02 ޖޫން 2021 - 14:14
އިޒްރޭލުން 2006 ވަނަ އަހަރުން ފެށިގެން ހިސޯރުކޮށްފައި އޮތް ގާޒާގެ ހިސޯރު ދޫކޮށްލުމަށް، ޔޫރަޕިއަން ޔޫނިއަނުން އިޒްރޭލަށް ގޮވާލައިފި އެވެ.
ފަލަސްތީނަށް ކަނޑައަޅާފައި ހުންނަ އީޔޫގެ މަންދޫބު ކުއެން ވޯން ގާޒާ އަށް ޒިޔާރަތް ކުރައްވައި ނޫސްވެރިންނާ ވާހަކަ ދައްކަވަމުން ވިދާޅުވީ، ގާޒާ އާރާސްތުކުރުމުގެ މަސައްކަތަށް އެއްވެސް ޝަރުތެއް އޮވެގެން ނުވާނެ ކަމަށެވެ. ނަމަވެސް ގާޒާ އާރާސްތުކުރުމުގެ މަސައްކަތް ކުރިއަށް ދާއިރު، ގާޒާގެ ހިސޯރު ދޫކޮށްލުމަކީ ވަރަށް މުހިންމު ކަމެއް ކަމަށް އޭނާ ވިދާޅުވި އެވެ.
އޭގެ އިތުރުން، ފަލަސްތީނުގެ ލީޑަޝިޕް އެއްގަލަކަށް އެރުން ވެސް ވަރަށް މުހިންމު ކަމަށް އޭނާ ވިދާޅުވި އެވެ. އޭނާ އެ އިޝާރާތް ކުރެއްވީ، ފަލަސްތީނުގެ ސަރުކާރު ހުޅަނގު އައްސޭރީގައި އޮތް އިރު، ގާޒާގައި ހަމާސްގެ ވެރިކަމެއް ހިނގަމުންދާތީ އެކަމަށް އިޝާރާތް ކުރައްވަ އެވެ.
އީޔޫގެ މަންދޫބު ކުއެން ވޯން ވިދާޅުވި ގޮތުގައި އެ ޖަމާއަތުން މިވަގުތު އެންމެ މުހިންމު ކަމެއް ދެނީ، ގާޒާއަށް ލިބިފައި ހުރި ގެއްލުންތައް ބަލައި އަންދާޒާކުރުމަށެވެ. އަދި ގާޒާގެ ރައްޔިތުންނަށް މިވަގުތަށް އެންމެ ބޭނުންވާ އެހީތެރިކަން ފޯރުކޮށްދޭނެ ކަމަށް ވެސް އޭނާ ވިދާޅުވި އެވެ.
އެހެން ނަމަވެސް، އޭނާ ވިދާޅުވި ގޮތުގައި ގާޒާ އާރާސްތުކުރުމުގެ މަސައްކަތް އެންމެ ފުރިހަމަ ގޮތުގައި ކުރިއަށް ގެންދެވޭނީ، ގާޒާގެ ހިސޯރު ދޫކޮށްލައިގެންނެވެ. ގާޒާ އާރާސްތުކުރުމުގެ މަސައްކަތުގައި އުޅޭ މީހުންނަށް، ގާޒާގެ ތެރޭގައި ދަތުރުފަތުރުކޮށް އުޅުމުގެ ފުރިހަމަ މިނިވަންކަމާއި، ގާޒާގައި ވިޔަފާރީގެ ހަރަކާތްތައް ވެސް ކުރިއަށް ގެންދިޔުމުގެ މިނިވަންކަން ލިބޭނީ ވެސް، ހިސޯރު ނިމުމަކަށް އައުމުން ކަމަށް އޭނާ ވިދާޅުވި އެވެ.
އޭގެ އިތުރުން، މެދުއިރުމަތީގައި ސުލްހަ ގާއިމުކުރުމަށްޓަކައި ފަލަސްތީނު-އިޒްރޭލު މައްސަލަ އަށް ސުލްހަވެރި ހައްލެއް ހޯދުން ވެސް ވަރަށް މުހިންމު ކަމަށް އީޔޫގެ މަންދޫބު ކުއެން ވޯން ވިދާޅުވި އެވެ. ހަމަ އެއާއެކު، ހަމަލާ ބަދަލުކުރުން ހުއްޓައިލުމަށް ދެ ފަރާތުން ނިންމި ނިންމުން އެ ގޮތުގައި ދެމެހެއްޓުން ވެސް، ގާޒާ އާރާސްތުކުރުމަށްޓަކައި ވަރަށް މުހިންމު ކަމަށް އޭނާ ވިދާޅުވި އެވެ.
ހުސްވި މެއި މަހުގެ 10 ވަނަ ދުވަހުން ފެށިގެން 11 ދުވަސް ވަންދެން އިޒްރޭލުން ގާޒާއަށް ދިން ހަމަލާތައް ހުއްޓައިލީ، މިސްރާއި އެމެރިކާ މެދުވެރިވެގެން އިޒްރޭލާއި ހަމާސް ޖަމާއަތާ ދެމެދު ދެކެވުނު ވާހަކަތަކަށް ފަހު އެވެ.