17 އޯގަސްޓް 2021 - 10:57
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ އޮފީހަށް ގެއްލުންދީ، އެ ތަނުން ވައްކަން ކުރަނީ އިދިކޮޅު ފަރާތްތަކުން ރާވައިގެން ކަމަށް، އެ ކުންފުނީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ރޭ ތުހުމަތުކުރައްވައިފި އެވެ.
މަގުތައް ހެދުމަށް މި ސަރުކާރުން އުފައްދާފައިވާ ކުންފުނީގެ އޮފީހުން މި އަހަރުގެ ތެރޭގައި ތިން ފަހަރަށް ވައްކަންކޮށްފައި ވެ އެވެ. އެކަމާ ގުޅިގެން، އާރުޑީސީ އަށް އާއްމުންގެ ބޮޑެތި ފާޑުކިޔުން އަމާޒުވެފައި ވެ އެވެ.
އެ ފާޑުކިޔުންތަކަށް ރައްދު ދެއްވައި މޫކޭ ކުރެއްވި ޓްވީޓެއްގައި ވިދާޅުވީ، އާރުޑީސީގެ އޮފީހަށް ގެއްލުންދީ ވައްކަން ކުރަން މަސައްކަތް ކުރަނީ ކުށުގެ ރެކޯޑު އޮންނަ މީހުން ބޭނުން ކޮށްގެން، އިދިކޮޅު ފަރާތްތަކުން ކަމަށް ތުހުމަތު ކުރެވޭ ކަމަށެވެ.
"މި ކޮންމެ ފަހަރަކު ހައްޔަރު ކުރެވޭ މީހުންގެ ތެރޭގައި އާރުޑީސީގެ އެއްވެސް މުވައްޒަފަކު ހިމެނިފައި ނުވޭ. އާރުޑީސީގައި ވަގުން ނޫޅޭނެ،" ޓްވީޓުގައި އެމްޑީ ވިދާޅުވި އެވެ.
އެ ތުހުމަތުތަށް އިދިކޮޅު ޕީޕީއެމް/ޕީއެންސީ ކޯލިޝަންގެ ތަރުޖަމާނު ހީނާ ވަލީދު ވިދާޅުވީ އެއީ އެއްވެސް އިރަކު ހުޅުޖަހައި، ރައްޔިތުންގެ މުދަލަށް ގެއްލުންދޭ ބައެއް ނޫން ކަމަށެވެ. އިދިކޮޅު ކޯލިޝަނުން އެ ކަމަށް ހިތްވަރުދީ، ތާއިދެއް ވެސް ނުކުރާނެ ކަމަށް ހީނާ ވިދާޅުވި އެވެ.
"އެފަދަ ކަންކަން ހިންގުމުގެ ތާރީހު އޮތީ މި ސަރުކާރުގައި ތިއްބެވި ބޭފުޅުންގެ. އެކަން ފެބްރުއަރީ 8 ގައި ރާއްޖޭގެ ހުރިހާ ދިމާލަކުން ފެނިގެންދިޔަ،" އޭނާ ވިދާޅުވި އެވެ.
އާރުޑީސީގެ ހެޑް އޮފީހުން އެންމެ ފަހުން ވައްކަން ކޮށްފައި ވަނީ މިދިޔަ އާދިއްތަ ދުވަހުގެ ރޭގަ އެވެ. އާއްމުވެފައިވާ ސީސީޓީވީ ފުޓޭޖުން ފެންނަ ގޮތުގައި ފިރިހެނަކު އެ އޮފީހުގެ ފުރާޅުމަތިން އަރައި، ސީލިންގުގައި ފައި އަޅުވައިގެން އެތެރެއަށް ވަންނަން މަސައްކަތް ކުރެ އެވެ. އަދި ވަންނަން އުޅުމުގެ ތެރެއިން ސީލިންގުގެ ބޮޑު ބައެއް ފަޅައިގެން ގޮސް ބިންމައްޗަށް ވެއްޓެ އެވެ.
އޭގެ އިރުކޮޅެއް ފަހުން މޫނު ނިވާކޮށް، ވަރަށް މަޑުމަޑުން އޭނާ އޮފީސް ތެރެއަށް ފައިބާ މަންޒަރު ފެނެ އެވެ.
މޯލްޑިވްސް ޝިޕިން ލިމިޓެޑުގެ އިމާރާތުގައި ހިންގާ އާރުޑީސީގެ އޮފީހަށް މިދިޔަ އޭޕްރީލް މަހު ވެސް ބަޔަކު ވަދެ 100،000ރ. ވަގަށް ނެގި އެވެ. އޭގެ ހަފުތާއެއް ފަހުން އަނެއްކާ ވެސް އެ އޮފީސް ފަޅާލައި 3،000ރ. ވަގަށް ނަގާފައި ވެ އެވެ.