15 ޖުލައި 2021 - 23:12
ރިސޯޓުތަކާއި އެހެން ޓޫރިސްޓު ފެސިލިޓީތަކުން ސާވިސް ޗާޖު ބަހަނީ ރަނގަޅަށް ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް މިއަދު ވިދާޅުވެއްޖެ އެވެ.
ޓޫރިޒަމް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި މައުސޫމް ވިދާޅުވީ ރިސޯޓުތަކުގައި މަސައްކަތް ކުރަނީ ތައުލީމު ލިބިފައިވާ މުވައްޒަފުން ކަމަށް ވުމުން އެ މީހުންނަށް ރިސޯޓަށް ވަންނަ ފައިސާ އާއި އެ މީހުންނަށް ލިބެން ޖެހޭ އަދަދު އެނގޭ ކަމަށެވެ. އަދި މިހާރު ފައިސާގެ މުއާމަލާތް ކުރަނީ އިލެކްޓްރޯނިކްކޮށް ކަމަށްވުމުން ބޭންކު ޓްރާންސެކްޝަންތައް ވެސް ފަސޭހަ އިން ބަލާލެވޭނެ ކަމަށް އޭނާ ވިދާޅުވި އެވެ.
މައުސޫމް ވިދާޅުވީ މި ސަބަބުތަކާއި ގާނޫނަށް ގެނައި ބަދަލާއި ލޭބާ ރިލޭޝަނުން ނެރުނު ގަވާއިދުގެ ސަބަބުން ސާވިސް ޗާޖުގެ ކަންކަން ދަނީ ރަނގަޅަށް ކަމަށް ބެލެވޭ ކަމަށެވެ.
"މިހާރު ތިބެނީ ވަރަށް އެޑިއުކޭޓެޑް ކުދިން. އެކުދިން ހިސާބު ކޮށްލާނެ އެތަނަށް ވަންނަ ވަރު. އަދި ހިސާބު ކޮށްލާފައި އެއިން ޖެހޭ އަދަދުވެސް އެނގޭނެ. އެހެންވެ ސާވިސް ޗާޖުގެ ގާނޫނަށް ގެނައި ބަދަލާއި ލޭބާ ރިލޭޝަންސް އޮތޯރިޓީން އެއާ ގުޅިގެން ހެދި ގަވާއިދުގެ އަލީގައި އަޅުގަނޑުމެން މިބަލަނީ ސާވިސް ޗާޖުގެ ކަންކަން ރަނގަޅަށް ދާ ކަމަށް،" މައުސޫމް ވިދާޅުވި އެވެ.
އޭނާ ވިދާޅުވީ ސާވިސް ޗާޖުގެ ކަންކަން ގޯސްކޮށް ދާނަމަ އެކަން މިނިސްޓްރީ އަށް މެއިލްގެ ޒަރީއާ އިން އެންގުމުން ވަގުތުން އެކަން ބަލާނެ ކަމަށެވެ. އަދި މިނިސްޓްރީން މަސައްކަތް ކުރަމުން އަންނަނީ ސާވިސް ޗާޖު ބޮޑު ކުރުމަށް ކަމަށް މައުސޫމް ވިދާޅުވި އެވެ.
ޓޫރިޒަމް މިނިސްޓްރީ އަށް މައްސަލަ ހުށަހަޅާނީ[email protected]އަށް މެއިލް ކޮށްގެންނެވެ.
ސާވިސް ޗާޖުގެ ކަންކަން ރަނގަޅަށް ދާކަމަށް މައުސޫމް ވިދާޅުވެފައިވާ އިރު ގިނަ ރިސޯޓުތަކުގެ މުވައްޒަފުން އަންނަނީ ސާވިސް ޗާޖު ދިނުމުގައި ރިސޯޓުތަކުން މަކަރު ހަދާ ކަމަށް ބުނެ ކަންބޮޑުވުން ފާޅު ކުރަމުންނެވެ.