07 އޯގަސްޓް 2021 - 20:10
ކޮވިޑް-19 އިން ދިފާއުވުމަށް ޖަހަން ޖެހޭ ވެކްސިން ފުރިހަމަ ނުކުރާ މީހުންނަށް އާންމު ބައެއް ޚިދުމަތްތައް ދިނުން މަނާކުރަން ސަރުކާރުން ހަމަޖައްސައިފި އެވެ.
ދުނިޔޭގައި ހަލުވިކަމާ އެކު ފެތުރެމުންދާ ކޮވިޑް-19 އިން ރައްކާތެރިވުމަށް ރާއްޖޭގައި ވެކްސިން ދޭން ކުރިން އޮތީ ފަށައިފަ އެވެ.
ސަރުކާރުގެ އިސް އޮފިޝަލަކު މިރޭ ވިދާޅުވީ ވެކްސިންގެ ޑޯޒް ފުރިހަމަ ނުކުރާ މީހުންނަށް ބައެއް ޚިދުމަތްތައް ދިނުން މަނާކުރަން ނިންމާފައިވާ ކަމަށާއި އޭގެ ތަފުސީލުތައް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިރޭ އާންމު ކުރާނެ ކަމަށެވެ. ނަމަވެސް ވެކްސިން ނުޖަހާ މީހުންނަށް ދިނުން ހުއްޓާލަން ނިންމާފައިވަނީ ކޮން ޚިދުމަތްތަކެއް ކަމެއް އޭނާ ވިދާޅެއް ނުވެ އެވެ.
ސަރުކާރުން އެގޮތަށް ނިންމިއިރު، ކޮވިޑް ވެކްސިން ފުރިހަމަ ނުކުރާ އެއްވެސް މީހަކަށް އަންނަ މަހުން ފެށިގެން ސްކޫލުތަކަށް ނުވަދެވޭނެ އެވެ.
ރާއްޖޭގެ އެންމެންނަށް ކޮވިޑް ވެކްސިން ޖެހުމުގެ ޕްރޮގްރާމެއް މިހާރު ފަށާފައިވާއިރު، ސަރުކާރުގެ އަމާޒަކީ މި މަހުގެ ނިޔަލަށް 90 ޕަސެންޓް މީހުންނަށް ވެކްސިންގެ ދެ ޑޯޒް ޖަހައި ނިންމުމެވެ.
ކޮވިޑް-19 އާ ގުޅިގެން ރާއްޖޭގައި އަޅާފައި ފިޔަވަޅުތަކަށް ލުއި ދީފައި ވާއިރު، ބައެއް ގައުމުތަކުގައި އެ ބަލީގެ ހާލަތު އަނެއްކާވެސް ދަނީ ގޯސްވަމުންނެވެ. އޭގެ ތެރޭގައި ސްރީ ލަންކާ އާއި މެދު އިރުމަތީގެ ގައުމުތައް ވެސް ހިމެނެ އެވެ.