24 ޖުލައި 2021 - 15:01
ރާއްޖެ އަށް މިހާރު 39 މަންޒިލަކުން މީހުން ދަތުރުކުރާ ކަމަށް ވެލާނާ އިންޓަނޭޝަނަލް އެއާޕޯޓް (ވީއައިއޭ) ހިންގާ އެމްއޭސީއެލުން ބުނެފި އެވެ.
އެއާޕޯޓުގެ ރަސްމީ ޓްވިޓާ އެކައުންޓުގައި އާންމުކޮށްފައިވާ ތަފާސްހިސާބުތައް ދައްކާ ގޮތުން ކޮވިޑްގެ ހާލަތުގެ ކުރިން 2019 ގައި ރާއްޖެ އަށް ދަތުރުތައް ކުރަމުން އައީ 35 މަންޒިލަކުން ކަމަށް ވިޔަސް އެ އުނދަގޫ ހާލަތުގެ ތެރެއިން ވެސް ރާއްޖެ އިން ވަނީ އާ އިތުރު މަންޒިލްތަކުން ދަތުރުތައް ފަށައިފަ އެވެ.
ރާއްޖެއަށް މި ވަގުތު 25 ގައުމަކުން ސީދާ ދަތުރުތައް ކުރެ އެވެ. ކޮވިޑްގެ ހާލަތުގެ ކުރިން ރާއްޖޭގެ އެންމެ ބޮޑު އިންޓަނޭޝަނަލް އެއާޕޯޓަށް ބޯޓުތައް ޖައްސަމުން އައީ 19 ގައުމަކުންނެވެ. ދަތުރުކުރާ ގައުމުތަކާއި މަންޒިލްތައް އިތުރުވި އިރު ރާއްޖެއަށް ވަނީ އިތުރު އާ އެއާލައިންތަކުން ވެސް ސީދާ ދަތުރުކުރަން ފަށައިފަ އެވެ. އެގޮތުން މި ވަގުތު 36 އެއާލައިނަކުން ރާއްޖެ އަށް ދަތުރުތައް ކުރެ އެވެ. މި އަދަދު 2019 ވަނަ އަހަރު ނިމުނު އިރު ހުރީ 34 ގަ އެވެ.
ކޮވިޑާ ގުޅިގެން ގައުމުތަކުން ދަތުރުތައް ހުއްޓައިލުމުން އެންމެ ބޮޑު މާލީ ގޮންޖެހުމަކާ ކުރިމަތިވީ އެމްއޭސީއެލް އަށެވެ. އަދިވެސް މާލީ ހާލަތު ހަމައަކަށް ނޭޅުނު ނަމަވެސް ރާއްޖެ އަށް ދަތުރުކުރާ ފަސިންޖަރުންގެ އަދަދު އިތުރުވުމާ އެކު އެ ކުންފުނީގެ ހާލަތު އަންނަނީ ރަނގަޅުވަމުންނެވެ. މި އަހަރުގެ މިހާތަނަށް 545،000 މީހުން ރާއްޖެއަށް އައިސްފައިވެ އެވެ. އަދި ރާއްޖެ އިން 565،000 މީހުން ފުރާފައިވެ އެވެ.
ޓޫރިޒަމް މިނިސްޓްރީން ވެސް އަންނަނީ ރާއްޖެއަށް އިތުރު އެއާލައިންތައް ގެނައުމުގެ މަސައްކަތްތައް ކުރަމުންނެވެ. އެގޮތުން ރަޝިއާގައި ހުންނަ ދިވެހި ޓުއާ އޮޕަރޭޓިން ކުންފުންޏެއް ކަމަށްވާ ރިސޯޓް ލައިފް ހޮލިޑޭސްގައި މިދިޔަ ބުދަ ދުވަހު ބޭއްވި ބައްދަލުވުމެއްގައި ވެސް އިރުމަތީ ޔޫރަޕްގެ ގައުމުތަކުން ރާއްޖެއަށް ދަތުރުތައް ފެށުމާ ގުޅޭ ގޮތުން މަޝްވަރާ ކުރި އެވެ. މި ބައްދަލުވުމުގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް ބައިވެރިވެވަޑައިގަތެވެ.