަހައި 2-1 އިން ވެލެންސިއާ ބަލިކޮށް ލަ ލީގާގެ ތާވަލުގެ އެއްވަނަ މަގާމަށް ރެއާލް މެޑްރިޑް ޖަހިލައިފި އެވެ.
ވެލެންސިއާގެ މެސްޓެލާ ސްޓޭޑިއަމްގައި ކުޅުނު މެޗުގައި ފުރަތަމަ ލީޑު ނެގީ އެ ޓީމުންނެވެ. މެޗުގެ 66 ވަނަ މިނެޓްގައި ވެލެންސިއާ އަށް ލަނޑު ޖަހައިދިނީ ހޫގޯ ޑޫރޯ އެވެ. މެޗުގެ 85 މިނިޓް ކުޅުނު އިރު ވެސް ރެއާލް އަށް ލަނޑެއް ނުޖެހެ އެވެ.
ޕްރެޝަރުގައި ކުޅެމުން ދިޔަ ރެއާލަށް ހިތްހަމަ ޖެހުމެއް ލިބުނީ 86 ވަނަ މިނެޓްގައި ކަރީމް ބެންޒެމާ ތަނަވަސް ކޮށްދިން ފުރުސަތަކުން ވިނީޝިއަސް ޖޫނިއާ ނަތީޖާ ހަމަހަމަ ކޮށްދިނުމުންނެވެ. ބެންޒޭމާ ލީޑު ނަގައިދިނީ އޭގެ އެއް މިނެޓް ފަހުންނެވެ. އޭނާ ލަނޑު ޖެހީ ވިނީޝިއަސް ތަނަވަސްކޮށްދިން ފުރުސަތަކުންނެވެ.
މެޗަށް ފަހު ރެއާލްގެ ކޯޗު ކާލޯ އަންޗެލޮޓީ ބުނީ ފޯވަޑުންގެ ގޮތުގައި ބެންޒެމާ އާއި ވިނީޝިއަސް އެ ޓީމުގައި ތިބުމަކީ ލިބުނު ނަސީބެއް ކަމަށެވެ. ކޮންމެ ހާލަތެއްގައި ވެސް ފަހަތުން އަރައި ނަތީޖާ ބަދަލު ކުރުމުގެ ހިތްވަރު ރެއާލްގެ ޓީމަށް ހޯދޭކަން މެޗުން އެނގިގެން ދިޔަ ކަމަށް އޭނާ ބުންޏެވެ.
ފުރަތަަމަ ހާފުގައި ވެލެންސިއާގެ މުހިންމު ދެ ކުޅުންތެރިން ކަމަށްވާ ކާލޯސް ސޯލާ އާއި ތއަރީ ކޮރިއާ އަށް އަނިޔާ ވެގެން ބަދަލު ކުރަން ޖެހުނެވެ. ރެއާލްގެ ޑެނީ ކާވަހާލް އަށް ވެސް ފުރަތަމަ ހާފުގައި އަނިޔާ ވެގެން ބަދަލު ކުރަން ޖެހުނެވެ.
މެޗުން މޮޅުވެ ރެއާލް އެއް ވަނައިގައި އޮތީ 13 ޕޮއިންޓް ހޯދައިގެންނެވެ. އެންމެ ފަހުގެ ޗެމްޕިއަން އެތުލެޓިކޯ މެޑްރިޑް އޮތީ 11 ޕޮއިންޓާ އެކު ތާވަލުގެ ދެ ވަނައިގަ އެވެ.