21 ޖޫން 2021 - 12:38
އީރާންގައި ކަރަންޓު ދިނުމަށް ބޭނުންކުރާ ހަމައެކަނި ނިއުކްލިއާ އިންޖީނުގެ ކުއްލި ގޮތަކަށް ނިއްވާލާފައިވާ ކަމަށް އީރާންގެ ރަސްމީ ޓީވީ ޗެނަލުން އިއްޔެ ބުނެފި އެވެ.
އީރާން ސަރުކާރާ ހަވާލާދީ ޓީވީން ބުނި ގޮތުގައި ވަގުތީ ގޮތުން އިންޖީނުގެ ނިއްވައިލީ ޓެކްނިކަލް މަރާމާތެއް ކުރަން ޖެހުމުންނެވެ. އީރާން ސަރުކާރުގެ ކަރަންޓު ހަކަތައާ ބެހޭ ކުންފުނީގެ އޮފިޝަލް ޣުލާމް އަލީ ރަކްޝަނީމެހެރް ވިދާޅުވީ ބޫޝެހެރްގައި ހުރި ނިއުކްލިއާ އިންޖީނުގެ ނިއްވައިލީ މިދިޔަ ހޮނިހިރު ދުވަހު ކަމަށާއި، މިހާރު ކުރަންޖެހިފައިވާ މަސައްކަތް ފުރިހަމަ ކުރުމަށްޓަކައި ހަތަރު ވަރަކަށް ދުވަހު އިންޖީނުގެ ނިއްވާލާފައި ބަހައްޓާނެ ކަމަށެވެ.
އެކަމުގެ ސަބަބުން، އީރާންގެ ބައެއް ސަރަހައްދުތަކަށް ކަރަންޓު ލިބުމުގައި ދަތިތަކެއް ކުރިމަތިވާނެ ކަމަށް ވެސް އޭނާ ވިދާޅުވި އެވެ. އިންޖީނުގެ ނިއްވައިލި ހަގީގީ ސަބަބަކީ ކޮބައިކަން އީރާން ސަރުކާރުން ހާމަ ނުކުރި ނަމަވެސް، މިއީ އެ އިންޖީނުގެ އިން ކަރަންޓު ދޭން ފެށި ފަހުން، ކުއްލި ގޮތަކަށް އިންޖީނުގެ ނިއްވައިލި ފުރަތަމަ ފަހަރެވެ.
ރަޝިޔާގެ އެހީތެރިކަމާ އެކު އީރާނުގައި ގާއިމް ކުރި ނިއުކްލިއާ އިންޖީނުގެ އިން ކަރަންޓު ދޭން ފެށީ 2011 ވަނަ އަހަރުގެ ތެރޭގަ އެވެ. މި އިންޖީނުގެ ގާއިމުކޮށްދިނުމުގެ އެއްބަސްވުމުގައިވާ ގޮތުން، ނިއުކްލިއާ ހަތިޔާރު ފެތުރުން މަނާކުރާ މުއާހަދާ އަށް އިހްތިރާމް ކުރުމުގެ ގޮތުގެ މަތިން، އީރާންގެ އިންޖީނުގޭގެ ރިއެކްޓަރުތަކުގައި ބޭނުންކޮށް ނިމިފައި ހުންނަ ފިއުލް ރޮޑްތައް އަނބުރާ ރަޝިޔާ އަށް ފޮނުވަންޖެހެ އެވެ.
އީރާންގެ ނިއުކްލިއާ އިންޖީނުގެ މި ނިއްވައިލީ، އިންޖީނުގޭގެ ރިއެކްޓަރުތައް ހުއްޓާލަން ޖެހިދާނެ ކަމަށް، އީރާންގެ ނިއުކްލިއާ މަޝްވަރާތަކާ ބެހޭ އޮފިޝަލް މަހުމޫދު ޖައުފަރީ، މިދިޔަ މާޗް މަހުގެ ތެރޭގައި ވިދާޅުވެފައި ވަނިކޮށެވެ. އެއީ، ނިއުކްލިއާ ރިއެކްޓަރުތައް ހިންގުމަށް ބޭނުންވާ ސްޕެއާ ޕާޓްތަކާއި އެހެން ސާމާނުތައް ރަޝިޔާ އިން ގަތުމުގައި ދަތިތަކެއް ކުރިމަތިވެފައިވާތީ އެވެ. އެ ދަތިކަން ކުރިމަތިވަނީ، އީރާންގެ ބޭންކުތަކާ ދެކޮޅަށް 2018 ވަނަ އަހަރުން ފެށިގެން އެމެރިކާ އިން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުންނެވެ.
ބޫޝެހެރްގައި ހުންނަ ނިއުކްލިއާ އިންޖީނުގެ ހިންގަނީ، ރަޝިޔާގައި އުފައްދާ ޔޫރޭނިއަމް ބޭނުންކޮށްގެންނެވެ.
އަދި އެ އިންޖީނުގޭގެ މަސައްކަތް ހިނގާ ގޮތް، ބައިނަލްއަގުވާމީ އެޓޮމިކް ހަކަތައާ ބެހޭ އިދާރާ (އައިއޭއީއޭ) އިން އަންނަނީ ބަލަމުންނެވެ. ނަމަވެސް، ކުއްލި ގޮތަކަށް އިންޖީނުގެ ނިއްވައިލި ސަބަބަކާ ބެހޭ ގޮތުން، އައިއޭއީއޭ އިން މިހާތަނަށް ވަކި އެއްޗެއް ނުބުނެ އެވެ.