25 އޯގަސްޓް 2021 - 10:53
އޭއެފްސީ ކަޕުގައި މާޒިޔާ އަށް ނެރުނު ދަށް ނަތީޖާ އިން ގައުމީ ޓީމަށް އަސަރު ނުކުރާނެ ކަމަށް އެ ޓީމުގެ ކޯޗު ރިސްޓޯ ވިޑަކޮވިޗް ބުނެފި އެވެ.
އޭއެފްސީ ކަޕުގެ ގުރޫޕް ސްޓޭޖު މާޒިޔާ އިން ނިންމާލީ، ޕޮއިންޓެއް ވެސް ނުހޯދި އެވެ. ތިން މެޗުން ބައިކޮޅަށް 11 ލަނޑު ވަން އިރު އެ ޓީމަށް ޖެހުނީ ތިން ގޯލެވެ. ގާތްގަނޑަކަށް އެއް މަހަށް ފަހު ސާފް ޗެމްޕިއަންޝިޕާ ރާއްޖެ އިން ކުރިމަތިލާނެ އެވެ.
އެ މުބާރާތަށް އެކުލަވާލި ގައުމީ ޓީމުގެ ޕްރިލިމިނަރީ ސްކޮޑުގައި މާޒިޔާގެ 11 ކުޅުންތެރިން ވަނީ ހިމަނައިފަ އެވެ. އޭއެފްސީ ކަޕަށް މާޒިޔާ ތައްޔާރުވާން ޖެހުނު ގޮތުން ހައި ލެވެލް ތިން މެޗު ކުޅެން ކުޅުންތެރިންނަށް އުނދަގޫވިކަން ރިސްޓޯ ބުންޏެވެ.
މި ކަހަލަ ހާލަތެއްގެ ތެރެއިން މިހާ ކައިރިކައިރީގައި ހައި ލެވަލް ތިން މެޗުގައި އެއްވަރެއްގައި އެންމެ މަތީ ފެންވަރުގައި ޕާފޯމް ނުކުރެވޭނެ،" ރިސްޓޯ ބުންޏެވެ. "މިއަދު އެކަން ވަރަށް ސާފުކޮށް އެނގިގެން ހިނގައްޖެ. އެ ލެވަލްގައި ވާދަކުރަން އަހަރެމެން ގިނަ ކަންކަމެއް ރަނގަޅު ކުރަން ޖެހޭ."
އެެހެންވިޔަސް ސާފް ޗެމްޕިއަންޝިޕުގައި ރާއްޖޭގެ ގައުމީ ޓީމަށް އޭގެ އަސަރު ނުކުރާނެ ކަމަށް ރިސްޓޯ ބުންޏެވެ.
"އަހަންނަކަށް ހަމަ ހިއެއް ނުވޭ ގައުމީ ޓީމަށް އަސަރު ކުރާނެހެނެއް،" ތަކުރާރުކޮށް ރިސްޓޯ ބުންޏެވެ. "މާޒިޔާގެ ކުޅުންތެރިން މިހާރު އަރާމު ކުރަން ވަގުތު ނަގާނެ. ތައްޔާރުވާން ވަރަށް ގިނަ ވަގުތު އެބައޮތް. އެމީހުން ތިބޭނީ ތައްޔާރަށް ހެން ހީވަނީ. އެއީ މުޅިން ތަފާތު މުބާރާތެއް. އަހަންނަކަށް ނޭނގެ އެ މީހުން ކުޅޭނެ ގޮތެއް. ރިކަވާ ވާން ގިނަ ވަގުތު ލިބޭނެ. އެއީ މުޅިން ތަފާތު މުބާރާތެއް. ރިކަވާވާން އެކަށީގެންވާ ވަގުތު ނެތި އަހަރެމެން މި ކުޅެނީ ކޮންމެ ދެ ދުވަހަކުން މެޗެއް."
ސާފް ޗެމްޕިއަންޝިޕުގައި ރާއްޖެ ކުޅޭ ފުރަތަމަ މެޗުގައި އޮކްޓޯބަރު 1 ގައި ވާދަކުރާނީ ނޭޕާލާ ދެކޮޅަށެވެ. ރާއްޖޭގެ ދެ ވަނަ މެޗު އޮންނާނީ އޭގެ ހަ ދުވަސް ފަހުން އޮކްޓޯބަރު 7 ގަ އެވެ. އެ ދުވަހު ރާއްޖެ އިން ނުކުންނާނީ ބަންގަލަދޭޝްއާ ދެކޮޅަށެވެ. ރާއްޖޭގެ ތިން ވަނަ މެޗުގައި އޮކްޓޯބަރު 10 ގައި ނުކުންނާނީ ލަންކާއާ ދެކޮޅަށެވެ. އޭގެ ދެ ދުވަސް ފަހު އޮކްޓޯބަރު 12 ގައި ރާއްޖެ ނުކުންނާނީ އިންޑިއާ ދެކޮޅަށެވެ.
ކުރިން އޮކްޓޯބަރު 13 ގައި ނިންމަން އޮތް މުބާރާތް މިހާރު ނިމޭނީ އޮކްޓޯބަރު 16 ގަ އެވެ. މުބާރާތުގައި ފަސް ޓީމު ވާދަކުރާތީ ގުރޫޕް ސްޓޭޖު ކުރިއަށް ގެންދާނީ ލީގު އުސޫލުންނެވެ. އެންމެ ގިނަ ޕޮއިންޓް ހޯދާ ދެ ޓީމު ފައިނަލުގައި ވާދަކުރާނެ އެވެ.
ރިސްޓޯ ބުނީ ކުޅުންތެރިން ވަރުބަލިވެފައި ތިބުމުންނާއި ފިޒިކަލީ އެންމެ ރަނގަޅު ހާލަތުގައި ނެތުމުން ރޭ ބެންގަލޫރާ ދެކޮޅަށް ފުރަތަމަ 11 ނަގަން ވެސް އުނދަގޫ ކުރިމަތިވި ކަމަށެވެ. ސްޕޯޓްސް މިނިސްޓަރު އަހްމަދު މަހްލޫފް މެއި މަހު ވިދާޅުވެފައި ވަނީ މާޒިޔާ އިން މި އަހަރަށް އަށް މިލިއަން ރުފިޔާ ހަރަދު ކުރާނެ ކަމަށެވެ. މާޒިޔާގެ މެނޭޖްމަންޓުން އެވަރަށް ހަރަދު ކުރިއިރު ވެސް ރިސްޓޯ އަށް ކާމިޔާބު ހޯދައި ނުދެވުނެވެ.
ރިސްޓޯ ބުނީ މިއީ ބަޖެޓަކުން ކުރެވޭ ކަމެއް ނޫން ކަމަށެވެ. އޭނާ ބުނީ މުބާރާތަށް ތައްޔާރުވާން މާޒިޔާ އަށް ޖެހުނު ހާލަތުގެ ގޮތުންނާއި ފުޓްބޯޅައިގެ ހަރަކާތްތައް މެދުކަނޑާލައިގެން ތިން މަސް ދުވަހު އޮންނަން ޖެހުމުން އުނދަގޫތައް ހުރި ކަމަށެވެ.
"ހަތަރު ޓީމުގެ ތެރެއިން އަނެއް ތިން ޓީމަކީ ބޮޑު ބަޖެޓެއް އޮތް ޓީމުތައް. އަހަރެމެން ޓީމަކީ އެންމެ ކުޑަ ބަޖެޓް އޮތް ޓީމު،" ރިސްޓޯ ބުންޏެވެ. "މިއީ ބަޖެޓަކުން ކުރެވޭ ކަމެއް ނޫން. އަހަރެން މި ވާހަކަ ދައްކަނީ މުބާރާތަށް ތައްޔާރުވުމާއި އަހަރެމެން މުބާރާތަށް އަންނަން ޖެހުނު ގޮތް."
ރިސްޓޯ ބުނީ މި ލެވަލްގައި ޕާފޯމް ކުރަން އަނެއް ތިން ޓީމަށް ފަރިތަ ވަނީ އެ ގައުމުތަކުގެ ލޯކަލް ލީގުގައި ވެސް ހައި އިންޓެންސިޓީގެ މެޗުތަކެއް ކޮންމެ ހަފްތާއަކު ކުޅެން ލިބޭތީ ކަމަށެވެ.
"އެ ޓީމުތައް ލޯކަލް ލީގުގައި ކޮންމެ ހަފުތާއަކު ވާދަކުރަނީ ވަރުގަދަ ޓީމުތަކާ. އެހެންވީމަ އެ މީހުންގެ ފެންވަރު މަތިވާނެ. އެވަރުގެ މެޗުތަކެއް ކުޅެން އަހަރެމެންނަށް ފުރުސަތު މި ލިބެނީ އޭއެފްސީ ކަޕުގައި."
މާޒިޔާ އިން ރިސްޓޯއާ އެކު އެއްބަސްވުން ހެދީ މި ސީޒަނަށެވެ. އޭނާ އަށް އާ ކޮންޓްރެކްޓެއް ހައްގުތޯ ސުވާލު ކުރުމުން ރިސްޓޯ ބުނީ ކޮންޓްރެކްޓާ ބެހޭގޮތުން އެއްވެސް ވާހަކައެއް އޭނާ ދައްކާފައި ނުވާނެ ކަމަށެވެ. އަދި އެކަން ނިންމާނީ މެނޭޖްމެންޓުން ކަމަށް ބުންޏެވެ.