16 ޖޫން 2021 - 01:29
ބުޑަޕެސްޓް (ޖޫން 15) - ޔޫރޯ ފުޓްބޯޅަ މުބާރާތުގެ ތާރީހްގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑް ޕޯޗަގަލްގެ ކެޕްޓަން ކްރިސްޓިއާނޯ ރޮނާލްޑޯ މުގުރާލި މެޗުގައި، ހެންގޭރީގެ ސަޕޯޓަރުންނާއެކު ފުލް ހައުސް ދަނޑެއްގައި ކުޅެ ޕޯޗްގަލްއިން ހަންގޭރީގެ މައްޗަށް 3-0 އިން މޮޅުވެއްޖެ އެވެ.
ރޮނާލްޑޯ ރެކޯޑް ހެދީ އެ ޓީމަށް ލިބުނު ޕެނަލްޓީން ކާމިޔާބު ކުރި ލަނޑުންނެވެ. ޔޫރޯގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑް މީގެ ކުރިން އޮތީ ފްރާންސްގެ ކުރީގެ ތަރި އަދި ޔޫއެފާގެ ކުރީގެ ރައީސް މިޝޭލް ޕްލެޓްނީގެ އަތުގަ އެވެ. މިރޭ ރޮނާލްޑޯ ކާމިޔާބު ކުރި ދެ ލަނޑާއެކު އޭނާ ވަނީ ޔޫރޯގެ ތާރީހްގައި 11 ލަނޑު ޖަހައިފަ އެވެ. ޕްލެޓްނީ ޖަހައިފައި ވަނީ ނުވަ ލަނޑެވެ. މެޗުގައި ޕޯޗްގަލްގެ ފުރަތަމަ ލަނޑު ކާމިޔާބު ކުރީ ރަފޭލް ގުރޭރޯ އެވެ.
ބުޑަޕެސްޓްގެ ޕުސްކަސް އެރީނާއަށް ދަނޑު ފުރެންދެން ސަޕޯޓަރުން ވަނުމުގެ ހުއްދަ ހަންގޭރީގެ ސަރުކާރުން ވަނީ ދިފަ އެވެ. މިއީ ކޮވިޑްގެ ހާލަތުގައި ދަނޑަށް ސަޕޯޓަރުން މަދުން ވެއްދުން ޔޫއެފާއިން ނިންމާފައި ވަނިކޮށް ފުލް ދަނޑެއްގައި މެޗު ކުޅުނު ފުރަތަމަ ފަހަރެވެ. ދަނޑަށް 67،000 އަށް ވުރެ ގިނަ ސަޕޯޓަރުން ވަނުމުގެ ހުއްދަ ހަންގޭރީން ދިނެވެ.
މިފަހަރުގެ ޔޫރޯގެ މެޗުތައް ކުޅޭ އެންމެ ބޮޑު ސްޓޭޑިއަމް، ލަންޑަންގެ ވެމްބްލީ ސްޓޭޑިއަމްއަށްވެސް ވައްދާފައި ވަނީ 18،500 ސަޕޯޓަރުންނެވެ.
ފުރަތަމަ ހާފުގައި، ހަންގޭރީ ކުޅެމުން ދިޔައީ މުޅި ޓީމު އަމިއްލަ ހާފުގެ ތެރޭގައި ތިބެގެން ޑިފެންސްކޮށް ކައުންޓަ އޭޓްކް ފުރުސަތުތަކުގައި ހަމަލާ އުފައްދާ ގޮތަށެވެ. އެހެންނަމަވެސް ފުރަތަމަ ހާފުގައި އެ ޓީމަށް ފޮނުވައިލެވުނީ ޕޯޗްގަލްގެ ކީޕަރު ރުއީ ޕެޓްރީޝިއާ ޓެސްޓް ކޮށްލޭވޭވަރުގެ އެންމެ ބޯޅައެކެވެ.
އެ ހާފުގައި ޕޯޗްގަލްއިން ގިނަ ހަމަލާތަކެއް އުފެއްދި އެވެ. އެ ޓީމުން އެންމެ ރަނގަޅު ފުރުސަތެއް ލިބުނީ، ކެޕްޓަން ރޮނާލްޑޯ އާއި ޑިއޭގޯ ޖޯޓާ އަށެވެ. މެޗުގެ 42 ވަނަ މިނެޓްގައި ޕޯޗްގަލްއިން ނެގި ހުރަސް ރޮނާލްޑޯ އޭރިއާ ތެރެއަށް އަރައި ފޮނުވާލި ބޯޅަ ދިޔައީ ހުރަސް ދަނޑި މަތިން ބޭރަށެވެ. އޭގެ ކުރިން ޖޯޓާއަށް ލިބުނު ބޯޅަ ފޮނުވާލުމުން މެޗުގައި ރަނގަޅު ސޭވްތަކެއް ކުރި ހަންގޭރީގެ ކީޕަރު ޕީޓާ ގުލާޗީ ދިފާއު ކުރީ އެވެ.
ދެ ވަނަ ހާފުގައި، ހަންގޭރީން ކުރިއަށް ޖެހި ޕޯޗްގަލްގެ ފަހަތަށް ބާރު ބޮޑު ކުރި އެވެ. ހަންގޭރީ ހަމަލާ އުފައްދަން ފެށުމުން އެ ގައުމުގެ ސަޕޯޓަރުންގެ އަޑު ސްޓޭޑިއަމްގައި އުތުރި އަރައިގެން ދިޔަ އެވެ. ސަޕޯޓަރުންގެ އަޑު މަޑުވުމުން ހަންގޭރީގެ ކެޕްޓަން އެޑަމް ސަލާއި އަތުން އިޝާރާތްކޮށް ވަނީ ސަޕޯޓަރުން ފޯރި ނެގުމަށް ހިތްވަރު ދީފަ އެވެ.
ދެ ވަނަ ހާފުގައި ރޯލެންޑް ޝަލާއި އާއި ކެޕްޓަން އެޑަމްގެ ހަމަލާތަކުން ޕޯޗްގަލްގެ ޑިފެންސް ފެނުނީ ބިޒީކޮށެވެ. އެ ހާފުގައި ޕޯޗަގްލައިން އެންމެ ރަނގަޅު ފުރުސަތު ލިބުނީ ބުރުނޯ ފެނާންޑޭޒް އަށެވެ. އޭނާއަށް ވަނީ ރަނގަޅު ދެ ފުރުސަތު ލިބިފަ އެވެ.
މެޗުގެ 79 ވަނަ މިނެޓްގައި ހަންގޭރީއަށް ލަނޑެއް ޖެހުނު ކަމަށް އެ ޓީމަށް ހީކުރެވުނެވެ. އެ ޓީމުގެ ޒާބޯކް ޝޯންއަށް ލަނޑެއް ޖަހައި އުފާފަޅު ކުރިނަމަވެސް ލައިސްމަން ވަނީ އޮފްސައިޑް ކަމަށް ދިދަ ނަގައިފަ އެވެ.