20 ޖޫން 2021 - 10:28
ތަޅާފޮޅުންތަކާއި ސިޔާސީ އަދި އަސްކަރީ ކޯޅުންތައް ހިނގާ ސަރަހައްދުތަކުގައި، ކުޑަކުދިންގެ ހައްގުތަކަށް އަރައިގަންނަ ގައުމުތަކާއި ޖަމާއަތްތަކުގެ ކަޅު ލިސްޓުގައި، އިޒްރޭލު ނުހިމަނަން، އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ނިންމަވައިފި އެވެ.
މިދިޔަ ބުދަ ދުވަހު އާންމުކުރި 37 ސަފްހާގެ ރިޕޯޓްގައި، 2020 ވަނަ އަހަރުގެ ތެރޭގައި ހުޅަނގު އައްސޭރީގެ އިރުމަތީ ގުދުސްގަ އާއި ގާޒާ އަދި އިޒްރޭލުގައި، ކުޑަކުދިންނާ ދެކޮޅަށް ހިންގާފައިވާ އަނިޔާވެރި އަމަލުތަކުގެ ފުރިހަމަ މަސްއޫލިއްޔަތު، އިޒްރޭލު ސިފައިން އުފުލަންޖެހޭނެ ކަމަށް ބުނެފައިވެ އެވެ. އަދި 2020 ވަނަ އަހަރުގެ ތެރޭގައި، ހުޅަނގު އައްސޭރި އާއި ގާޒާގެ މަދަރުސާތަކަށާއި ހޮސްޕިޓަލްތަކަށް، އިޒްރޭލު ސިފައިންނާއި ޔަހޫދީ ވަޒަންވެރިން ހަމަލާ ދިނުމުގެ 30 ހާދިސާއެއް ރެކޯޑްކުރެވިފައިވާ ކަމަށް ވެސް އެ ރިޕޯޓްގައި ބުނެފައިވެ އެވެ.
ނަމަވެސް، ހަނގުރާމަ ހިނގާ ސަރަހައްދުތަކުގައި ކުޑަކުދިންގެ ހައްގުތައް ނިގުޅައިގަންނަ ގައުމުތަކުގެ ކަޅު ލިސްޓެއްގެ ގޮތުގައި ވަކި ގައުމުތަކެއް ފާހަގަކޮށްފައިވާ އިރު، އޭގެ ތެރޭގައި އިޒްރޭލު ހިމަނައިފައެއް ނެތެވެ. އޭގެ ބަދަލުގައި އެ ރިޕޯޓްގައި އިޒްރޭލަށް ގޮވާލާފައި އޮތީ، ހާލަތާ ނުބައްދަލު ބާރުގެ ބޭނުންކުރެވޭ ފަދަ ހާލަތެއް މެދުވެރިވިޔަ ނުދިނުމަށްޓަކައި، ބާރުގެ ބޭނުންކުރާ ގޮތުގެ އިޖުރާއާތުތައް އަލުން މުރާޖައާ ކުރުމަށެވެ.
އޭގެ އިތުރުން ބާރުގެ ބޭނުންކުރާ ހާލަތެއްގައި ކުޑަކުދިންނަށް ލިބޭ ގެއްލުން ކުޑަކުރުމަށާއި، ކުޑަކުދިންގެ ފުރާނަ ގެއްލޭ ހާލަތްތަކުގައި، އެކަންކުރާ ފަރާތްތައް ޒިންމާދާރުކުރެވޭކަން ކަށަވަރުކުރުމަށް ވެސް އެ ރިޕޯޓްގައި އިޒްރޭލަށް ގޮވާލާފައިވެ އެވެ. އަދި އަސްލު ވަޒަން ބޭނުންކޮށްގެން އާންމުންނަށް ހަމަލާ ދޭ ކޮންމެ ހާލަތެއްގައި، އެކަން ފުރިހަމަ އަށް ތަހުގީގުކުރުމަށް ވެސް އިޒްރޭލަށް ގޮވާލާފައިވެ އެވެ.
ކަޅު ލިސްޓުގައި އިޒްރޭލުގެ ނަން ހިމަނާފައި ނެތަސް، އިޒްރޭލުން ހައްޔަރުކުރާ ފަލަސްތީނުގެ ކުޑަކުދިންގެ މައްސަލަ އެ ރިޕޯޓްގައި ފާހަގަކޮށްފައިވެ އެވެ. އެ ގޮތުން، އިދާރީ ހައްޔަރުކުރުމުގެ ނަމުގައި ފަލަސްތީނުގެ ކުޑަކުދިން ޖަލަށް ލުމުގެ އަމަލުތައް ހުއްޓައިލުމަށާއި، ހައްޔަރުކޮށްފައި ތިބޭ އިރު، އެކުދިންގެ އުމުރާ ނުގުޅޭ ގޮތަށް މުއާމަލާތު ނުކުރުމަށާއި، އިޒްރޭލަށް ޖާސޫސްކޮށްދޭ ބައެއްގެ ގޮތުގައި، އެފަދަ ކުޑަކުދިން ތަމްރީން ނުކުރުމަށް ވެސް ގޮވާލާފައިވެ އެވެ.
ކުޑަކުދިންގެ ހައްގުތައް ނިގުޅައިގަންނަ ގައުމުތަކާއި ޖަމާއަތްތަކުގެ ކަޅު ލިސްޓުގައި، ޔަމަންގައި ހަނގުރާމަކުރާ ހޫތީ ހަނގުރާމަވެރިންގެ ނަން ހިމަނާފައިވެ އެވެ. އެއީ 2020 ވަނަ އަހަރުގެ ތެރޭގައި، އެ ޖަމާއަތުގެ ހަމަލާތަކުގެ ސަބަބުން، ޔަމަންގެ 250 އަށް ވުރެ ގިނަ ކުޑަކުދިން މަރުވެ ނުވަތަ ބޮޑެތި އަނިޔާތައް ލިބިފައިވާތީ އެވެ.
މީގެ އިތުރުން، މިޔަންމާ ސަރުކާރުގެ ސިފައިންނާއި، ސީރިޔާ ސަރުކާރުގެ ސިފައިން ވެސް، ކުޑަކުދިންގެ ހައްގުތައް ނިގުޅައިގަންނަ ގައުމުތަކާއި ޖަމާއަތްތަކުގެ ކަޅު ލިސްޓުގައި ހިމަނާފައިވެ އެވެ. އދ.ގެ ސެކްރެޓަރީ ޖެނެރަލްގެ ރިޕޯޓްގައި ބުނެފައިވާ ގޮތުގައި، ހަމަނުޖެހުން ހިނގާ ސަރަހައްދުތަކުގައި ކުޑަކުދިންގެ ހައްގުތައް ނިގުޅައިގަތުމާއި، ކުޑަކުދިންނަށް ޖިސްމާނީ ބޮޑެތި އަނިޔާތައް ދިނުމުގެ ހާދިސާތައް، 2019 ވަނަ އަހަރާ އަޅައި ބަލާއިރު، 2020 ވަނަ އަހަރުގެ ތެރޭގައި މަދުވެފައި ވިޔަސް، އެމައްސަލަ އަދިވެސް އޮތީ ކަންބޮޑުވާންޖެހޭ ދަރަޖައެއްގަ އެވެ.