02 ސެޕްޓެމްބަރ 2021 - 15:13
ކުރިއަށް އޮތް ދެތިން މަސް ތެރޭގައި، އަފްގާނިސްތާނުގެ ރައްޔިތުން ހައިހޫނުކަމުގެ މައްސަލަތަކާ ކުރިމަތިލާން ޖެހިދާނެ ކަމަށް، އދ. އިން އިއްޔެ އިންޒާރުކޮށްފި އެވެ.
އަފްގާނިސްތާނުގައި ހުންނަ އދ.ގެ ހިއުމަނިޓޭރިއަން ކޯޑިނޭޓަރު ރާމިޒް އަލަކްބަރޯވް ވިދާޅުވި ގޮތުގައި މިހާރުގެ ހާލަތަށް ރަނގަޅު ބަދަލެއް ނުގެނެވިއްޖެ ނަމަ، ކުރިއަށް އޮތް ދެތިން ހަތަރު މަހެއްހާ ދުވަހުގެ ތެރޭގައި އަފްގާނިސްތާނުން ކާބޯތަކެއްޗާއި ކާނާގެ ބާވަތްތައް ވަރަށް ބޮޑަށް މަދުވެގެންދާނެ އެވެ. އޭގެ ސަބަބުން އަފްގާނިސްތާނުގެ ކޮންމެ ތިން މީހަކުން އެކަކަށް ހައިހޫނުކަން ކުރިމަތިވާނެ އެވެ.
އޭނާ ވިދާޅުވި ގޮތުގައި އަފްގާނިސްތާނުގެ ދެބައިކުޅަ އެއްބަޔަށް ވުރެ ގިނަ ކުޑަކުދިން މިހާރު ވެސް ތިބީ، ދުވަހުގެ އެއް އިރުގެ ކޮއްތު ކައިފިއްޔާ އެ ދުވަހުގެ ދެ ވަނަ ކޮއްތެއް ލިބޭނެ ގޮތެއް ނެތިފަ އެވެ.
އެމެރިކާ އާއި ނޭޓޯ ސިފައިން ފައިބައިގެން ގޮސް، އޮގަސްޓް 15، 2021 ގައި ތާލިބާނުން އަފްގާނިސްތާނު ހިފި އިރު، ގައުމުގެ އިގްތިސާދު އޮތީ ވަރަށް ބޮޑަށް ދަށަށް ގޮސްފަ އެވެ. ގައުމުގެ އިގްތިސާދު ހަރުދަނާ ކުރުމަށް، މިދިޔަ އަހަރުތަކުގައި މާބޮޑު މަސައްކަތެއް ކުރެވިފައި ނެތުމުގެ އިތުރުން، ދާހިލީ ހަނގުރާމައެއްގެ ތެރޭގައި އޮންނަތާ 20 އަހަރުވުމުން، އެ ގައުމުގައި އިންވެސްޓް ކުރާނެ ބަޔަކު ވެސް ނެތެވެ.
އަލްޖަޒީރާ އިން ބުނާ ގޮތުގައި ތާލިބާނުން އަފްގާނިސްތާނު ހިފުމާ ގުޅިގެން، ސަރުކާރުގެ އޮފީސްތަކާއި އަމިއްލަ ކުންފުނިތަކާއި ވިޔަފާރިތަކާއި ހޮޓާތައް، ދެ ހަފުތާއެއްހާ ދުވަސް ވަންދެން ބަންދުކުރުމުގެ ސަބަބުން، ކާބޯތަކެތީގެ އަގު ވަނީ ވަރަށް ބޮޑަށް އުފުލިފަ އެވެ. ކާބޮތަކެތީގެ އަގު 50 ޕަސެންޓް ބޮޑުވެފައިވާ އިރު، ޕެޓްރޯލްގެ އަގު ވަނީ 75 ޕަސެންޓް ބޮޑުވެފަ އެވެ.
އެހެން ގައުމުތަކުންނާއި ބައިނަލްއަގުވާމީ އެހީދޭ ޖަމާއަތްތަކާއި ޖަމްއިއްޔާތަކުން އަފްގާނިސްތާނަށް އެހީތެރިކަން ފޯރުކޮށްދިނުން ހުއްޓާލާފައިވާތީ، ގައުމުގެ އިގްތިސާދު ވަނީ ވަރަށް ބޮޑަށް އަޑިއަޅާލައިފަ އެވެ. މީގެ އިތުރުން ސަރުކާރު އޮފީސްތައް އަދިވެސް ރަސްމީކޮށް ހިނގައިނުގަންނާތީ، ސަރުކާރުގެ މުވައްޒަފުންނަށް މުސާރަ ނުލިބޭތާ ވެސް ދުވަސްތަކެއް ވެއްޖެ އެވެ.
ގައުމު ހިފުމަށް ފަހު ދެ ހަފުތާ ވެގެން ދިޔައިރު ވެސް، ތާލިބާނުންނަށް ސަރުކާރެއް ނުއުފެއްދެ އެވެ. ތާލިބާނުން އުފައްދާ ސަރުކާރެއް، ބައިނަލްއަގުވާމީ މުޖްތަމައުން ބަލައިގަންނާނެ ކަމާ މެދު ސުވާލު އުފެދިފައިވާތީ، ބައިނަލްއަގުވާމީ އެހީތައް އަލުން ލިބެން ފަށާނެ ދުވަހެއް ވެސް ނޭނގެ އެވެ.
އެމެރިކާ އާއި ނޭޓޯ ސިފައިން އަފްގާނިސްތާނުން ފައިބައިގެން ދިޔުމާއި، އަފްގާނިސްތާނުގައި އޮތް ސަރުކާރު ވެއްޓި ތާލިބާނުންނަށް ގައުމު ލިބުމުގެ އުފާ ފާޅުކުރުމުގެ ގޮތުން، ދެ ވަނަ އަށް އެންމެ ބޮޑު ސަހަރު ކަމުގައިވާ ކަންދަހާރުގައި، ތާލިބާނުން އިއްޔެ ވަނީ އަސްކަރީ ޕެރޭޑެއް ބާއްވައިފަ އެވެ.
މި ޕެރޭޑްގައި ތާލިބާންގެ ހަނގުރާމަވެރިން ބޭނުންކުރީ، މިދިޔަ ތިން މަހެއްހާ ދުވަހުގެ ތެރޭގައި ކުރި ހަނގުރާމައިގައި، ސަރުކާރު ސިފައިންގެ އަތުން ޣަނީމާކުރި އަސްކަރީ އުޅަނދުތަކާއި ހަތިޔާރުތަކެވެ. އޭގެ ތެރޭގައި، އެމެރިކާ ސިފައިންގެ އެންމެ މަޝްހޫރު އެއް ވައިގެ އުޅަނދު ކަމަށްވާ ބްލެކް ހޯކް ހެލިކޮޕްޓަރެއް ވެސް ހިމެނެ އެވެ. އެހެލިކޮޕްޓަރަކީ، ތާލިބާންގެ ހަނގުރާމަވެރިންނާ ދެކޮޅަށް، އަފްގާނިސްތާނު ސަރުކާރު ސިފައިން ބޭނުންކުރުމަށް، އެމެރިކާ އިން ދީފައި އޮތް އުޅަނދެކެވެ.