14 ޖުލައި 2021 - 20:42
އުރީދޫގެ ރިވޯޑް ސްކީމް، ކްލަބް ޕްރިމިއާގެ ހިދުމަތް އެ ކުންފުނީގެ ސުޕަނެޓް ކަސްޓަމަރުންނަށް މިއަދު ތައާރަފު ކޮށްފި އެވެ.
މިއީ އުރީދޫގެ ޕޯސްޓްޕެއިޑް ކަސްޓަމަރުންގެ ތެރެއިން އެންމެ އަގުހުރި ކަސްޓަމަރުންނަށް ހާއްސަކޮށްގެން 2015 ވަނަ އަހަރު ތައާރަފު ކުރި ހިދުމަތެކެވެ. މި ރިވޯޑް ސްކީމްގެ ދަށުން ރާއްޖެ އާއި ބައިނަލްއަގުވާމީ އެކި ބްރޭންޑްތަކުން ޑިސްކައުންޓް ލިބެ އެވެ.
އުރީދޫން ބުނީ އެ ކުންފުނީގެ ސުޕަނެޓް ކަސްޓަމަރުންގެ ތެރެއިން ކްލަބް ޕްރިމިއާގެ މެމްބަރުންނަށް ވެވޭނީ 40އެމް އިން މަތީގެ ޕެކޭޖުތައް ނަގާފައިވާ ކަސްޓަމަރުންނަށް ކަމަށެވެ. އަދި ގެންގުޅޭ ޕެކޭޖަކަށް ބަލައި ސިލްވާ ނުވަތަ ގޯލްޑް ނުވަތަ ޕްލެޓިނަމް މެމްބަރުންގެ ތެރޭގައި ހިމެނޭނެ ކަމަށް އެ ކުންފުނިން ބުންޏެވެ.
ކްލަބް ޕްރިމިއާގެ ސިލްވާ މެމްބަރުންނަށް ރާއްޖޭގެ މަގުބޫލު ބްރޭންޑުތަކުން ޑިސްކައުންޓާއި ކްލަބް ޕްރިމިއާ ލައުންޖު އެކްސެސް އާއި އުރީދޫގެ ހާއްސަ ޕްރޮމޯޝަންތަކާއި ހިދުމަތްތައް ލިބޭނެ އެވެ. އަދި ގޯލްޑް އާއި ޕްލެޓިނަމް މެމްބަރުންނަށް މި ހިދުމަތްތަކުގެ އިތުރުން ލައިފް އިންޝޫރެންސާއި ޕްރަޔޯރިޓީ ޕާސް ލިބޭނެ އެވެ.
އުރީދޫގެ ޗީފް ކޮމާޝަލް އޮފިސަރު ހުސައިން ނިޔާޒު ވިދާޅުވީ މި ސްކީމަކީ ކަސްޓަމަރުންގެ އަގުވަޒަން ކުރުމަށް ތައާރަފު ކުރި ސްކީމެއް ކަމަށެވެ. އަދި ކުރިއަށް އޮތް ތާނގައި ވެސް މިފަދަ ހިދުމަތްތައް ފުޅާކުރުމަށް މަސައްކަތް ކުރައްވާނެ ކަމަށް އޭނާ ވިދާޅުވި އެވެ.
"މިއަދު ސުޕަނެޓް ކަސްޓަމަރުންނަށް ވެސް މި ހިދުމަތަށް އަޅުގަނޑުމެން މަރުހަބާ މި ކިޔަނީ ނުހަނު އުފަލާ އެކު، ކުރިއަށް އޮތްތަނުގައި ވެސް އަޅުގަނޑުމެންގެ މިފަދަ ހިދުމަތްތައް ފުޅާކޮށް އިތުރު ފުރިހަމަކަމާއި ގިނަ ފައިދާތަކެއް ހޯދައިދިނުމުގައި ދެމިތިބޭނެކަމުގެ ޔަގީންކަން އަރުވަން،" ނިޔާޒު ވިދާޅުވި އެވެ.
ކްލަބް ޕްރިމިއާ އިން ޑިސްކައުންޓު ލިބޭ ރާއްޖޭގެ ބްރޭންޑްތަކުގެ ތެރޭގައި ބްރޭންޑްލޫމް، ކޮފީ ލެބް މޯލްޑިވްސް، ސޮނީ ލައިފްސްޓައިލް، ކައިލާން ފަދަ ތަންތަން ހިމެނެ އެވެ.
މި ކްލަބުގެ މެމްބަޝިޕް ލިބުނު ކަސްޓަމަރުންގެ ޑިޖިޓަލް ކާޑު އުރީދޫ އެޕް މެދުވެރިކޮށް ފެންނާނެ ކަމަށް އެ ކުންފުނިން ބުންޏެވެ.