30 އޯގަސްޓް 2021 - 06:17
މީގެ 12 އަހަރު ކުރިން ތ. ގުރައިދޫ ޕޮލިސް ސްޓޭޝަނަށް ގެއްލުން ދިން މައްސަލައެއްގައި ދައުވާ ލިބުނު މީހަކު އެއް މަހާއި ހަ ދުވަހަށް ޖަލަށް ލާން މިދިޔަ ހޯމަ ދުވަހު ކްރިމިނަލް ކޯޓުން ހުކުމް ކޮށްފި އެވެ.
އޮކްޓޯބަރު 12، 2009 ގައި ގާބުރިއަކުން ޖަހައި، ގުރައިދޫ ޕޮލިސް ސްޓޭޝަނުގެ ފޭންލައިޓް ބިއްލޫރިގަނޑެއް ތަޅާލި މައްސަލައިގައި އެ ރަށު ތިބުރޯޒުގެ މުހައްމަދު ސަމާހް، 31،ގެ މައްޗަށް ދައުލަތުން ކުރީ އަމުރަށް ނުކިޔަމަންތެރިވުމުގެ ދައުވާ އެވެ.
އެ މައްސަލައިގައި އޭނާގެ މައްޗަށް ކުރީގެ ގާނޫނުލްއުގޫބާތުގެ ދަށުން ދައުވާކުރީ، ކުށް ކުރިތާ ނުވަ އަހަރު ފަހުން ޖެނުއަރީ، 2018ގަ އެވެ.
އެ މައްސަލައިގައި އިބްތިދާއީ މަރުހަލާގައި ސަމާހު ވަނީ ކުށަށް އިއުތިރާފުވެފަ އެވެ. އެހެންވެ އޭނާގެ މައްސަލަ ނިންމީ އަވަސް ނިޔާގެ މައްސަލައެއްގެ ގޮތުގަ އެވެ.
އެ ކުށަށް ކުރީގެ ގާނޫނުލްއުގޫބާތުގެ ދަށުން ކަނޑައަޅާފައިވާ އަދަބަކީ ގިނަވެގެން ހަ މަސް ދުވަހަށް ޖަލަށްލުން، އަރުވާލުން، ގޭގައި ބަންދު ކުރުން، ނުވަތަ 150ރ. އަށް ވުރެ ގިނަ ނޫން އަދަދަކުން ޖޫރިމަނާ ކުރުމެވެ.
ނަމަވެސް، އޭނާގެ މައްޗަށް ލުއި އަދަބެއް އައީ ދައުވާކުރި އިރު އަމަލުކުރަމުން ދިޔަ ގާނޫނުލްއުގޫބާތުގައި އޮތް އަދަބަށް ވުރެ މިހާރު އޮތް އަދަބު ލުއިވާތީ، ލުއި އަދަބެއް ކަނޑައަޅަން ދައުލަތުންނާއި އޭނާ ވެސް އެދިފައި ވާތީ އެވެ.
މިހާރުގެ ގާނޫނުލްއުގޫބާތުގެ ދަށުން ބަލާ ނަމަ އޭނާ ކުރި ކުށަކީ މުދަލަށް ގެއްލުން ދިނުމެވެ. ޖުނަހުގެ ތިން ވަނަ ދަރަޖައިގެ އެ ކުށުގެ އަދަބަކީ އެއް މަހާއި ހަ ދުވަހުގެ މުއްދަތަށް ޖަލަށް ލުމެވެ.
އޭނާ ދައުވާއަށް އިއުތިރާފުވުމުން އަދަބު އެއް ދަރަޖަ ލުއިވި ނަމަވެސް، އޭނާ ގެއްލުން ދިނީ ދައުލަތުގެ މުދަލަކަށް ކަމުން ކުށުގެ ދަރަޖަ އެއް ދަރަޖައަށް މަތިވެ އިއުތިރާފުވުމުން ލިބޭ ލުއި ގެއްލުނީ އެވެ. އެހެންވެ، މި މައްސަލަ ބެއްލެވި ގާޒީ އަލީ އާދަމް މި މަހުގެ 23 ވަނަ ދުވަހު ހުކުމް ކުރެއްވީ އެއް މަހާއި ހަ ދުވަހަށް ޖަލަށް ލުމަށެވެ.