01 ޖޫން 2021 - 11:53
ރާއްޖޭގެ އެއްވެސް ކުޅިވަރަކުން މެޗު އޮފިޝަލުން ތަމްރީން ނުކުރާ މިންވަރަށް، ވީއޭއެމްއިން ވޮލީ ރެފްރީން ތަމްރީން ކުރި އެވެ. ވީއޭއެމް ރެފްރީޒް ކޮމިޝަންގެ ޗެއާމަންކަމަށް ދެ ވަނަ ފަހަރަށް އިންތިހާބުވި، އަހްމަދު ނަޝީދު (ތުއްތުކޯ) ޔަގީންކަމާ އެކު ވިދާޅުވީ، އެންމެ ގިނަ މެޗު އޮފިޝަލުން ތަމްރީންކުރި އެއް ކުޅިވަރަކަށް ވޮލީ ވާނެ ކަމަށެވެ.
ކުނޑި އަހްމަދު ސަލީމްމެން ފަދަ ބައެއް ސީނިއާ ރެފްރީންނަށް ރަށްރަށުން ލިބުނު ދައުވަތުތަކުގައި އަމިއްލަ ހައިސިއްޔަތުން ގޮސް ރެފްރީން ތަމްރީން ކުރުމުގެ ޕްރޮގްރާމްތައް ވަނީ ހިންގައިފަ އެވެ. އޭނާ އަކީ ވެސް ރެފްރީޒް ކޮމިޝަންގެ މެންބަރެކެވެ.
އަތޮޅުތެރޭގައި ގިނަ އަދަދެއްގެ ރެފްރީން ތިބިއިރު އަތޮޅުތެރޭގައި މުބާރާތެއް ބޭއްވިއަސް ރެފްރީން ގެންދަނީ މާލެއިންނެވެ. އަތޮޅުތެރޭގައި ގިނަ ރެފްރީން އަތްއުރާލައިގެން ތިބީ އެވެ.
ތުއްތުކޯގެ ރެފްރީޒް ކޮމިޝަނުން އެންމެ ފުރަތަމަ ކުރާނެ އެއް މަސައްކަތަކީ، ތަމްރީން ވެފައި ތިބި ރެފްރީން އެކްޓިވް ނުވާ މައްސަލަ ދެނެގަތުމެވެ.
"އާ ރެފްރީން ތަމްރީންކުރުމުގެ އިތުރަށް އަޅުގަނޑުމެން އެންމެ ފުރަތަމަ ބަލަންޖެހޭ ކަންތަކުގެ ތެރެއިން އެއް ކަންތައް އެއީ،" "މިހާރު" އަށް ތުއްތު ވިދާޅުވި އެވެ.
"ތަމްރީން ވެފައި ތިބި ރެފްރީންނަށް އިތުރު ތަމްރީން ޕްރޮގްރާމްތައް ފޯރުކޮށް ދެވޭނީވެސް ރެފްރީން އެކްޓިވް ވެގެން. އެހާ ބައިވަރު ރެފްރީން ތަމްރީން ވެފައި ތިބި އިރު ވެސް އެކްޓިވް ރެފްރީން މަދުވަނީ ކީއްވެތޯ ބަލަން އެބަޖެހޭ.
ރެފްރީން އެކްޓިވް ނުވުމުގައި އެކި ސަބަބުތައް ހުރެ އެވެ. އަތޮޅުތެރޭގައި ބާއްވާ މުބާރާތްތަކުގައި، އެ ސަރަހައްދުގައި ތިބި ރެފްރީންގެ ބަދަލުގައި މުބާރާތް އިންތިޒާމުކުރާ ފަރާތުން ވެސް، މާލެއިން ރެފްރީން ގެންދިއުމަކީ އެއް މައްސަލައެވެ. ތ. އަތޮޅަކީ އެންމެ ގިނަ ވޮލީ މުބާރާތްތައް ބާއްވާ އެއް އަތޮޅެވެ. ނަމަވެސް އެ އަތޮޅުގައި ބާއްވާ ގިނަ މުބާރާތްތަކަށް ވެސް ރެފްރީން ގެންދަނީ މާލެއިންނެވެ.
އެ އަތޮޅު ރެފްރީއަކު ބުނީ ރެފްރީސް ކޮސް ހެދިތާ 10 އަހަރު ވީރުވެސް ފުރުސަތު ލިބިފައި ވަނީ މަދު މުބާރާތްތަކުން ކަމަށެވެ.
"އަދިވެސް ގިނަ ރެފްރީން މި ގެންނަނީ މާލެއިން،" އޭނާ ބުންޏެވެ.
"ބޮޑު ޗުއްޓީ އަކީ ގިނަ މުބާރާތްތަކެއް އެއް ދުވަސްވަރެއްގައި ބާއްވާ ވަގުތެއް. އެ ދުވަސްތަކުގައި މަޝްހޫރު ރެފްރީން ހޯދަން އުނދަގޫވެއްޖެ ނަމަ އެފަދަ ހާލަތެއްގައި ފުރުސަތު ލިބިދާނެ."
ތުއްތުކޯ ވިދާޅުވީ ރެފްރީން އެކްޓިވް ނުވެ ތިބީ އެސޯސިއޭޝަންގެ މައްސަލައަކުން ކަމަށް ވެސް ވެދާނެ ކަމަށެވެ.
"ފަހަރެއްގައި ވެދާނެ އެސޯސިއޭޝަންގެ މައްސަލައަކުން ކަމަށް ވެސް ނޫނީ އެވަރަށް މުބާރާތްތަކުން ފުރުސަތު ނުލިބުނީ ކަމަށް ވެސް،" އޭނާ ވިދާޅުވި އެވެ. "އެސޯސިއޭޝަންގެ ފަރާތުން ހުރި ކަންތައްތައް ހައްލު ކުރުމަށް އަޅުގަނޑުމެން މަސައްކަތް ކުރާނަން."
އަތޮޅުތަކުގައި ތިބި ވޮލީ ރެފްރީން އެކްޓިވް ކުރުމަށް، ވީއޭއެމްގެ ރައިސް މުހައްމަދު ރަނޭޝް ވިސްނުން ގެންގުޅުވާ؛ މުޅި ރާއްޖެ ފަސް ޒޯނަކަށް ބަހާލުމުގެ ޕްލޭންގެ ތެރެއިން ހައްލު ހޯދޭނެ އެވެ. އެ ޒޯނެއްގައި ބާއްވާ މުބާރާތްތަކުގައި ރެފްރީކަން ކުރުމުގެ ފުރުސަތު އެ ޒޯނަކަށް ނިސްބަތްވާ ރެފްރީންއަށް އޮންނަ ގޮތަށް އިންތިޒާމުތައް ހަމަޖެއްސުމަކީ މުހިންމު ކަމެވެ. ރަނޭގެ ޕްލޭންގައި އަތޮޅުތެރޭގައި ރަސްމީ ގިނަ މުބާރާތްތަކެއް ބޭއްވުމުގެ ވިސްނުން ގެންގުޅުވަ އެވެ.