05 އޯގަސްޓް 2021 - 09:58
މީގެ ދޮޅު އަހަރު ކުރިން ފެތުރެން ފެށި ކޮވިޑު-19 ބަލިމަޑުކަމުގެ ސަބަބުން މީހުންގެ ދިރިއުޅުމަށް ވަރަށް ބޮޑެތި ބަދަލުތަކެއް އައިސްފައިވެ އެވެ. އެގޮތުން ކުދިންގެ ކިޔެވުމަށް އެތައް ގޮންޖެހުންތަކެއް ވަނީ ކުރިމަތި ވެފައެވެ. ހާއްސަކޮށް އޯ ލެވެލްގެ މުގައްރަރު ފުރިހަމަކުރަމުންދާ ގްރޭޑް 9 އަދި 10ގެ ދަރިވަރުންނަށް މިކަމުގެ ގެއްލުން ވަކިން ބޮޑެވެ. މުގައްރަރު ފުރިހަމަ ކުރަންޖެހިފައިވާ އަހަރުތަކުގައި ސްކޫލަށް ނުދެވި، މުޅިން އަލަށް މީސްމީޑިއާ މެދުވެރިކޮށް ކިޔަވަންޖެހުމަކީ ވަރަށް ބޮޑެތި ހުރަސްތައް ދިމާވި ކަމެކެވެ.
ބޭނުންކުރެވޭނެ ގޮތަށް ތައްޔާރުކުރެވިފައިވާ ތަނެކެވެ. އެއާ ހިލާފަށް މި ބަލިމަޑުކަމުގެ ސަބަބުން އިލްމު އުނގެނެން ޖެހުނު ގޭތެރެއަކީ މިފަދަ ތަނެއް ނޫނެވެ. ގޭތެރޭގައި ގިނަ މީހުން އުޅޭތީ ކިޔަވާ ވަގުތު އެ މީހުންގެ އުނދަގޫތަކާ ކުރިމަތިލާން ޖެހެ އެވެ. ގޭގައި ފޯނާއި ޓީވީ ފަދަ ތަކެތި ފަސޭހައިން ބޭނުންކުރެވެން ހުރުމުން ކިޔެވުމަށް ވުރެ އެފަދަ ކަންކަމަށް މާ ބޮޑަށް ސަމާލުކަން ދެވެ އެވެ. މީގެ އިތުރުން، އިންޓަނެޓުގެ މައްސަލަތައް ދިމާވެ މުދައްރިސުން ކިޔަވައިދޭ ވަގުތުތަކުގައި އަޑު ކެނޑިކެނޑިގެން ގޮސް ކިޔަވައިދޭ ފިލާވަޅުތައް ނޭނގި ވެސް ހިނގައިދެ އެވެ.
މި ގްރޭޑުތަކުގައި ކިޔަވާ ފިލާވަޅުތަކަކީ އެއް ފިލާވަޅު އަނެއް ފިލާވަޅާއި ވަރަށް ބޮޑަށް ގުޅިފައިވާ ފިލާވަޅުތަކަށް ވުމުން، މިގޮތަށް އެންމެ ފިލާވަޅެއް ގެއްލުނަސް، އެ ލިބެނީ ވަރަށް ބޮޑު ގެއްލުމެކެވެ. އެހެންކަމުން ދެން ކުރަންޖެހޭ މަސައްކަތް އިންތިހާއަށް ބޮޑުވެ އެވެ.
ސްކޫލުގައި ކިޔެވުމުން މުދައްރިސުންނާ ބައްދަލުވެ، މުދައްރިސުންނާ އޮންނަ ގުޅުން ބަދަހިވާނެ އެވެ. މުދައްރިސުން ކައިރީގައި ނޭނގޭ އެއްޗެހި އޮޅުންފިލުވުމަކީ ވަރަށް ފަސޭހަ ކަމެކެވެ. ނަމަވެސް، އޮންލައިންކޮށް ކިޔެވުމުން، މުދައްރިސުންނާއި އޮންނަ ގުޅުން ހީނަރުވެ، ނޭނގޭ އެއްޗެހި އޮޅުންފިލުވާކަށް ގިނަ ފަހަރު ނުކެރެއެވެ. މިކަން ކުރާކަށް ވަގުތު ވެސް ނުލިބެ އެވެ. މީގެ އިތުރުން، މި ނުރައްކާތެރި ވަބާގެ ސަބަބުން ކުލާސް ކުދިންނާއެކު މަޝްވަރާކުރުމުގެ ފުރުސަތު ވެސް އަޅުގަނޑުމެންނަށް ވަނީ ގެއްލިފަ އެވެ.
ކޮރޯނާ ވައިރަސްގެ ސަބަބުން ކިޔަވާ ކުދިންނަށް ނަފުސާނީ ގެއްލުން ވެސް ލިބެއެވެ. ގިނަ ދުވަސް ވަންދެން ބޭރަށް ނުގޮސް، ގޭގައި ތާށިވެފައި ހުރުމުން، ނަފުސާނީ އެކިއެކި މައްސަލަތައް ދިމާވުމުގެ ފުރުސަތު ބޮޑުވެއެވެ. މިފަދަ ބޮޑު އާލަމީ ވަބާއެއް ދުނިޔެއާ ކުރިމަތިވުމުން، ކިޔެވުމަކީ އެހާ މުހިންމު ކަމެއް ކަމަށް ނުދެކެއެވެ. އެހެންކަމުން ކިޔަވާ ހިތް ނުވާނެއެވެ. ކިޔެވުމާ ދުރުވާނެއެވެ. ނަތީޖާ ދަށްވާނެ އެވެ.
މިފަދަ އެތައް އުނދަގޫތަކެއް ކިޔަވާ ކޮންމެ ކުއްޖަކަށް ވެސް ދިމާވާނެކަމީ ޔަގީން ކަމެކެވެ. ނަމަވެސް ކޮންމެ ކުއްޖަކުވެސް ހިތްވަރުކޮށްގެން ރަނގަޅު ނަތީޖާ ހޯދަން ގަދައަޅާ މަސައްކަތް ކުރަންވާނެ އެވެ. އޭރުން އާހިރުގައި ލިބޭނީ ފަލާހާއި ކާމިޔާބެވެ.
އެޑިޓަރުގެ ނޯޓް: މިއީ މި އަހަރު ޖަމާލުއްދީން ސްކޫލުގެ ގްރޭޑް 10 އަށް ބަދަލުވި ދަރިވަރު އައިޝަތު އީޝަލް އަހުމަދު އަސްލަމް ސްކޫލު ގައިޑަށް ފޮނުވި ލިޔުމެކެވެ.