30 މެއި 2021 - 19:49
އިނގިރޭސި ވިލާތުގެ ބޮޑުވަޒީރު ބޮރިސް ޖޯންސަން، އޭނާ އެންގޭޖްވެވަޑައިގެން އުޅުއްވި، ކެރީ ސީމޯންޑްސްއާ އިއްޔެ ކާވެނި ބައްލަވައިގެންފި އެވެ.
ބޮޑުވަޒީރުގެ ރަސްމީ ގެކޮޑު "ޑައުނިން ސްޓްރީޓް 10"ގެ ތަރުޖަމާނު ވިދާޅުވި ގޮތުގައި ދެ ބޭފުޅުންގެ ކާވެނީގެ ކަންތައް އޮތީ، ވެސްޓްމިންސްޓާ ފައްޅީގައި ބޭއްވި ވަރަށް ކުޑަ ރަސްމިއްޔާތެއްގަ އެވެ. ނަމަވެސް މިއަހަރުގެ ހޫނު މޫސުމުގައި، ދެ ފަރާތުގެ އާއިލާގެ މީހުންނާ އެކު، ދެ ބޭފުޅުން ކާވެނީގެ އުފާ ފާހަގަކުރުން އޮންނާނެ އެވެ.
މިއީ އިނގިރޭސި ވިލާތުގެ ތާރީޚުގައި، ގާތްގަނޑަކަށް މިދިޔަ 200 އަހަރުގެ ތެރޭގައި، މަގާމުގައި ހުންނެވި ބޮޑުވަޒީރަކު ކާވެނި ބައްލަވައިގެންނެވި ފުރަތަމަ ފަހަރެވެ. ދެ ބޭފުޅުންގެ ކާވެނީގެ ރަސްމިއްޔާތަށް ވަގުތު ކުޑަތަންވެފައި ވަނިކޮށް، ދައުވަތު ދެއްވީވެސް އެންމެ 30 ބޭފުޅުންނަށެވެ. އެއީ ވެސް އެ ކާވެނީގެ ކަންތައް މީޑިއާތަކަށް ތިލަވުމުގެ ފުރުސަތު ނުދިނުމުގެ ގޮތުންނާއި، ކޮވިޑްގެ ސަބަބުން ގިނަ މީހުން އެއް ތަނަކަށް އެއްވެ އުޅުން މަނާކޮށްފައިވާތީ އެވެ.
ބޮރިސް ޖޯންސަން ވަނީ މީގެ ކުރިން ވެސް ދެ ކާވެންޏެއް ކުރައްވައިފަ އެވެ. ރޯމަން ކެތަލިކް ފައްޅީގެ އުސޫލުތައް ބުނާ ގޮތުން، ކުރިން ކާވެނިކޮށް ވަރިވެފައިވަ މީހަކަށް އަލުން ކާވެނި ކުރެވޭނީ، ކުރީގެ ކާވެނި ކޮށްފައިވަނީ، ރޯމަން ކެތަލިކް ފައްޅިއެއްގައި ނޫން ކަމަށް ވާނަމަ އެވެ.
އުމުރުން 56 އަހަރުގެ ބޮރިސް ޖޯންސަން އާއި، 32 އަހަރުގެ ކެރީ އެންގޭޖްވެވަޑައިގެން ތިއްބެވިކަން އިއުލާން ކުރެއްވީ މިދިޔަ އަހަރުގެ ކުރީކޮޅުގެ ތެރޭގަ އެވެ. އަދި އޭރު ކެރީ އިންނެވީ ބޮރިސްގެ ދަރިއަކަށް އާލާސްވެ ކަންވެސް އިއުލާން ކުރެއްވި އެވެ. ދެ ބޭފުޅުންގެ އަލަތު ދަރިފުޅު އުފަންވީ، ހުސްވި އަހަރުގެ އެޕްރީލް 29ވަނަ ދުވަހު އެވެ. މިއީ ކެރީގެ އަލަތު ދަރިފުޅަށް ވިޔަސް، ބޮރިސްގެ އިތުރު ފަސް ދަރިން ތިބެ އެވެ.
ބޮރިސް ޖޯންސަން އެންމެ ފަހުން ކާވެނި ބައްލަވައިގެން އުޅުއްވި މަރީނާ ވީލާ، 25 އަހަރުގެ ޒަވާޖީ ހަޔާތަށް ފަހު ވަރިކުރެއްވީ، 2018 ވަނަ އަހަރުގެ ތެރޭގަ އެވެ. މަރީނާއާ ކާވެނި ބައްލަވައިގަތުމުގެ ކުރިން، އަލެގްރާ މޮސްޓީން ކިޔާ ބޭފުޅަކާ ވެސް ކާވެނިބައްލަވައިގަތެވެ.