24 ނޮވެމްބަރ 2016 - 16:51
އިސްލާމީ މަރުކަޒު ވަށައިގެން ޖަހާފައިވާ ބައެއް މާބްލްތަކުގައި ވަރަށް ބޮޑަށް ރެނދުލާފައިވާތީ އެ ޓައިލްސްތައް ނަގައި އަލުން އެ ސަރަހައްދު ހަދަން ނިންމާފައިވާ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ހައުސިން މިނިސްޓްރީގައި ބޭއްވި ނިއުސް ކޮންފަރެންސެއްގައި މިނިސްޓަރު ވިދާޅުވީ އިސްލާމީ މަރުކަޒު ސަރަހައްދުގައި މާބުލް ޖަހާފައި ވަނީ މިނިސްޓްރީން ބޭނުންވި ފެންވަރުގައި ނޫން ކަމަށެވެ. މާބްލްސް ޖެހުމަށް ފަހު އޭގެ މަތީގައި ބިއްލޫރި ފަށަލައެއްލާފައި ވިއަސް އެއީ އެކަން ކުރަން ނިންމި ގޮތް ނޫން ކަމަށް ވިދާޅުވި އެވެ.
ޗައިނާގެ ހިލޭ އެހީގެ މަޝްރޫއުގެ ދަށުން އެ ސަރަހައްދުގައި ޖެހި މާބްލްސްތަކުގެ މަތިން އަޅާފައިވާ ބިއްލޫރި ފަށަލަ ތަޅައިގެން ގޮސް މުށިތަކުގެ ކުލަ ވަނީ ކެހިފަ އެވެ.
އެ ސަރަހައްދުގައި ޖަހާފައިވާ މާބްލްގެ ފެންވަރު ދަށް ކަން، މިނިސްޓަރު ވިދާޅުވި ގޮތުގައި، އެ ތަކެތި ފޯރުކޮށްދިން ކުންފުންޏަށް ވެސް ވަނީ އަންގައިފަ އެވެ. ސަރުކާރުން އެއްވެސް ހަރަދެއް ނުކޮށް، މައްސަލަ ހައްލުކުރަން ނިންމާފައިވާ ކަމަށް މުއިއްޒު ވިދާޅުވި އެވެ.
"ސަރުކާރުން އެއްވެސް ހަރަދެއް ނުކޮށް، ޕެޓަން އޭރިއާ ބަދަލުކުރަން ޓައިލްސް ފޮނުވުގެ މަރުހަލާގައި އުޅޭ ކަމަށް އަޅުގަނޑުމެން މައުލޫމާތު ލިބިފައި ވަނީ. އެ ތަކެތި ލިބުނީމަ އަޅުގަނޑުމެން ޕެޓަން އޭރިއާ ބަދަލުކޮށްލީމަ އެކަން ދިމަލެއް ނުވާނެ،" މުއިއްޒު ވިދާޅުވި އެވެ.
އިސްލާމީ މަރުކަޒު ސަރަހައްދުގައި ކުޑަތައް ޖެހުން ލަސްވާ ސަބަބާ ގުޅޭގޮތުން މިނިސްޓަރު ވިދާޅުވީ އެކަން ކުރަން، މަސްޖިދުއްނަބަވީގައި އެ މަސައްކަތް ކުރި ފަރާތް މާލެ ގެނައި ކަމަށެވެ. އަދި މުޅި ސަރަހައްދު ބަލައި އެކަން ކުރާނެ ގޮތް އެއްވެސް ހަރަދަކާ ނުލައި ޑިޒައިން ވެސް ކޮށްފައިވާ ކަމަށް ވިދާޅުވި އެވެ.
އެކަމަކު ކުޑަތައް ޖަހަން ހިނގާ ބޮޑު ހަރަދަކީ ސަރުކާރުގެ ބަޖެޓުން ކުރެވޭވަރުގެ ކަމަކަށް ނުވާނެތީ، މިހާރު ކުރިއަށް ދަނީ، އެކަމަށް ފައިސާ ހޯދުން ކަމަށާއި އެކަމަށް ވަގުތު ނަގަނީ ކަމަށް މިނިސްޓަރު ވިދާޅުވި އެވެ.