15 އޯގަސްޓް 2021 - 12:43
މާލޭގެ މޭޔަރު ޑރ. މުހައްމަދު މުއިއްޒު އުޅުއްވަނީ ހައުސިން މިނިސްޓަރުގެ މަގާމުގައި ހުންނެވި ދުވަސްވަރު އަމަލު ކުރެއްވި ގޮތަށް ހަމައެއްލަމައެއް ނެތި މާލޭގައި ކަންކަން ކުރައްވަން ކަމަށާއި ހެޑްލައިން ހައްދަވައިގެން ރައްޔިތުންނަށް އޮޅުވައިލައްވަން ކަމަށް ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު ވިދާޅުވެއްޖެ އެވެ.
މާލޭގެ އެކި އަވަށްތަކުގެ މީހުންނާ ބައްދަލުކުރައްވައި، ސިޓީ ކައުންސިލުން ކޮށްދޭނެ ކަމަށް ވިދާޅުވެ، މުއިއްޒު ހުށަހަޅުއްވާ ކަންކަމަށް ރައްދު ދެއްވާ އަކްރަމް ވިދާޅުވީ އެ ކަންކަން ކުރެވޭނީ ލޭންޑް ޔޫޒް ޕްލޭނަށް ހުށަހަޅައިގެން ސަރުކާރުގެ ސިޔާސަތުތަކާ އެއްގޮތަށް ކަމަށެވެ.
މާފަންނު ބޮޑުގޭގައި ވަގުތީ މިސްކިތް މިހާރު ހަދާފައިވާ ގޯތީގައި އިސްލާމީ މަރުކަޒެއް އިމާރާތް ކުރުމުގެ ހިޔާލު މުއިއްޒު އެ އަވަށުގެ މީހުންނަށް ހުށަހަޅުއްވާފައިވާ މައްސަލާގައި އަކްރަމް ވިދާޅުވީ މާލޭގައި އިތުރު އިސްލާމީ މަރުކަޒެއް އެޅަން ސަރުކާރުން ވިސްނާފައި ނުވާ ކަމަށެވެ.
މުއިއްޒު ވިދާޅުވީ ކައުންސިލަށް ފެންނަ ގޮތުގައި އެ ބިން ބޭނުންކުރަން އެންމެ ރަނގަޅީ އިސްލާމީ މަރުކަޒެއް ގޮތުގަ އެވެ. އަދި އެ އަވަށު ރައްޔިތުންގެ ވިސްނުމަކީ ވެސް އެއީ ކަމަށް މުއިއްޒު ވިދާޅުވި އެވެ.
އެކަމާ ގުޅޭ ގޮތުން "މިހާރު" އާ ވާހަކަ ދައްކަވަމުން އަކްރަމް ވިދާޅުވީ އިސްލާމީ މަރުކަޒެއް އިމާރާތްކުރަން ކައުންސިލުން ނިންމި ނަމަވެސް އެކަން ކުރެވޭނީ ލޭންޑް ޔޫޒް ޕްލޭން ހުށަހަޅައިގެން އެ ޕްލޭން ފާސްކޮށްގެން ކަމަށެވެ.
ލޭންޑް ޔޫޒް ޕްލޭން ފާސް ކުރާނީ ހައުސިން މިނިސްޓްރީން ކަމަށާއި އެ ޕްލޭން ފާސް ކުރާނީ ސަރުކާރުގެ ޕޮލިސީއާ އެއްގޮތަށް ކަމަށް އޭނާ ވިދާޅުވި އެވެ. އަދި މާލޭގައި އިތުރު އިސްލާމީ މަރުކަޒެއް އެޅުމަކީ ސަރުކާރުގެ ޕޮލިސީގައި ހިމެނޭ ކަމެއް ނޫން ކަމަށް ވެސް އަކްރަމް ވިދާޅުވި އެވެ.
"މިހާ ތޮއްޖެހިފައި އޮތް މާހައުލެއް، ވަރަށް ގިނަ ދަތިތަކާ ދިމާވާނެ ރަނގަޅު ސަރަހައްދެއް ނޫން އެއީ އަނެއްކާވެސް އިސްލާމީ މަރުކަޒެއް އަޅަން،" އަކްރަމް ވިދާޅުވި އެވެ.
މާލޭގެ އިސްލާމީ މަރުކަޒުގެ އިތުރުން އިރުމަތީ ފަރާތުގައި ހަދާފައިވާ ކިންގް ސަލްމާން މިސްކިތަކީ ވެސް އިސްލާމީ މަރުކަޒެއް ގޮތުގައި ތަރައްގީކޮށްފައިވާ މިސްކިތެކެވެ.
އިތުރު އިސްލާމީ މަރުކަޒެއްގެ އެޅުމުގެ ވިސްނުން މުއިއްޒު ގެންގުޅުއްވާއިރު މާލޭގެ ވަކިވަކި އަވަށްތަކާ އެކު ކައުންސިލުން ބާއްވާ ސިލްސިލާ ބައްދަލުވުންތަކުގައި އޭނާ އަންނަނީ މާލޭ ކުރަން ރާވާފައިވާ އިތުރު ބޮޑެތި މަޝްރޫއުތައް އިއުލާން ކުރައްވަމުންނެވެ.
އެގޮތުން މާލޭގެ ބޮޑެތި މަގުތަކުގައި ތާރު އެޅުމާއި، ސްޓްރީޓް ފުޑް ކޮންސެޕްޓަށް ބައެއް ސަރަހައްދު ބޭނުން ކުރުމާއި، ޕާކުތަކާއި، ޕާކިން ޒޯނުތައް އަޅަން ވިސްނަވާ ކަމަށް މުއިއްޒު ވިދާޅުވެ އެވެ.