18 ޖޫން 2021 - 16:25
ކޮލަމްބޯ (ޖޫން 18) - ކޮރޯނާވައިރަހުގެ ޑެލްޓާ ވޭރިއަންޓް ސްރީ ލަންކާގެ ވެރިރަށް ކޮލަމްބޯ އިން ފެނިއްޖެ ކަމަށް އެ ގައުމުގެ ސިއްހީ އޮފިޝަލުން ބުނެފި އެވެ.
ހަލުވިކަމާ އެކު ފެތުރޭ ވޭރިއަންޓް B.1.617.2 އެންމެ ފުރަތަމަ ފެނިފައި ވަނީ އިންޑިއާ އިންނެވެ.
ސްރީ ޖަޔަވަރްދަނީ ޔުނިވާސިޓީގެ އެލާޖީ، އިމިއުނިޓީ އެންޑް ސެލް ބަޔޮލޮޖީ ޔުނިޓުގެ ޑިރެކްޓަ ޖެނެރަލް، ޑރ. ޗަންދިމާ ޖީވަންދަރަ ވިދާޅުވީ B.1.617.2 ނުވަތަ ޑެލްޓާ ކޮވިޑް ވައިރަހުގެ ފަސް މީހަކު ކޮލަމްބޯގެ ޑެމަޓަގޮޑާ އޭރިއާ އިން ފެނިފައިވާ ކަމަށެވެ. މިއީ ޑެލްޓާ ވޭރިއަންޓް ކޮލަމްބޯ އިން ފެނުނު ފުރަތަމަ ފަހަރު ކަމަށް ވެސް އޭނާ ވިދާޅުވި އެވެ.
ޑރ. ޖީވަންދަރަ ވިދާޅުވީ B.1.617.2 އަކީ B117 ނުވަތަ އަލްފާ އަށް ވުރެ 50 ޕަސެންޓް ހަލުވިކޮށް ފެތުރޭ ވޭރިއަންޓެއް ކަމަށެވެ. އޭނާ ވިދާޅުވީ ވެކްސިންގެ އެއް ޑޯޒުން ޑެލްޓާ ވޭރިއަންޓް ކޮންޓްރޯލް ނުވާނެ ކަމަށެވެ. އަލްފާ ނުވަތަ ބްރިޓިޝް ވޭރިއަންޓް ވަނީ ކޮލަމްބޯ 6، ކޮލަމްބޯ 8، ކޮލަމްބޯ 10، ބަޓިކަލޯ އަދި ގޯލްގެ ކަރަޕިޓިޔާ އިން ފެނިފަ އެވެ.
ލަންކާ އިން މިހާތަނަށް ވަނީ 233,064 މީހުން ކޮރޯނާވައިރަހަށް ޕޮޒިޓިވްވެ 2,425 މީހުން މަރުވެފަ އެވެ. މި ދުވަސްވަރު ދަނީ ކޮންމެ ދުވަހަކު ވެސް ދެހާހުން މަތިން ޕޮޒިޓިވްވަމުންނެވެ.