02 ޖުލައި 2021 - 15:07
ޕީޓާސްބާގް (ޖުލައި 2) - ހާފް ޓައިމްގެ ކަށިގަނޑާ އެކު ސްޕެއިންގެ ގިނަ ކުޅުންތެރިން މިސްރާބު ޖެހީ ޗޭންޖިން ރޫމްއާ ދިމާލަށެވެ. ބެންޗުގައި ބަދަލު ކީޕަރެއްގެ ގޮތުގައި ހުރި ޑޭވިޑް ޑެ ހެއާ ދިޔައީ، ދަނޑުން ފައިބާން ދިޔަ ކީޕަރު އުނައި ސިމޯންއާ ދިމާލަށެވެ. ކޯޕެންހޭގަންގެ ޕާކެން ސްޓޭޑިއަމްގެ ކަނުގައި ހުންނަ ޗޭންޖިން ރޫމަށް ދާން ޖެހޭނީ ދުރުން ހިނގައިފަ އެވެ. ޑެހެއާ ގޮސް ސިމޯންގެ ކޮނޑަށް އަތްލައި އޭނާ އަށް ހިތްވަރު ދޭން ފެށި އެވެ.
ކީޕަރަކު މެޗެއްގައި ހަދާނެ އެންމެ ބޮޑު ގޯސް އެ މެޗުގައި އުނައި ސިމޯން ހެދި އެވެ. ޕެޑްރީ ފަހަތަށް ދިން ބެކް ޕާސް ކޮންޓްރޯލް ނުކުރެވި ސިމޯންގެ ފައިގައި ޖެހިފައި ވަނީ އަމިއްލަ ގޯލްގެ ތެރެއަށެވެ. ބޮޑު މުބާރާތެއްގައި އެންމެ ދުރުން ޖެހި ބައި ގޯލުގެ ގޮތުގައި އެ ލަނޑު ވަނީ ލިސްޓްކޮށްފަ އެވެ. ސިމޯން އަށް ސަމާލު ނުވެވުނީ އެވެ. އޭނާގެ ފޯކަސް ގެއްލުނީ އެވެ. މިފަހަރުގެ ޔޫރޯގައި ކީޕަރަކު ހަދާނެ އެންމެ ބޮޑެތި ގޯސްތައް ސިމޯން އަތުން ހެދިގެން ދިޔަ އެވެ.
ސްޕެއިންގެ ބައެއް ކުޅުންތެރިންނަށް އެ ގޯލް ވަންތަން ނުވެސް ފެނުނެވެ. ހާފުގެ މެދަށް ވުރެ ވެސް ދުރުން ދިން ބޯޅަ ކީޕަރަށް ކޮންޓްރޯލް ނުކުރެވިގެން ހިނގައި ދާނެ ކަމަށް އެ ކުޅުންތެރިންނަށް ވަޒަން ކޮށްލަން ވެސް ނޭންގުނީ އެވެ. އެ ކުޅުންތެރިންނަށް އެނގުނީ ބައިކޮޅަށް ގޯލެއް ވަން ކަމެކެވެ.
ޑެހެއާ އާއި ސިމޯން ޗޭންޖިން ރޫމަށް އަންނަންދެން އެ ދެ ކީޕަރުންގެ އިންތިޒާރުގައި، ސްޕެއިންގެ މުޅި ޓީމް، ޓީމް ޓޯކްސް ނުފަށައި ތިއްބެވެ. ކީޕަރު އަތުން ހެދުނު އެންމެ ބޮޑު ގޯސް ސިމޯން އަށް ހެދުނަސް މުޅިި ޓީމުން ދައްކައި ދިނީ ސިމޯންއާ އެކުގައިވާކަމެވެ.
"އަހަރެމެން އެންމެ ވަނީ އުނައި (ސިމޯން) އާ އެކު،" ސްޕެއިންގެ ކެޕްޓަން ސާޖިއޯ ބުސްކެޓްސް ބުންޏެވެ.
ސިމޯންގެ އަތުން ބައިކޮޅަށް ވަން ލަނޑާ އެކު ކްރޮއޭޝިއާ އިން ލީޑު ނެގުމުން، ސްޕެއިން އަލުން ކުޅުން ފެށީ "ޝޮކެއްގައި ތިބެގެން" ކަމަށް އެ ޓީމުގެ ކޯޗް ލުއިސް އެންރީކޭ ބުންޏެވެ. އެ ލަނޑަށް ފަހު ކީޕަރުގެ އޭރިއާގެ ތެރޭގައި ސިމޯން އެކަނި ހުރި އިރު އޭނާ ކުރާނެ އިހްސާސް އެންރީކޭއަށް ވަރަށް ރަނގަޅަށް އެނގެ އެވެ. ޕަބެލޯ ސަރާބިއާ ސްޕެއިން އަށް ނަތީޖާ ހަމަހަމަ ކޮށްދިނުމާ ހަމައަށް ސިމޯން ވެސް ހުރީ އުނދަގޫ ފައްތަރެއްގަ އެވެ.
ނަމަވެސް އޭނާ އިތުބާރު ހޯދީ ހާފް ޓައިމްގައި ސްޕެއިންގެ ކުޅުންތެރިން ދިން ހިތްވަރުންނެވެ. މެޗު އެއްވަރުވެ އެކްސްޓްރާ ޓައިމްގެ ކުރީކޮޅު ކްރޮއޭޝިއާ އިން ފުލުފުލުގައި ފޮނުވާލި ބޯޅަތައް ދިފާއު ކުރުމުން ސިމޯން ހުރީ ކިހާ މޯޓިވޭޓް ވެފައިކަން އެނގެ އެވެ.
"އުނދަގޫ ހާލަތަށް ވެއްޓިފައި ހުންނަ މީހަކަށް ސަޕޯޓް ދޭނީ ކިހިނެއް؟،" ސުވަލު އުފައްދައި، ސްުޕެއިންގެ ފުޓްބޯލް ފެޑްރޭޝަންގެ ރައީސް ލުއިސް ރުބިއަލެސް ވިދާޅުވި އެވެ. "އެކަން ކުރާނެ ގޮތް ސްޕެއިންގެ ޓީމުން އެ ދައްކައި ދިނީ."
ސިމޯން އަކީ މަޑުމައިތިރި މިޒާޖުގެ ކުޅުންތެރިޔެކެވެ. ނަމަވެސް އޭނާ އަކީ ވަރަށް އަޒުމު ވަރުގަދަ މީހެއް ކަމަށް ބުސްކެޓްސް ބުންޏެވެ.
"އެންމެ މުހިންމު ކަމަކީ އެކަހަލަ ކަމެއް ދިމާވީމަވެސް އެނބުރި އައުން،" ބުސްކެޓްސް ވާހަކަ ދެއްކި އެވެ. "އަދި ހާއްސަކޮށް ފުޓްބޯޅައިގައި އުނައި އަށް އެ ދިމާވި ކަހަލަ ކަމެއް ކުރިމަތިވީ ނަމަވެސް އެންމެ މުހިންމު ކަމަކީ އެ ހާލަތުން އަރައި ގަތުން."
މެޗުގައި ސިމޯން އަތުން ހެދުނު ގޯހަކީ ދަނޑުގައި ތިބި ސަޕޯޓަރުން އޭނާއާ ދިމާލަށް ހުސްފުޅި އުކާވަރު ކަމެކެވެ. ނަމަވެސް މެޗު ނިމިގެން ސިމޯން ޖޯޒީ ސަޕޯޓަރުންގެ ތެރެއަށް އެއްލާލުމުން އެ ވެގެން ދިޔައީ ކޮންމެވެސް ސަޕޯޓަރެއްގެ ގެއަށް ގެންދިޔަ ކާމިޔާބުގެ ރަމްޒެއް ކަމުގަ އެވެ.
"މިކހަލަ ދެ ވަނަ ޗާންސެއް ލިބުމަކީ ވަރަށް ނުވާނެ ކަމެއް،" މުޅި ޓީމަށް އިޝާރާތްކޮށް އެންރީކޭ ބުންޏެވެ. ކްރޮއޭޝިއާގެ މައްޗަށް ދެ ލަނޑުގެ ލީޑެއްގައި އޮއްވައި ފަހު ވަގުތު ކްރޮއޭޝިއާ އިން މެޗު އެއްވަރު ކުރުމުން އެކްސްޓްރާ ޓައިމްގައި ސްޕެއިން އެނބުރި އައި ގޮތް ވެސް އެއީ އެންރީކޭގެ ވާހަކައިގެ އެއްބައެވެ.
ޔޫރޯގެ ފުރަތަމަ މެޗުގައި ސްވިޑެންއާ އެއްވަރުވި މެޗަށް ފަހު ސިމޯން ވަނީ ލުއިސް އެންރީކޭގެ ޓީމުގައި އޭނާގެ ދައުރު ފުޅާކޮށް ބުނެ ދީފަ އެވެ.
"ގޯލްކީޕަރުގެ ބޭނުމަކީ ހަމައެކަނި ބޯޅަ ސޭވްކޮށް ދިފާއު ކުރުމެއް ނޫން،" ސްވިޑެން މެޗަށް ފަހު ޔޫރޯގެ އޮފިޝަލް މީޑިއާއާ ވާހަކަ ދައްކަމުން ސިމޯން ބުންޏެވެ. "ޓީމުގެ ގޭމްގައި ހާއްސަކޮށް ލުއިސް އެންރިކޭގެ ގޭމްގައި، ޓީމުގެ ގޭމް ކުޅުވުމުގައި ކީޕަރުގެ ޒިންމާ ވަރަށް ބޮޑު."
އެތުލެޓިކް ކްލަބު ބިލްބާއޯއާ އެކު މިދިޔަ ސީޒަނުގައި ސިމޯން އަށް ނެރެވުނީ އޭނާ އެންމެ ބޭނުންވި ނަތީޖާއެއް ނޫނެވެ. ޗެމްޕިއަންސް ލީގުގެ ޖާގައަކަށް އަމާޒުކޮށްގެން ނުކުތް ޓީމަށް ލިބުނީ ލީގުގެ 10 ވަނަ އެވެ. ބިލްބާއޯގައި ވެސް ސިމޯން އަށް ގިނަ ގޯސްތަކެއް ހެނދުނެވެ. ނަމަވެސް، އެންރީކޭ އިތުބާރު ކޮށްފައި ބޮޑު މުބާރާތުގައި ފުލް ކީޕަރަކަށް ނެރުނީ ސިމޯން އެވެ.
އަންނަ މަހު ބާއްވާ އޮލިމްޕިކްސްގައި، ސްޕެއިންގެ އޮލިމްޕިކް ޓީމަށް ވެސް ސިމޯން ވަނީ މިހާރު ނަގައިފަ އެވެ. މިރޭ މީ އަނެއްކާ އޭނާ އަށް މުހިންމު ޓެސްޓެކެވެ. ޔޫރޯގެ ކުއާޓާ ފައިނަލުގައި ސްވިޒަލެންޑާ ދެކޮޅަށް ރާއްޖޭ ގަޑިން މިރޭ ނުވައެއް ޖާހައިރު ކުޅޭ މެޗެވެ. މިއީ ނުވަ އަހަރު ފަހުން ބޮޑު މުބާރާތެއްގެ ކުއާޓާ ފައިނަލް ހުރަސް ކުރުމަށް ސްޕެއިންއަށް ލިބޭ ފުރުސަތެވެ.