02 ސެޕްޓެމްބަރ 2021 - 10:06
ރާއްޖޭގެ ފުޓްބޯޅަ ކުރިއަރުވައި ތަރައްގީ ކުރުމަށް ސައުދީ އަރަބިއާގެ ފުޓްބޯޅަ ފެޑްރޭޝަނުން އެހީވާން، ރާއްޖެ އާއި ސައުދީއާ ދެމެދު އެއްބަސްވުމުގައި ސޮއިކޮށްފި އެވެ.
އެފްއޭއެމްގެ ރައީސް ބައްސާމް އަދީލް ޖަލީލް އާއި ޖެނެރަލް ސެކްރެޓަރީ ހުސައިން ޖަވާޒު މިހާރު ހުންނެވީ ސައުދީގަ އެވެ. ސައުދީ ފުޓްބޯޅަ ފެޑްރޭޝަންގެ އޮފީހުގައި އިއްޔެ ބޭއްވި ރަސްމިއްޔާތުގައި ސައުދީގެ ފަރާތުން އެއްބަސްވުމުގައި ސޮއިކުރެއްވީ، އެ ގައުމުގެ ފުޓްބޯޅަ ފެޑްރޭޝަންގެ ރައީސް ޔާސިރު ބިން ހަސަން އަލް މިޝާލް އެވެ. ރާއްޖޭގެ ފަރާތުން ސޮއި ކުރެއްވީ ބައްސާމް އެވެ.
އެއްބަސްވުމުގައި ސޮއިކުރުމުގެ ކުރިން ބައްސާމް އާއި ހަސަން އަލް މިޝާލް ވަނީ ދެ ގައުމުގެ ފުޓްބޯޅަ ފެޑްރޭޝަން ގުޅިގެން ކުރިއަށް ދެވޭނެ ދާއިރާތަކާ ބެހޭގޮތުން މަޝްވަރާ ކުރައްވައިފަ އެވެ. އަދި ދެ ގައުމުން އެކުގައި ހޯދިދާނެ ކުރިއެރުންތަކާ ބެހޭގޮތުން ވެސް ވަނީ މަޝްވާރާ ކުރައްވައިފަ އެވެ.
"ސައުދީ އަރަބިއާގެ ފުޓްބޯޅަ ފެޑްރޭޝަންގެ ފަރާތުން ރާއްޖޭގެ ފުޓްބޯޅަ ކުރިއެރުވުމަށް އެހީ ވެދެވެން ހުރި ދާއިރާތަކާ ބެހޭގޮތުން މަޝްވަރާ ކުރެވުނެވެ.،" ސައުދީ ފުޓްބޯޅަ ފެޑްރޭޝަނުން ނެރުނު ބަޔާނުގައި ވެއެވެ.
އިއްޔެ ހެދި އެއްބަސްވުމަކީ ރާއްޖެ އާއި ސައުދީ އަރަބިއާ ދެމެދު ވެވުނު ދެ ވަނަ އެއްބަސްވުމެވެ. މިދިޔަ އަހަރު ޖެނުއަރީ މަހު ވެސް ރާއްޖެ އާއި ސައުދީއާ ދެމެދު އެއްބަސްވުމެއް ގާއިމުކުރި އެވެ. އޭގެ ދަށުން ރާއްޖޭގެ ކްލަބުތަކަށާއި ގައުމީ ޓީމުތަކަށް ސައުދީގައި ޓްރޭނިން ކޭމްޕް ހަމަޖެހިގެން ދިޔަ އެވެ.
މިދިޔަ އަހަރު ރާއްޖޭގެ ޓީސީ އާއި މާޒިޔާ އިން ވެސް ވަނީ އޭއެފްސީ ކަޕަށް ތައްޔާރު ވުމުގެ ގޮތުން ސައުދީގެ ޖިއްދާގައި ޓްރޭނިން ކޭމްޕްތައް ކުރިއަށް ގެންގޮސްފަ އެވެ. މި އަހަރު އޭއެފްސީ ކަޕަށް ތައްޔާރު ވާން ވެސް މާޒިޔާ އިން ވެސް ވަނީ ސައުދީގައި ކޭމްޕް ކޮށްފަ އެވެ. އޭރު އެއްބަސްވުން ހެދުމުގެ ކުރިން ވެސް ސައުދީ އާއި ރާއްޖެއާ ދެމެދު ރަނގަޅު ގުޅުމެއް އޮތެވެ. ރާއްޖޭގެ އުމުރުފުރާގެ ގައުމީ ޓީމާއި ސީނިއާ ޓީމު ވެސް ވަނީ 2019 ގައި ސައުދީގައި ކޭމްޕް ކޮށްފަ އެވެ.
ސައުދީ އަރަބިއާ އިން 2018 ގައި އިސްވެ އުފެއްދި ދެކުނު އަދި ހުޅަނގު އޭޝިއާގެ ފުޓްބޯލް ފެޑްރޭޝަން (ސްވާފް) ގައި ވެސް ރާއްޖެއިން ބައިވެރިވި އެވެ. އަދި ސްވާފްގެ ސީނިއާ ނައިބު ރައީސްގެ މަގާމަށް އޮލިމްޕިކް ކޮމިޓީގެ ކުރީގެ ރައީސް މުހައްމަދު ޝަވީދު ވެސް އިންތިހާބުކުރި އެވެ.
ސްވާފްގެ މަސައްކަތްތައް ނުފެށެނީސް އެ ފެޑްރޭޝަންގެ މެންބަރު ކަމުން ދެކުނު އޭޝިއާގެ ބައެއް ގައުމުތައް ވަކިވި އެވެ. ރާއްޖެ ފިޔަވައި ދެކުނު އޭޝިއާ އިން ބައިވެރިވި އަނެއް ހަ ގައުމުން ވެސް ސްވާފުން ވަކިވި އެވެ. ފަހުން އޭއެފްސީން ވެސް ވަނީ ސްވާފް އުފެއްދުމަށް ތާއީދު ނުކުރާ ކަމަށް ބުނެފަ އެވެ. ސްވާފްގެ ހަރަކާތް އޭގެ ފަހުން ހުއްޓާލީ އެވެ.