28 ނޮވެމްބަރ 2016 - 06:40
ރައީސް ބަރަކް އޮބާމާގެ ރިޔާސީ ދައުރު ނިމުމަކަށް އަންނަ އިރު، އަނބިކަނބަލުން މިޝޭލް ވަނީ ގިނަ ބައެއްގެ ލޯބި ހޯއްދަވައިފަ އެވެ. މިޝޭލްގެ ހިތްވަރުގަދަ ކަމާއި ވާހަކަ ދެއްކުންތެރިކަމުގެ އިތުރުން ހިތްގައިމު އަދި ފުރިހަމަ ސްޓައިލަށް ވެސް ގިނަ ބައެއްގެ ސަމާލުކަން ލިބިފައިވެ އެވެ.
މިޝޭލްގެ ސްޓައިލުން ހަމައެކަނި ރަމްޒުކޮށްދިނީ ފުރިހަމަކޮށް ހެދުން ގުޅުވާލެވޭނެ ގޮތްތަކެއް ނޫނެވެ. ކޮންމެ ހެދުމެއް ވެސް މުހިއްމު ސިޔާސީ އަދި އިޖުތިމާއީ ކަމެއް ރަމްޒު ކުރި އެވެ. ވައިޓް ހައުސްގައި ބާއްވާ ރަސްމީ ފަރިއްކޮޅުތަކަށް މިޝޭލް ތުރުކުރެއްވި ކޮންމެ ހެދުމަކަށް ވެސް ވަރަށް ބޮޑު ސަމާލުކަމެއް ލިބުނެވެ.
މިއަހަރު އޮކްޓޫބަރު މަހު އިޓަލީގެ ރައީސްގެ ދެކަނބަލުން ޒިޔާރަތް ކުރެއްވުމުން، މިޝޭލް ތުރުކުރެއްވީ މަޝްހޫރު ފެޝަން ބްރޭންޑް އެޓެލިއޭ ވަސަޗޭގެ ވިދާ ރަން ކުލައިގެ ގައުނެކެވެ. އަދި 2009 ވަނަ އަހަރު އިންޑިއާގެ ބޮޑުވަޒީރުގެ ދެ ކަނބަލުން ޒިޔާރަތް ކުރެއްވި އިރު މިޝޭލް ތުރުކުރެއްވީ އެމެރިކާގައި މަސައްކަތްކުރާ އިންޑިއާއަށް ނިސްބަތްވާ ޑިޒައިނާ ނައީމް ހާންގެ މަޑު ކްރީމް ކުލައިގެ ހެދުމެކެވެ.
މިޝޭލްގެ މި "ޑިޕްލޮމެޓިކް ސްޓައިލް"ގެ ސަބަބުން ގިނަ ޑިޒައިނަރުންގެ ވެސް ތަރުހީބާއި އިހްތިރާމް ލިބިވަޑައިގަތެވެ.
އެންމެ ބޮޑު ފެޝަން މަޖައްލާ ވޯގް އަށް ޑިޒައިނަރުން މިޝޭލް އާއި ބެހޭގޮތުން ހިޔާލު ފާޅުކޮށްފައިވެ އެވެ. ޕްރަބާލް ގުރުން، ރިކާޑޯ ޓިސްކީ އަދި ޖޭސަން ވޫ ފަދަ ބައިނަލްއަގްވާމީ ޑިޒައިނަރުން ބުނެފައި ވަނީ މިޝޭލް އަކީ އެމީހުންނަށް ވެސް ލިބޭ ހިތްވަރެއް ކަމަށެވެ.
