08 ޖޫން 2021 - 14:10
ބޮޑު ޗުއްޓީއަށް އިންޑިއާއަށް ދާން ބޭނުންވާ އެ ގައުމުގެ ޓީޗަރުންނަށް އިތުރު ފްލައިޓުތައް ބާއްވަން މޯލްޑިވިއަން އިން ނިންމައިފި އެވެ.
އެ ކުންފުނިން ބުނީ ޗުއްޓީއާ ދިމާކޮށް ދެ ދުވަހަކު އިންޑިއާގެ ދެ މަންޒިލަކަށް ދަތުރުކުރާނެ ކަމަށެވެ. އެއީ މި މަހުގެ 18 ވަނަ ދުވަހު ކޮޗިންއަށް އަދި 19 ވަނަ ދުވަހު ޓްރިވެންޑްރަމަށެވެ.
މި ފްލައިޓުތައް ޓީޗަރުންނަށް ހާއްސަކުރި ނަމަވެސް ބޭސްފަރުވާއަށް އިންޑިއާއަށް ދާން ބޭނުންވާ ދިވެހިންނަށް ވެސް ދަތުރުކުރެވޭނެ ކަމަށް މޯލްޑިވިއަން އިން ބުންޏެވެ.
ސްކޫލް ބޮޑު ޗުއްޓީ ފެށޭނީ މި މަހުގެ 24 ވަނަ ދުވަހުން ފެށިގެންނެވެ. މިއަހަރުގެ ދިރާސީ އާ އަހަރު ފަށާނީ އަންނަ އޮގަސްޓް މަހުގެ 10 ވަނަ ދުވަހު އެވެ.
ދެކުނު އޭޝިއާގައި ކޮވިޑް-19 ފެތުރުމާ ގުޅިގެން އެ ސަރަހައްދުގެ ގައުމުތަކުން ޓޫރިސްޓުން ރާއްޖެ އައުން ވަނީ މަނާކޮށްފަ އެވެ. ނަމަވެސް އެ ގައުމުތަކުގައި ތިބި ދިވެހިންނަށާއި ވޯކް ވިސާގައި އަންނަ މީހުންނަށް ކަރަންޓީން ވާން ޖެހޭގޮތަށް ރާއްޖެ އާދެވޭނެ އެވެ.