26 މެއި 2021 - 18:53
އިޒްރޭލު-ފަލަސްތީނުގެ މަސްރަހު ފިނިކުރުމުގެ ގޮތުން، ދެ ފަރާތާ އެކު މަޝްވަރާ ކުރެއްވުމަށް، އިނގިރޭސި ހާރިޖީ ވަޒީރު ޑޮމިނިކް ރާބް، މެދުއިރުމައްޗަށް ރޭ ވަޑައިގެންފި އެވެ.
މީޑިއާ ރިޕޯޓްތައް ބުނާ ގޮތުން ޑޮމިނިކްގެ މި ދަތުރުފުޅުގައި މިއަދުގެ ވަގުތެއްގައި، އިޒްރޭލުގެ ބޮޑުވަޒީރު ބިންޔާމީން ނަތަންޔާހޫއާއި އިޒްރޭލުގެ ދިފާއީ ވަޒީރު ބެރީ ގާންޓްޒްއާ ބައްދަލުކުރައްވާނެ އެވެ. އޭގެ ފަހުން ފަލަސްތީނުގެ ރައީސް މަހްމޫދު އައްބާސް އާއި ފަލަސްތީނުގެ ބޮޑުވަޒީރު މުހައްމަދު އަޝްތޭއާ ވެސް ބައްދަލުކުރައްވައި މަޝްވަރާ ކުރައްވާނެ އެވެ.
މެދުއިރުމައްޗަށް ފުރާވަޑައިގަންނަވަމުން ކުރެއްވި ޓުވީޓެއްގައި، އިނގިރޭސި ހާރިޖީ ވަޒީރު ވިދާޅުވީ އެއް ބަޔަކު އަނެއް ބަޔަކަށް ދޭ ހަމަލާތައް ހުއްޓައިލުމަށް، އިޒްރޭލާއި ހަމާސް ޖަމާއަތުން ނިންމި ނިންމުން، އެ ގޮތުގައި ދެމެހެއްޓޭނެ ގޮތަކާ މެދު، މަޝްވަރާ ކުރައްވާނެ ކަމަށެވެ. އޭގެ އިތުރުން، އަނިޔާވެރިކަން ދޫކޮށް، ސަރަހައްދަށް ދާއިމީ ސުލްހައާއި ކުރިއެރުން ހޯދުމަކީ ވެސް ވަރަށް މުހިންމު ކަމެއް ކަމަށް ވެސް ވިދާޅުވި އެވެ.
އިނގިރޭސި ހާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، މިމަހުގެ ތެރޭގައި ހިނގައި ދިޔަ ކުރިމަތިލުންތަކުން އެނގުނީ، އިޒްރޭލަށާއި ފަލަސްތީނަށް ވެސް މިހާރަށް ވުރެ އީޖާބީ ކުރިމަގެއް ހޯދައިދިނުމަށްޓަކައި، ހަގީގީ ކުރިއެރުންތަކެއް ހޯދަންޖެހިފައިވާ މިންވަރުގެ ބޮޑުކަމެވެ. އަދި ދާއިމީ ސުލްހައެއް ހޯދޭނެ ހަމައެކަނި ގޮތަކީ، ފަލަސްތީނާއި އިޒްރޭލުގެ މިނިވަން ދެ ދައުލަތް ގާއިމުކުރުން ކަމަށްވާތީ، ދެ ދައުލަތް ގާއިމުކުރުމުގެ މަސައްކަތަށް އިނގިރޭސި ވިލާތުން ތާއީދުކޮށް އެހީތެރިވާނެ ކަމަށް ވެސް އެ ބަޔާނުގައިވެ އެވެ.
އިނގިރޭސި ހާރިޖީ ވަޒީރު ފަލަސްތީނާއި އިޒްރޭލުގެ ވެރިންނާ މި ބައްދަލުކުރައްވަނީ، އެމެރިކާގެ ހާރިޖީ ވަޒީރު ބްލެންކިން ވެސް، އިޒްރޭލަށް ވަޑައިގެން އެގައުމުގެ ވެރިންނާ ބައްދަލުކުރައްވާފައި ވަނިކޮށެވެ. ޑޮމިނިކަންގެ މިދަތުރުފުޅަށް ފަހު، ބްލެންކިންއާ ވެސް ބައްދަލުކުރައްވާނެ އެވެ.