22 ޖޫން 2021 - 10:09
ހަނގުރާމަ އާއި ލޭއޮހޮރުވުންތަކުގެ ތެރޭގައި އޮތް އަފްގާނިސްތާނުގައި ސުލްހަ ގާއިމުކޮށް ހަމަޖެހުން ގެނައުމުގެ ނަމުގައި 20 އަހަރު ވަންދެން މަސައްކަތް ކުރުމަށް ފަހު، އެމެރިކާ ސިފައިން އެ ގައުމުން ފައިބައިގެން އެދަނީ ނާކާމިޔާބީއާ އެކުގައި ކަމަށް އަފްގާނިސްތާނުގެ ކުރީގެ ރައީސް ހާމިދު ކަރްޒާއީ އިއްޔެ ވިދާޅުވެއްޖެ އެވެ.
އެސޯސިއޭޓެޑް ޕްރެސް އަށް ދެއްވި އިންޓަވިއުއެއްގައި ކަރްޒާއީ ވިދާޅުވި ގޮތުގައި މީގެ 20 އަހަރު ކުރިން އެމެރިކާ ސިފައިން އަފްގާނިސްތާނަށް އަރައިގަނެ، ނާކާމިޔާބާއެކު ފައިބައިގެން އެދަނީ، ބޮޑު މުސީބާތެއް ފަހަތަށް ދޫކޮށްފަ އެވެ.
"ބައިނަލްއަގުވާމީ މުޖްތަމައު، މީގެ 20 އަހަރު ކުރިން މިގައުމަށް އައީ، ހަރުކަށިކަމާ ދެކޮޅަށް ހަނގުރާމަކޮށް، މި ގައުމަށް ހަމަޖެހުން ގެނެސްދިނުމުގެ ވަރަށް ސާފު މަގްސަދެއްގައި. އެކަމު މިގައުމުގައި ހަރުކަށިމން މިއަދު މިވަނީ އޭގެ އެންމެ ކުންނަށް ފޯރާފައި. އެހެންވީމާ އެމީހުން (އެމެރިކާ އާއި ނޭޓޯ) އެވަނީ ފެއިލްވެފައި."
އޭނާ ވިދާޅުވީ އަފްގާނިސްތާނު އޮތީ ވަރަށް ބޮޑު ނާކާމިޔާބެއްގެ ތެރޭގައި ކަމަށް އަފްގާނުގެ ހުރިހާ ރައްޔިތުން ވެސް ގަބޫލުކުރެ އެވެ.
"ނަމަވެސް ދުނިޔޭގެ އެންމެ ގަދަފަދަ އަސްކަރީ ބާރުތައް މިތަނަށް އަރައިގެން އެކުރީ ކޮން ކަމެއް؟ އެމީހުން މި ގައުމަށް ދޫކޮށްފައި އެ ދަނީ ކޮން އެއްޗެއް؟ އެމީހުން މިގައުމަށް ދޫކޮށްފައި އެދަނީ، ވަރަށް ބޮޑު ހުތުރަކާއި ބޮޑު މުސީބާތެއް،" ކަރްޒާއީ ވިދާޅުވި އެވެ.
އެމެރިކާ އިން ކުރި ހަނގުރާމައިގައި ތާލިބާނުންގެ ވެރިކަން ވައްޓައިލުމަށް ފަހު، އެ ގައުމުގެ ރައީސް ކަމަށް ކަރްޒާއީ އިންތިހާބުކޮށް، 13 އަހަރު ވަންދެން އަފްގާނިސްތާނުގެ ރައީސްގެ މަގާމުގައި ކަރްޒާއީ ހުންނެވި އެވެ.
އޭނާގެ ވެރިކަމުގައި އެންމެ ބޮޑަށް މަސައްކަތް ކުރެއްވީ އެމެރިކާ ސިފައިން އެ ގައުމުން ބޭލުމަށެވެ. އޭނާގެ އެ ސިޔާސަތުގެ ސަބަބުން، އެމެރިކާ އާއި ކަރްޒާއީއާ ދެމެދު ވަރަށް ބޮޑަށް ގުޅުން ގޯސްވެގެން ދިޔަ އެވެ.
ކަރްޒާއީ ވިދާޅުވީ އަފްގާނިސްތާނުގެ ހުރިހާ ރައްޔިތުންވެސް މިހާރު ތިބީ ގައުމުގައި ސުލްހަ ގާއިމުކުރަން ބޭނުންވެފަ އެވެ. އަދި އަފްގާނިސްތާނުގެ ކުރިމަގު އުޖާލާކުރުމުގެ ޒިންމާ އުފުލަން ތައްޔާރަށެވެ.
"އެމީހުން އަސްކަރީ ސިފައިންނާ ނުލައި އަހަރެމެންނަށް މާ ރަނގަޅުވާނެ. އަހަރެން ގަބޫލުކުރާ ގޮތުގައި އަހަރެމެންގެ ގައުމު ދިފާއުކުރަންވާނީ އަދި އަހަރެމެންގެ ފުރާނަތައް ހިމާޔަތް ކުރަންވާނީ ހަމަ އަހަރެމެން. އެމީހުންގެ ސިފައިން މިތަނުގައި ތިބެގެން އަހަރެމެންނަށް ލިބުނު އެއްޗަކީ މިހާރު ގައުމު ވެއްޓިފައި މި އޮތް ނުރައްކާތެރި ހާލަތު. މިހާރު އަހަރެމެންނަށް ކުރިމަތިވެފައި މިއޮތް މާޔޫސްކަމާއި އިހާނަތްތެރިކަމުގެ ތެރޭގައި ދެމިތިބޭކަށް އަހަރެމެން ބޭނުމެއް ނޫން. އެ މީހުން މިގައުމުން ފައިބައިގެން ދިޔުމަކީ އަހަރެމެންނަށް އެންމެ ރަނގަޅު ގޮތް،"
އެމެރިކާ ސިފައިން އަފްގާނިސްތާނަށް އަރައިގަތް އިރަށް ވުރެ، ތާލިބާނުންގެ ބާރު މިހާރު މާ ގަދަ ކަމަށް، އެގައުމު މަސްރަހު ދިރާސާކުރާ ފަރާތްތަކުން ބުނެ އެވެ. ވިހި އަހަރު ވަންދެން ތާލިބާނުންނާ ދެކޮޅަށް ހަނގުރާމަ ކުރުމަށް ފަހު، އެގައުމުން ފައިބަން އެމެރިކާ އިން ނިންމި އިރު، އެގައުމުގައި ތިބެގެން އެމެރިކާ އަށް ހާސިލުކުރެވުނު ކަމެއް ނެތެވެ.
ހާމިދު ކަރްޒާއީގެ ވެރިކަމުގެ ދުވަސްވަރު، އަފްގާނިސްތާނުގެ އިޖްތިމާއީ އަދި އިގްތިސާދީ ދާއިރާއަށް ހެޔޮ ބަދަލުތަކެއް ގެންނެވި އެވެ. އެ ގޮތުން އެންމެ ފާހަގަކޮށްލެވޭ ކަމަކީ، އަންހެން ކުދިންނަށް ސްކޫލްތަކަށް ދެވޭނެ ގޮތް ހަމަޖެހުމާއި، އަންހެނުންނަށް ވަޒީފާގެ ފުރުސަތުތައް ތަނަވަސްކޮށްދިނުމާއި، ހަނގުރާމައާ ދުރު ޒުވާން ޖީލެއް އުފެދުމެވެ. އޭގެ އިތުރުން ވެރިރަށް ކާބުލްގައި އުސް އިމާރާތްތައް ބިނާކޮށް ރަނގަޅު ފެންވަރަކަށް މަގުތައް ހަދައި ހައިވޭތައް ގާއިމުކުރުން ހިމެނެ އެވެ.