29 ޖޫން 2021 - 13:27
އެމިރޭޓްސްގައި ގާއިމުކޮށްފައިވާ ގުޅިފައިވާ ލަޝްކަރުގެ އަސްކަރީ މަރުކަޒުގައި ތިބި އިޓަލީ ވިލާތުގެ ސިފައިންނާއި އެ ގައުމުގެ އަސްކަރީ މަތިންދާބޯޓުތައް، އަންނަ ޖުލައި މަހުގެ ދެ ވަނަ ދުވަހުގެ ނިޔަލަށް އަނބުރާ ގެންދަން، އެމިރޭޓްސް ސަރުކާރުން އިޓަލީ ސަރުކާރަށް އަންގައިފި އެވެ.
އިޓަލީ ސަރުކާރުން އިއްޔެ ބުނި ގޮތުގައި އެމިރޭޓްސް ސަރުކާރުން މި ގޮތަށް އެންގީ، އެ ގައުމަށް ވިއްކުމަށް އިޓަލީން އެއްބަސްވެފައިވާ މިސައިލްތަކެއް ނުވިއްކަން، އިޓަލީ ސަރުކާރުން ނިންމުމާ ގުޅިގެންނެވެ. އަދި މި މައްސަލަ ސުލްހަވެރި ގޮތަކަށް ހައްލުކުރުމަށް މަސައްކަތް ކުރަމުން އަންނަ ކަމަށް ވެސް އިޓަލީ ސަރުކާރުން ބުނެ އެވެ.
އެމިރޭޓްސްގެ މިންހާދު ވައިގެ މަރުކަޒު ބޭނުންކުރަނީ، އިރާގާއި އަފްގާނިސްތާނު އަދި ހޯން އޮފް އެފްރިކާ (ޖިބޫޓީ، އެރިޓްރިއާ، އިތިއޮޕިޔާ، ސޯމާލިޔާ) ސަރަހައްދާއި އިންޑިއާ ކަނޑުގެ ސަރަހައްދުގައި ހިންގާ އަސްކަރީ ހަރަކާތްތަކުގައި ބައިވެރިވާ ގައުމުތަކުގެ ވައިގެ އަސްކަރީ މަރުކަޒެއްގެ ގޮތުގަ އެވެ.
އިޓަލީ ވިލާތުން 20000 މިސައިލް ގަތުމަށް އެމިރޭޓްސް އާއި އިޓަލީ ސަރުކާރާ ދެމެދު، 485 މިލިއަން ޑޮލަރުގެ އެއްބަސްވުމެއްގައި ސޮއިކުރީ 2016 ވަނަ އަހަރުގެ ތެރޭގަ އެވެ. މި އެއްބަސްވުމުގެ ދަށުން އެމިރޭޓްސް އަށް ވިއްކަން ހަމަޖެހިފައިވާ މިސައިލްތައް ނުވިއްކާނެ ކަމަށް އިޓަލީން ނިންމީ މިއަހަރުގެ ޖެނުއަރީ މަހުގެ ތެރޭގަ އެވެ.
އިޓަލީން އެގޮތަށް ނިންމީ ޔަމަންގެ ހަނގުރާމައިގައި، ސައޫދީ އަރަބިއްޔާއާ ގުޅިގެން އެމިރޭޓްސް ވެސް ބައިވެރިވާތީ އެވެ. އިޓަލީން ބުނި ގޮތުގައި، އެއްބަސްވުމުގައިވާ މިސައިލްތައް ނުވިއްކަން ނިންމީ، ޔަމަންގައި ސުލްހަ ގާއިމުކުރުމަށާއި އިންސާނީ ހައްގުތައް ރައްކާތެރިކުރުމަށް އިޓަލީން ނިންމާފައިވާ ނިންމުމާ ގުޅިގެންނެވެ.
ޔަމަންގެ ހޫތީ ހަނގުރާމަވެރިންނާ ދެކޮޅަށް ސައޫދީ އަރަބިއްޔާ އާއި އެމިރޭޓްސް އަދި އެހެން ބައެއް އަރަބި ގައުމުތައް ގުޅިގެން ކުރާ ހަނގުރާމައިގައި، ގިނަ އަދަދެއްގެ ކުޑަކުދިންނަށް ގެއްލުން ލިބެމުންދާ ކަމަށާއި އާންމުން ދިރިއުޅޭ ތަންތަނަށް ހަމަލާ ދޭ ކަމަށް ހުޅަނގުގެ ގައުމުތަކުން ތުހުމަތު ކުރެ އެވެ.
މިސައިލް ވިޔަފާރީގެ މައްސަލަ ހޫނުވެފައި ވަނިކޮށް، އިޓަލީ ވިލާތުން 40 ނޫސްވެރިން ގޮވައިގެން އަފްގާނިސްތާނަށް ދަތުރުކުރި އިޓަލީގެ އަސްކަރީ މަތިންދާބޯޓެއް، އެމިރޭޓްސްގެ ވައިގެ ސަރަހައްދުގެ ތެރެއަށް ވަނުމަށް އެމިރޭޓްސް އިން ވަނީ ދެކޮޅު ހަދައިފަ އެވެ. އެ ނޫސްވެރިން ގެންދަން ރާވާފައި އޮތީ، އެ ދުވަސްވަރު އިޓަލީގެ ދިފާއީ ވަޒީރު އަފްގާނިސްތާނަށް ކުރައްވާ ޒިޔާރަތުގެ ހަބަރުތައް ހެދުމަށެވެ.
ހޫތީންނާ ދެކޮޅަށް ސައޫދީ އަރަބިއްޔާ އިސްވެ 2015 ވަނަ އަހަރު އުފެއްދި އަސްކަރީ ގުޅުމުގައި ބައިވެރިވެ އެމެރިޓޭސްގެ އަސްކަރީ މަތިންދާބޯޓުތަކުން ވެސް ހޫތީންގެ މަގާމުތަކަށް ހަމަލާ ދީފައިވެ އެވެ. އެ ހަނގުރާމައިގައި އަމަލީ ގޮތުން ބައިވެރިވުން އެމިރޭޓްސް އިން ހުއްޓައިލީ 2019 ވަނަ އަހަރުގެ ތެރޭގަ އެވެ. ނަމަވެސް މިހާރު ވެސް ޔަމަން ސަރުކާރަށް އަސްކަރީ ހަތިޔާރު ފޮނުވުމާއި ޔަމަން ސަރުކާރުގެ ސިފައިން ތަމްރީން ކުރުމުގައި އެމިރޭޓްސް ބައިވެރިވެ އެވެ.
އެމެރިކާގެ ރައީސް ޖޯ ބައިޑެން ވެރިކަމާ ހަވާލުވެވަޑައިގަތުމާ އެކު، އެމެރިކާ އިން އެމިރޭޓްސް އާއި ސައޫދީ އަރަބިއްޔާ އަށް ހަތިޔާރު ވިއްކުމަށް ވެފައިވާ އެއްބަސްވުމާ އެއްގޮތަށް އަމަލުކުރުން މެދުކަނޑައިލި އެވެ. ނަމަވެސް، އެއްބަސްވެފައިވާ ގޮތަށް، އެމިރޭޓްސް އަށް 235 ބިލިއަން ޑޮލަރުގެ އަސްކަރީ ސާމާނު ވިއްކަން ނިންމާފައިވާ ކަމަށް، މިދިޔަ އެޕްރީލް މަހުގެ ތެރޭގައި އެމެރިކާގެ ގާނޫނު ހަދާ މަޖިލީހުގެ މެމްބަރުން ވިދާޅުވި އެވެ.
މިއެއްބަސްވުމުގެ ދަށުން އެމެރިކާ އިން އެމެރިކާ އަށް ވިއްކާ އަސްކަރީ ސާމާނުގެ ތެރޭގައި އެފް-35 މަރުކާގެ އަސްކަރީ މަތިންދާބޯޓާއި އަސްކަރީ ޑްރޯންތަކާއި އިތުރު އަސްކަރީ އާލާތްތައް ހިމެނެ އެވެ.