30 ނޮވެމްބަރ 2016 - 14:01
މާލޭގައި ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި މަސްތުވާ އެއްޗެހިތަކެއް އަތުލައިގަނެ ދެ ފުލުހަކާއި ސިފައިންގެ މީހަކާއި އާންމުންގެ މީހަކު ރޭ ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލަކު ވިދާޅުވި ގޮތުގައި މާލޭގައި ހިންގި އޮޕަރޭޝަންގައި ހަތަރު މީހަކު ހައްޔަރުކޮށްފައިވާ އިރު، އޭގެ ތެރޭގައި ދެ ފުލުހުންނާ ސިފައިންގެ މީހަކު ހިމެނެ އެވެ. އަދި އާންމުންގެ އެކަކު ވެސް ހައްޔަރުކޮށްފައިވާ ކަމަށް އޭނާ ވިދާޅުވި އެވެ.
ނަމަވެސް މި މީހުން ހައްޔަރު ކުރީ ކޮން ތަނަކުން ކަމެއް އަދި އެ މީހުންގެ އުމުރެއް ހާމައެއް ނުކުރެ އެވެ.
"މި ވަގުތަށް ހާމަ ކުރެވެން އޮތީ މަސްތުވާތަކެތީގެ އޮޕަރޭޝަނެއްގައި ހަތަރު މީހަކު ހައްޔަރު ކުރިކަން، އެ މީހުންގެ މައްސަލަ މި ދަނީ އިތުރަށް ތަހުގީގު ކުރަމުން،" އޮފިޝަލް ވިދާޅުވި އެވެ.
މި އޮޕަރޭޝަން ހިންގިއިރު، ދެ ފުލުހުންނާއި ސިފައިންގެ މީހާއާ މަސްތުވާތަކެއްޗާ ހުރި ގުޅުމެއް ފުލުހުން ނުބުނެ އެވެ. އަދި ފުލުހުން އަތުލައިގަތީ ކިހާ އަދަދެއްގެ މަސްތުވާތަކެއްޗެއް ކަމެއް ވެސް ނުބުނެ އެވެ.