12 ޖޫން 2021 - 01:03
ވޯލްޑް ކަޕް ކޮލިފިކޭޝަންގައި، ޗައިނާއާ ދެކޮޅަށް ކުޅުނު ދެ ވަނަ މެޗުން ވެސް 5-0 އިން ރާއްޖެ ބަލިވެއްޖެ އެވެ.
ވޯލްޑް ކަޕް ކޮލިފިކޭޝަންގެ ގުރޫޕް އޭ ގައި ޗައިނާއާ ދެކޮޅަށް ރާއްޖޭގައި 2019 ގައި ކުޅުނު މެޗުގައި ވެސް ރާއްޖެ ބަލިވީ 5-0 އިންނެވެ. މިއީ ޔޫއޭއީގައި މިހާރު ކުރިއަށްދާ ކޮލިފިކޭޝަންގައި ރާއްޖެ ކުޅުނު ދެ ވަނަ މެޗެވެ. ފުރަތަމަ މެޗުގައި ސީރިއާ އަތުން ބަލިވީ 4-0 އިންނެވެ.
ސީރިއާ މެޗާ ހިލާފަށް. މިރޭ ޗައިނާއާ ދެކޮޅަށް ކުޅުނު މެޗުގައި ރާއްޖޭގެ ކުޅުން ރަނގަޅެވެ. ޓީމުގެ މިޑްފީލްޑުން ރަނގަޅު މަސައްކަތެއް ކުރިތަން ފެނުނެވެ. ފުރަތަމަ ހާފުގައި ހަމްޒާ މުހައްމަދު (ހަމްޕް) އަށް ވަނީ ނުރައްކާ ކުރަން ރަނގަޅު ފުރުސަތެއް ލިބިފަ އެވެ. އޭނާ ފޮނުވާލި ބޯޅަ ޗައިނާގެ ކީޕަރު ޔޭން ޖުންލިން ދިފާއުކޮށް ކޯނަރަކަށް ބޭރުކޮށްލީ އެވެ.
ޗައިނާގެ ފުރަތަމަ ލަނޑު، މެޗު ފެށިގެން ހަ ވަނަ މިނެޓްގައި ކާމިޔާބުކުރީ ލިއު ބިންބިން އެވެ. އެ ޓީމުގެ ދެ ވަނަ ލަނޑު އެސްޕަނިޔޯލްގެ ފޯވަޑް ވޫލީ ކާމިޔާބުކުރީ، ބޯޅައަށް ހުސްކޮށް އަރައި ރާއްޖޭގެ ކީޕަރު މުހައްމަދު ފައިސަލް ކަޓުވާލުމަށް ފަހު އެވެ.
ދެ ވަނަ ހާފުގައި، ރާއްޖޭގެ ކުޅުންތެރިންގެ ކުޅުން ރަނގަޅު ވި އެވެ. ނަމަވެސް ޓީމުގެ ޑިފެންސުން ހަދަމުން ދިޔަ މިސްޓޭކްތައް ރަނގަޅު ނުކުރެވުމުގެ ނަތީޖާއަކަށްވީ ޗައިނާއިން މެޗުގެ ސްކޯ ފުޅާ ކުރުމެވެ. ޗައިނާގެ ތިން ވަނަ ލަނޑު ޖެހީ އެލަން ޑަގްލަސް އެވެ. އޭގެ ދެ މިނެޓް ފަހުން ޒެހޭންގް ޔުނިން ވަނީ ޗައިނާއަށް ހަތަރު ވަނަ ލަނޑު ޖަހައިދީފަ އެވެ. ޗައިނާގެ ފަސް ވަނަ ލަނޑު 80 ވަނަ މިނެޓްގައި ކާމިޔާބު ކުރީ ޓޭން ލޯންގް އެވެ.
ދުބާއީގައި ކުޅުނު ފުރަތަމަ މެޗުގައި، ކޮވިޑް ޖެހިގެން ބައިވެރި ނުވެވުނު، އަލީ އަޝްފާގް (ދަގަނޑޭ) ވަނީ މެޗުގެ ފަހު ކޮޅު ކުޅެން ނުކުމެފަ އެވެ.
ދުބާއީގައި ކުރިއަށްދާ ކޮލިފައިންގައި ރާއްޖެ ކުޅޭ އެންމެ ފަހު މެޗުގައި ނުކުންނާނީ ފިލިޕީންސާ ދެކޮޅަށެވެ. އެ މެޗު އޮންނާނީ އަންނަ އަންގާރަ ދުވަހު އެވެ. މިގުރޫޕްގެ އެއް ވަނަ މަގާމު ޔަގީންކޮށް ސީރިއާއިން ވަނީ އަނެއް ބުރަށް ދަތުރު ކޮށްފަ އެވެ. ރާއްޖެ އާއި ޗައިނާ މިރޭ ކުޅުނު މެޗުގެ ކުރިން ޕިލިޕީންސް ވަނީ ގުއާމްގެ މައްޗަށް 3-0 އިން ކުރި ހޯދައިފަ އެވެ.