23 އޯގަސްޓް 2021 - 15:25
އެމްޑަބްލިއުއެސްސީއިން ކުރިއަށްގެންދާ ރޯޑްޝޯގައި ބައިވެރިވެގެން ބައިސްކަލެއް ހޯދުމުގެ ފުރުސަތު ހުޅުވާލައިފި އެވެ.
ފެން ބިލްޑިން ކުރިމަތީގައި މިއަދާއި މާދަމާ ކުރިއަށްގެންދާ މި ރޯޑްޝޯ އަކީ އެމްޑަބްލިއުއެސްސީން ދޭ ހިދުމަތްތަކާ ބެހޭ މައުލޫމާތު ދީ، ކަސްޓަމަރުންގެ ސުވާލުތަކަށް ޖަވާބު ދިނުމަށް ބާއްވާ ހަރަކާތެކެވެ. މި ހަރަކާތުގައި ބައިވެރިވާ މީހުންގެ ތެރެއިން ގުރުއަތުން ހޮވޭ މީހަކަށް "މިއުރާ ޑުއޯމެކްސް ޕީ3100" ބައިސްކަލެއް ލިބޭނެ އެވެ.
ބައިސްކަލު ހޯދަން ބޭނުންވާ މީީހުންނަށް ރޯޑްޝޯގައި ބައިވެރިވެ އެތަނުން ކުރާ ސުވާލަކަށް ޖަވާބު ދިނުމުން ބައިވެރިވެވޭނެ ކަމަށް އެމްޑަބްލިއުއެސްސީން ބުންޏެވެ. މި ސުވާލުތަކަކީ އެ ކުންފުނިން ދޭ ހިދުމަތްތަކާ ގުޅުން ހުރި ސުވާލުތަކެވެ.
ބައިސްކަލުގެ އިތުރުން ވެސް މި ރޯޑްޝޯގައި ބައިވެރިވާ މީހުންނަށް ތަފާތު އިނާމުތައް ލިބޭނެ އެވެ. އެގޮތުން، އެމްޑަބްލިއުއެސްސީ އިންސްޓަގްރާމް ޕޭޖު ފޮލޯކުރުމަށް ފަހު ރޯޑްޝޯގައި ބައިވެރިވާ ފޮޓޯއެއް ހިއްސާ ކޮށްގެން އަދި އެ ކުންފުނީގެ ވައިބާ ކޮމިއުނިޓީއާ ގުޅިގެން ގިފްޓް ޕެކާއި ކަޕްކޭކް ލިބޭނެ އެވެ.
މި ރޯޑް ޝޯ ކުރިއަށްދާނީ މިއަދާއި މާދަމާ ހެނދުނު 9:00 އިން މެންދުރު 3:00 އަށެވެ.