13 ސެޕްޓެމްބަރ 2021 - 21:32
ރައީސް އިބްރާހިމް މުހައްމަދު ސޯލިހާ އެކު ހަދާފައި ވަނީ ފަސް އަހަރުގެ އެއްބަސްވުމެއް ކަމަށާއި ނަމަވެސް ކުރިޔަށް އޮތް ރިޔާސީ އިންތިހާބުގައި ވާދަކުރެއްވުމާ މެދު އަދި ގޮތެއް ނުނިންމަވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.
ޖޭޕީން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ގާސިމް ވިދާޅުވީ 2023 ވަނަ އަހަރުގެ ރިޔާސީ އިންތިހާބުގައި ވާދަކުރުމުގެ ޝައުގުވެރިކަން ހުރިތޯ ނުވަތަ ނޫންތޯ ނިންމަން އަދި އަވަސް ކަމަށެވެ.
އެކަން ކުރަން ޖެހޭ ނަމަ ޖޭޕީގެ ކައުންސިލުން ފާސް ކުރައްވާނެ ކަމަށާއި ފާސް ކުރައްވާ ގޮތަކަށް އެކަން ކުރިޔަށް ދާނެ ކަމަށް ގާސިމް ވިދާޅުވި އެވެ.
"ސިޔާސީ ކަންކަމަކީ މިއަދު ހެދުނު އެއްގޮތަކަށް އޮވެފައި ހަވީރު އެހެން ގޮތަކަށް ބަދަލުވާ ކަންކަން،" ރިޔާސީ ޓިކެޓާ ގުޅޭ ގޮތުން އަދި ގޮތެއް ނުނިންމޭ ސަބަބު ގާސިމް ވިދާޅުވި އެވެ.
ރައީސް އިބްރާހިމް މުހައްމަދު ސޯލިހު އިންތިހާބަށް ނުކުންނަވައިފި ނަމަ ތާއީދު ކުރައްވާނެތޯ ސުވާލު ކުރުމުން ވެސް ގާސިމް ވިދާޅުވީ އެކަން ނިންމަން ޖެހޭނީ ކައުންސިލުން ކަމަށެވެ.
ނަމަވެސް ގުޅިފައިވާ ޕާޓީތަކުން ހަދާފައިވާ އެއްބަސްވުމުގައި އޮންނާނީ ފަސް އަހަރުގެ ދައުރަކަށް ތާއީދު ކުރުމަށް ކަމަށާއި އެ އެއްބަސްވުމަށް ސަރުކާރުން ކަމޭހިތިޔަސް ނުވަތަ ކަމޭ ނުހިތި ނަމަވެސް ޖޭޕީން އޮތީ ހެޔޮ ހިތުން ސަރުކާރަށް ތާއީދުކޮށްގެން ކަމަށް ގާސިމް ވިދާޅުވި އެވެ.
މީގެ ކުރިން 2008 ގައި އަދި 2013 ވަނަ އަހަރުގެއިންތިހާބުގައި ވެސް ޖުމްހޫރީ ޕާޓީގެ ފަރާތުން ގާސިމް ރިޔާސީ އިންތިހާބަށް ވާދަކުރެއްވި އެވެ. ނަމަވެސް 2018 ވަނަ އަހަރުގެ ރިޔާސީ އިންތިހާބުގެ ކަންކަން ކުރިޔަށް ދިޔައިރު ގާސިމް ހުންނެވީ ޖަލު ހުކުމެއްގަ އެވެ. ޖަލަށް ހުކުމް ކުރި ނަމަވެސް ބޭސް ފަރުވާ އަށް ރާއްޖޭން ބޭރަށް ވަޑައިގެންނެވި ގޮތަށް އެނބުރި ވަޑައިގެންނެވީ އާ ސަރުކާރު އިންތިޚާބުވި ފަހުންނެވެ.