28 ޖުލައި 2021 - 10:45
ސެވިއްޔާ (ޖުލައި 28) - ސެވިއްޔާގެ ފްރާންސްގެ ޑިފެންޑަރު، ޖޫލް ކުންޑޭގެ ޓްރާންސްފާއާ ބެހޭގޮތުން ޗެލްސީން މަޝްވަރާ ކުރަން ފަށައިފި އެވެ.
ނިމިދިޔަ ސީޒަންގައި، ލަ ލީގާގައި އެއްވަރެއްގައި ކުޅުން ހިފެހެއްޓި އުމުރުން 22 އަހަރުގެ ޑިފެންޑަރު ވަނީ ނިމިގެން ދިޔަ ޔޫރޯގައި ފްރާންސްގެ ޓީމަށް ވެސް ކުޅެފަ އެވެ.
ކުންޑޭ މިދިޔަ ސީޒަންގައި ދެއްކި ކުޅުމާ އެކު އޭނާގެ ޓްރާންސްފާގެ އަގު ބޮޑު ވާނެ އެވެ. އޭނާގެ ކޮންޓްރެކްޓްގައިވާ ގޮތުން އެހެން ކްލަބަކުން އޭނާ ގެންދަން ބޭނުންވެއްޖެ ނަމަ ގާތްގަނޑަކަށް 95 މިލިއަން ޑޮލަރު ސެވިއްޔާ އަށް ދޭން ޖެހޭނެ އެވެ.
ކޮވިޑް-19 އާ ގުޅިގެން ކުރިމަތިވި މާލީ ގޮންޖެހުމުގެ އަސަރު ސެވިއްޔާ އަށް ވެސް ވަނީ ކުރިމަތިވެފަ އެވެ. އެ ހާލަތުން އެ ޓީމު އަރައިގަތުމަށްޓަކައި ބޭނުންވާ ފައިސާ ހޯދުމަށް ކުންޑޭ ޗެލްސީ އަށް ވިއްކާލާނެ ކަމަށް ބެލެވެ އެވެ.
ކުންޑޭ ގެންދަން، މެންޗެސްޓާ ޔުނައިޓެޑުން ވެސް ޝައުގުވެރިކަން ފާޅު ކުރި އެވެ. ނަމަވެސް ކުންޑޭގެ ޓްރާންސްފާގައި މިހާރު ކުރީގައި އުޅެނީ ޗެލްސީ އެވެ. އަނެއްކޮޅުން ޔުނައިޓެޑުން ވަނީ ރެއާލް މެޑްރިޑުގައި ފްރާންސްގެ ދެ ވަނަ ޑިފެންޑަރު، ރަފޭލް ވަރާން ސޮއި ކުރުވައިފަ އެވެ.
ކުންޑޭ ގަންނަން ބޭނުންވާ ފައިސާ ވެސް ޗެލްސީން ވަނީ ހޯދައިފަ އެވެ. އެ ޓީމު ދެ ޑިފެންޑަރުން ކަމަށްވާ، ފިކޭޔޯ ޓަމޯރީ އަދި މާކް ގެއީ ޗެލްސީން ވަނީ ވިއްކާލައިފަ އެވެ. ޓަމޯރީ، އޭސީ މިލާނަށް ވިއްކާލީ 41.5 މިލިއަން ޑޮލަރަށެވެ. މާކް ގެއީ ކްރިސްޓަލް ޕެލަސް އަށް ވިއްކާލީ 27 މިލިއަން ޑޮލަރަށެވެ.
ޗެލްސީން ދަނީ ބްރޫޝިއާ ޑޯޓްމަންޑުގެ ފޯވަޑް އާލިން ހާލޭންޑް ގެނައުމަށް މަސައްކަތް ކުރަމުންނެވެ. އޭނާގެ ޓްރާންސްފާ އަގަކީ ގާތްގަނޑަކަށް 200 މިލިއަން ޑޮލަރެވެ.