15 އޯގަސްޓް 2021 - 18:06
ކުޑަކުދިން ކުށުގެ ވެއްޓަށް ހުށަހެޅިފައިވާ މިންވަރު ދެނެގަތުމަށް ހަދާ "ރިސްކް އެސެސްމަންޓް" އަށް، ކޭސް ވޯކަރުން އިތުރަށް އަހުލުވެރިކުރުމުގެ ގޮތުން ޑިޕާޓްމަންޓް އޮފް ޖުވެނައިލް ޖަސްޓިސް އިން ތަމްރީނު ޕްރޮގުރާމެއް މިއަދު ފަށައިފި އެވެ.
ހޯމް މިނިސްޓްރީގެ ދަށުން ހިންގަމުން އަންނަ އެ ޑިޕާޓްމަންޓާއި އދ. ގެ ޑްރަގްސް އެންޑް ކްރައިމް އޮފީސް (ޔޫއެންއޯޑީސީ) އާ ގުޅިގެން ފެށި މި ތަމްރީނު ޕްރޮގްރާމް ފައްޓަވައިދެއްވީ ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރެވެ.
ރިކްސް އެސެސްމަންޓަކީ ކުށުގެ ވެއްޓަށް ހުށަހެޅިފައިވާ ނުވަތަ ހުށަހެޅުމުގެ ފުރުސަތު އޮތްކަން ފާހަގަކުރެވިގެން ޑިޕާޓްމަންޓް އޮފް ޖުވެނައިލް ޖަސްޓިސް އަށް މައްސަލަ ހުށަހެޅުމުން ކުއްޖާގެ ހާލަތު ދެނެގަތުމަށް ހަދާ އެސެސްމަންޓެކެވެ.
ހޯމް މިނިސްޓްރީން ބުނީ މި ތަމްރީނު ޕްރޮގްރާމުގެ މަގުސަދަކީ ކުޑަކުދިންގެ އަދުލުގެ ގާނޫނަށް އަމަލުކުރަން ފެށުމާ އެކު, ޑިޕާޓްމަންޓް އޮފް ޖުވެނައިލް ޖަސްޓިސްގެ މަސައްކަތްތައް ހަރުދަނާކުރުމަށް ކުރަމުން އަންނަ މަސައްކަތްތަކުގެ ތެރެއިން ޔޫއެންއޯޑީސީއާ ގުޅިގެން އެ ޑިޕާޓްމަންޓްގެ ޓެކްނިކަލް މުވައްޒަފުން ތަމްރީނުކުރުމެވެ.
މި ތަމްރީނު ޕްރޮގްރާމްގައި ކިޔަވައިދެއްވަނީ ވެސް ޔޫއެންއޯޑިސީގެ ތަޖުރިބާކާރު ބޭފުޅުންނެވެ.
"ދެ ދުވަހުގެ މުއްދަތަށް ކުރިއަށްގެންދާ މި ތަމްރީނު ޕްރޮގްރާމްގެ ބޭނުމަކީ ކުދިންގެ ރައްކާތެރިކަމާއި, މަސްލަހަތަށް އިސްކަންދީގެން އެސެސްމަންޓް ފުރިހަމަކޮށް ކުދިންނަށް އެހީތެރިކަން ފޯރުކޮށްދިނުމުގެ ހުނަރުތައް އިތުރަށް ތަރައްގީކުރުން،" ހޯމް މިނިސްޓްރީން ބުންޏެވެ.
ނޮވެމްބަރު 20، 2019 ގައި ރައީސް އިބްރާހިމް މުހައްމަދު ސޯލިހު ތަސްދީގުކުރެއްވި ކުޑަކުދިންގެ އަދުލުގެ ގާނޫނުގެ މަގުސަދުތަކުގެ ތެރޭގައި، ބޮޑެތި މީހުންގެ މައްޗަށް ހިންގާ ޖިނާއީ އަދުލުގެ ނިޒާމުގެ ތެރެއަށް ކުޑަކުދިން ވަނުމުގެ ސަބަބުން ކުއްޖާ އަށް ކުރާ ނޭދެވޭ އަސަރުތަކުން ދުރުހެލިކުރުވުމާއި ކުއްޖާ ކުރާ ގާނޫނާ ހިލާފު އަމަލުތަކުގެ ސަބަބުން ކުރިމަތިވާ ގެއްލުމަށް އެ ކުއްޖާ ޖަވާބުދާރީވާން ބާރުއެޅުން ހިމެނެ އެވެ.
މި ގާނޫނު ބުނާ ގޮތުން ކުށުގެ ޒިންމާ އުފުލަން ޖެހޭ އުމުރަކީ 15 އަހަރެވެ. އަދި މި ގާނޫނުގެ ދަށުން، ގާނޫނާ ހިލާފުވާ ކުޑަ ކުއްޖަކާ މެދު ފިޔަވަޅު އަޅާއިރު އެ ކުއްޖަކު ހައްޔަރުކުރަންވާނީ އެންމެ ފަހު ފިޔަވަޅެއްގެ ގޮތުންނެވެ.