24 މެއި 2021 - 20:18
ކޮވިޑް-19 ޖެހިގެން، މިއިން ދުވަހަކު ރާއްޖޭގައި މީހުން މަރުނުވާ ވަރަށް މިއަދު މަރުވެއްޖެ އެވެ. މިރޭގެ އަށެއް ޖެހުމާ ހަމައަށް ބަލީގައި ނުވަ މީހަކު ވަނީ މަރުވެފަ އެވެ.
އެއް ދުވަހާ މިހާ ގިނަ އަދަދަކަށް މީހުން މަރުވުމުން، ރާއްޖޭގައި ކޮވިޑްގެ ހާލަތާއި ނުރައްކާތެރިކަން އަންގައިދެ އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނިގޮތުގައި ހުޅުމާލޭ މެޑިކަލް ފެސިލިޓީގައި ފަރުވާ ދެމުން ދިޔަ 78 އަހަރުގެ އަންހެނަކު، މިއަދު މެންދުރު ފަހު މަރުވި އިރު، 41 އަހަރުގެ މީހަކު މިއަދު އިރުއޮއްސުނު ފަހުން ވަނީ މަރުވެފަ އެވެ.
މި ދެ މީހުންނަކީ ވެސް ހުޅުމާލޭ މެޑިކަލް ފެސިލިޓީގައި ފަރުވާ ދެމުން ދިޔަ ދެ މީހުންނެވެ. މިހާރު ރާއްޖޭގައި ކޮވިޑް ޖެހިގެން މަރުވި މީހުންގެ އަދަދު 138އަށް ވަނީ އަރައިފަ އެވެ.
މީގެ އިތުރުން ދެން މިއަދު މަރުވެފައިވަނީ ވަނީ އައިޖީއެމްއެޗްގެ އިމަޖެންސީ ރޫމުގައި ފަރުވާ ދެމުން ދިޔަ މީހަކާއި ޅ. ހިންނަވަރު ސިއްހީ މަރުކަޒުގައި ފަރުވާ ދެމުން ދިޔަ މީހެއްގެ އިތުރުން ހުޅުމާލެ މެޑިކަލް ފެސިލިޓީގައި ފަރުވާ ދެމުން ދިޔަ ފަސް މީހެކެވެ.
ހަލުވި ކަމާއިއެކު ރާއްޖޭގައި ކޮވިޑް ފެތުރެމުން ދާއިރު، އެ ބަލީގައި މި މަހުގެ މިހާތަނަށް 67 މީހަކު ވަނީ މަރުވެފަ އެވެ.
ކޮވިޑް ކޮންޓްރޯލް ކުރުމަށް މާލޭގައި މިއަދު ވަނީ އިތުރު ހަރުކަށި ފިޔަވަޅުތަކެއް އަޅައިފަ އެވެ. އެގޮތުން މިހާރު އިއުލާންކޮށްފައިވާ ކާފިއުގެ ވަގުތުގެ އިތުރުން ދެން ބޭރަށް ނިކުމެވޭނީ، ކޮންމެ ގެއަކަށް ދޫކޮށްފައިވާ ފާސް ހިފައިގެންނެވެ.