24 އޯގަސްޓް 2021 - 21:54
ރެފްރީގެ ނިންމުމާމެދު ހިތްހަމަ ނުޖެހުނަސް، އެކަމާ ބެހޭގޮތުން ވާހަކަ ދައްކަން، ބަށުންދަރާ ކިންގްސްގެ ކޯޗް އޮސްކާ ބުރުޒޯން ބަރޭރަސް ދެކޮޅު ހަދައިފި އެވެ.
އޭއެފްސީ ކަޕު ބަށުންދަރާ ކިންގްސް ކުޅުނު ފަހު މެޗުގައި، މިއަދު އިންޑިއާގެ އޭޓީކޭ މޯހަން ބަގާން އަތުން 1-1 އިން އެއްވަރުވީ ދެ ވަނަ ހާފުގައި އެއް ކުޅުންތެރިޔަކު މަދުކޮށް ކުޅެމުން ދަނިކޮށެވެ.
ފުރަތަމަ ހާފުގެ އެންމެ ފަހު މިނެޓްގައި ބަށުންދަރާގެ ޝުޝާންޓޯ ޓުރިޕޫރާ އަށް ރަތް ކާޑު ދައްކައި ދަނޑުން ފޮނުވާލީ މޯހަން ބަގާންގެ ޝުބަޝިސް ބޯސް އަށް ކުރި ޗެލެންޖުގަ އެވެ. ޝުޝާންޓޯގެ ފަހަތުގައި ހުރ ޝުބަޝިސް ވަނީ ޝުޝާންޓޯގެ ކޮނޑުމައްޗަށް ވެއްޓިގެންފަ އެވެ. އެ ވަގުތު ޝުޝާންޓޯ ވެސް ތިރިވުމުން ދެ ކުޅުންތެރިން އެއްކޮށް ދަނޑު މައްޗަށް ވެއްޓުނެވެ. ވީޑިއޯއިން ފެންނަ ގޮތުގައި ޝުބަޝިސް ވެސް ޝުޗާންޓޯ އަށް ޗާޖު ކުރި އެވެ. ކުރިން ރީނދޫ ކާޑެއް ދައްކާފައިވާ ޝުޝާންޓޯ އަށް މެޗުގެ ރެފްރީ އޮމާންގެ ގާސިމް މަތާރިލް ހާތަމީ ދެއްކީ ރަތް ކާޑެކެވެ.
"ރެފްރީންނާ ބެހޭގޮތުން އަހަރެން ވާހަކަ ދައްކައިފިނަމަ މަދު ވެގެން 35 މެޗުގެ ސަސްޕެންޝަނެއް އަހަންނަށް އަންނާނެ،" ޝުބަޝިސް އާއި ޝުޗާންޓޯގެ ޗެލެންޖް އާ ބެހޭގޮތުން ސުވާލު ކުރުމުން އޮސްކާ ބުންޏެވެ. "ސަލާމަތުގެ އައްސޭރީގައި އަހަރެން ހުރުމަށްޓަކައި ރެފްރީއާ ބެހޭގޮތުން އަހަރެން ވާހަކައެއް ނުދައްކާނަން. އަހަންނަށް ހީވަނީ އަހަރެމެންގެ ކްލަބުން އެކަމަށް މަސއްކަތް ކުރާނެހެން. މިއަދު ވެސް މިވީ ބެންގަލޫރު މެޗުގައި އަހަރެމެންނަށް ދިމާވިގޮތަށް."
އޭނާ ބުނީ އެއް ކުޅުންތެރިޔަކު މަދުކޮށް ކުޅެން ޖެހުމުން ޓީމަށް ވަރަށް ބޮޑު އަސަރެއް ކުރާނެ ކަމަށެވެ. ނަމަވެސް އެއް ކުޅުންތެރިޔަކު މަދުކޮށް ކުޅެން ޖެހުނު އިރުވެސް އޭނާގެ ކުޅުންތެރިން ދެ ވަނަ ހާފުގައި ދެއްކި ކުޅުން ފެނިފައި ހައިރާންވި ކަމަށް ސްޕެއިންނަށް ނިސްބަތްވާ ކޯޗު ބުންޏެވެ.
"އެއް ކުޅުންތެރޔަކު މަދުކޮށް ކުޅެން ޖެހުނު އިރުވެސް އަހަރެންގެ ކުޅުންތެރިން ދެއްކި ކުޅުމުން އެ ކުޅުންތެރިން އަހަރެން ހައިރާން ކޮށްލައިފި،" އޮސްކާ ބުންޏެވެ. "މުޅި މެޗުގައި ވެސް އޯޕަން ފުރުސަތުގެ ގޮތުގައި މޯހަން ބަގާން އަށް ލިބުނީ ލަނޑު ޖަހަން ލިބުނު ފުރުސަތު އެކަނި. އިތުރު ފުރުސަތެއް ލިބުނު ހަނދާނެއް އަހަންނެއް ނުވޭ. އެ ޓީމަށް ތައުރީފް ހައްގު."
މޯހަން ބަގާންގެ ކޯޗް، އެންޓޯނިއޯ ލޯޕޭޒް ހާބަސް ބުނީ، ބަށުންދަރާ ކިންގްސް އިން މެޗު ކުޅުނީ ކުޅޭވެނެ އެންމެ ފިޒިކަލްކޮށް ކަމަށެވެ. އެހެންވެ ރަތް ކާޑެއް ފެނުމުގެ ފުރުސަތު އޮތް ކަމަށް އޭނާ އަށް ގަބޫލު ކުރެވުނު ކަމަށް ހާބަސް ބުންނެވެ.
"އަހަންނަށް އެނގޭ އިދިކޮޅު ޓީމުން ފިޒިކަލް ގޭމެއް ކުޅޭނެކަން. އެކަމަކު ވެސް އަހަރެމެންގެ ކުޅުންތެރިން ޓެކްޓިކަލް ޑިިސިޕްލިން ހިފަހައްޓައިގެން މެޗުގައި ކުޅުނީ،" ހާބަސް ބުންޏެވެ.
މެޗުން ހޯދި ޕޮއިންޓާ އެކު ހަތް ޕޮއިންޓް ހޯދައިގެން މޯހަން ބަގާން ވަނީ އިންޓަ ޒޯން ސެމީ ފައިނަލް ބުރަށް ދަތުރު ކޮށްފަ އެވެ. އެ ބުރުގައި އެ ޓީމާ ވާދަކުރާނީ ސެންޓްރަލް އޭޝިއާ ޒޯން ފައިނަލް މެޗު ކާމިޔާބު ކުރާ ޓީމެކެވެ.