09 ޖުލައި 2021 - 15:39
ހުޅުމާލެ އިން މުއްސަނދިންނަށް ބިން ވިއްކަން އަލުން ފެށުމުން ފެނިގެން ދަނީ ތަރުތީބު އޮޅިފައިވާތަން ކަމަށް މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
މުއިއްޒު ރޭ ކުރެއްވި ޓުވީޓެއްގައި ވިދާޅުވީ، މާލޭގެ ރައްޔިތުންނަށް ދިމާވެފައިވާ ގެދޮރުވެރިކަމުގެ މައްސަލަތަކަށް އެކަށީގެންވާ ހައްލެއް ގެނެސް ނުދީ، މުއްސަނދިންނަށް ހުޅުމާލެ އިން އަލުން ބިން ވިއްކަން ފެށުމީ ވަރަށް ދެރަ ކަމެއް ކަމަށެވެ.
"މާލޭގެ ނިކަމެތި ރައްޔިތުންނަށް ގެދޮރުވެރިކަން ކަށަވަރު ކޮށްދިނުމަށް އެކަށީގެންވާ ހައްލުތަކެއް ނުގެނެސްދީ ހުޅުމާލެ އިން ބޮޑު އަގުގައި މުއްސަނދިންނަށް ބިން ވިއްކަން އަލުން ފެށުމަކީ، ތަރުތީބު އޮޅިފައިވާ، ވަރަށް ދެރަ ކަމެއް" މުއިއްޒު ވިދާޅުވި އެވެ.
މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަތަކަށް ހައްލު ހޯދައި ދިނުމަށް މަސައްކަތް ކުރައްވާނެ ކަމަށް މުއިއްޒު ވަނީ މޭޔަރުކަމަށް ވާދަކުރެއްވި އިންތިޚާބުގެ ކެމްޕެއިން ތެރޭގައި ވެސް ވިދާޅުވެފަ އެވެ. އަދި އެކަން ކުރެވެންދެން މާލޭ ދަފްތަރުގައި ޖެއްސުން ވަގުތީ ގޮތުން ވަނީ މެދުކަނޑާލައިފަ އެވެ.
ހުޅުމާލެ އިން އަލުން ބިން ވިއްކަން ފެށުމަށް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން ނިންމާފައިވާ ކަމުގެ ވާހަކަތަކެއް ދެކެވުނު ނަމަވެސް، ރަސްމީ ސިފައެއްގައި އެޗްޑީސީން މިކަން އިއުލާން ކޮށްފައެއް ނުވެ އެވެ.