05 އޯގަސްޓް 2021 - 13:15
ގުޅިފަޅުގައި ވިޔަފާރީގެ މައި މަރުކަޒު ތަރައްގީކުރުމަށް މި ސަރުކާރުން ނިންމާފައިވާ ޕްލޭން ރިވައިޒް ކުރުމުގެ މަޝްވަރާތަކުގައި އިތުރު ކުރިއެރުން ނުލިބޭ ކަމަށާއި ނަމަވެސް އެކަމުގައި އަދިވެސް އުއްމީދު އެބައޮތް ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ގުޅިފަޅުގައި މި ސަރުކާރުން އަންނަނީ މާލޭގެ ވިޔަފާރި ބަނދަރު ބަދަލުކުރަން ބޮޑު މަޝްރޫއެއް ހިންގުމަށް ތައްޔާރު ވަމުންނެވެ. އަދި އެ ތަނުން 1،244 ގޯތިދޭން ސަރުކާރުން ނިންމާފައިވެ އެވެ. ނަމަވެސް، ސިޓީ ކައުންސިލުން ބޭނުން ވަނީ ތިލަފުށީގައި ވިޔަފާރި ބަނދަރު ގާއިމްކުރާށެވެ. އަދި ގުޅީފަޅުން ގޯތި ދޫކުރާށެވެ.
މާލޭ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމުގައި ގުޅީފަޅުގެ މައްސަލައިގައި އެ ކައުންސިލުން ކޯޓަށް ދާން ނިންމާފައި ވާތީ، އެ މައްސަލަ މިހާރު އޮތީ ކިހާ ހިސާބެއްގައިތޯ ނޫސްވެރިޔަކު ސުވާލުކުރުމުން މުއިއްޒު ވިދާޅުވީ އެކަމުގައި އަދިވެސް ކުރިއެރުމެއް ލިބިފައި ނުވާ ކަމަށެވެ.
"އަސްލު އަޅުގަނޑުމެން ބޭނުންމެއް ވެސް ނޫން [ކޯޓަށް މައްސަލަ ހުށަހަޅާކަށް]. ކައުންސިލުން އެކަން [ކޯޓަށް މައްސަލަ ހުށަހަޅަން] ފާސްކުރީ އެއްވެސް އިތުރު އޮޕްޝަނެއް ނެއްތިއްޖެ ނަމަ އެކަން ކުރަން،" މުއިއްޒު ވިދާޅުވި އެވެ.
މުއިއްޒު ވިދާޅުވީ މި މައްސަލައިގައި ރައީސް އަށް ތަކުރާރުކޮށް ސިޓީ ފޮނުވާފައިވާ ކަމަށެވެ. މިދިޔަ ޖޫން މަހު ރައީސްއާ ބައްދަލުކުރައްވާ ވެސް، ގުޅީފަޅުގެ މައްސަލައިގެ މަޝްވަރާތައް އަވަސްކޮށްދިނުމަށް އޭނާ އެދިވަޑައިގެންފައިވެ އެވެ.
އެ ބައްދަލުކުރެއްވުމަށް ފަހު، މުއިއްޒު ވިދާޅުވެފައި ވަނީ ގުޅިފަޅުގެ ޕްލޭން ރިވައިޒްކުރުމަށް ބައްދަލުވުންތަކެއް ފައްޓަވައިދެއްވާނެ ކަމަށް ރައީސް ވިދާޅުވި ކަމަށާއި މަދުވެގެން 30،000 ރައްޔިތުންނަށް ގެެދޮރު ލިބޭނެ ގޮތަށް އެ ޕްލޭން ރިވައިޒް ކުރާނެ ކަމަށް ވެސް އެ މަނިކުފާނު ވިދާޅުވި ކަމަށެވެ.
"ކުރިއެރުމެއް ނުލިބޭ، ނަމަވެސް އަޅުގަނޑުމެން އުއްމީދެއް ގެއްލުވާ ނުލަން،" މުއިއްޒު މިއަދު ވިދާޅުވި އެވެ.
"އަޅުގަނޑަށް ޔަގީންކުރެވޭ ސަރުކާރުން މާލޭ ރައްޔިތުންގެ އަޑުއަހާނެ ކަމަށް ގުޅީފަޅުގެ މައްސަލައިގައި."
މުއިއްޒު ވިދާޅުވާ ގޮތުގައި ގުޅިފަޅުގައި ވިޔަފާރި ބަނދަރެއް ހިންގުމަކީ އެތަނާ ނުބައްދަލު ކަމެކެވެ. އޭގެ ސަބަބެއް ކަމަށް އޭނާ ވިދާޅުވީ އެވަރުގެ ޕޯޓަކަށް އެތަން އެކަށީގެންނުވުމެވެ. އޭނާ ގަބޫލުކުރައްވާ ގޮތުގައި، ބްރިޖަކުން ގުޅާލައިފައި އޮންނަ ގުޅިފަޅަކީ މާލޭގެ މީހުން ދިރިއުޅެން އެންމެ ރަނގަޅު ތަނެވެ. އަދި އެތަނަކީ މާލޭގެ ރައްޔިތުންގެ ގެދޮރުގެ މައްސަލަ އަށް އޮތް ހައްލު ކަމަށް ވެސް ވިދާޅުވި އެވެ.