20 މެއި 2021 - 17:59
ކެނދިކުޅުދޫ ދާއިރާގެ މެންބަރު އަހްމަދު އީސާގެ މައްޗަށް ކުރެވޭ ގެވެށި އަނިޔާގެ ތުހުމަތުތަކާ ގުޅިގެން އޭނާގެ މައްޗަށް ޖިނާއި ތަހުގީގުކޮށް ނިމެންދެން އެމްޑީޕީގެ ގައުމީ މަޖިލީހުންނާއި އެތެރޭގެ ކޮމިޓީތަކުގެ މުގައްރިރުކަމުން، އެކަހެރިކުރަން ނިންމާފައިވާ ކަމަށް އެމްޑީޕީން ބުނެފި އެވެ.
އެމްޑީޕީން ބުނީ އީސަގެ މައްޗަށް ގެވެށި އަނިޔާގެ ކުށްތަކެއްގެ ސީރިއަސް ތުހުމަތުތަކެއް ކުރެވިފައިވާތީ، އޭނާގެ މައްޗަށް ތުޙުމަތުކުރެވޭ ކަންކަން ކުށްވެރިކުރާ ކަމަށެވެ. އަދި އެ މައްސަލައިގައި އިންސާފުވެރި ފުރިހަމަ ޖިނާއި ތަހުގީގެއް އަވަހަށް ހިންގުމަށް ވެސް އެޕާޓީން ގޮވާލާފައިވެ އެވެ.
ގެވެށި އަނިޔާ ނުވަތަ އެއްވެސް ބާވަތެއްގެ ލާއިންސާނީ އަނިޔާ އާއި އިންސާނީ ކަރާމަތަށް އުނިކަން އަންނަ ދަށު ދަރަޖައިގެ އަމަލުތަކަކީ އެ ޕާޓީންް ބަލައިގަންނާނެ އަމަލުތަކެއް ނޫން ކަމަށް ވެސް ބުންޏެވެ.
"އަހުމަދު އީސާގެ މައްޗަށް ތުހުމަތުކުރެވޭ މައްސަލާގައި މި ޕާޓީން މިއަދުވަނީ މިޕާޓީގެ ފިޔަވަޅުއަޅާ ކޮމެޓީން ނިންމިގޮތަަށް، އެ މައްސަލައިގެ ޖިނާއީ ތަހްގީގު ނިމެންދެން، މި ޕާޓީގެ ގައުމީ މަޖިލީހުންނާއި، ޕާޓީގެ އެތެރޭގެ ކޮމެޓީތަކުން އޭނާ އެކަހެރިކުރުމަށް ނިންމާފައެވެ،" އެމްޑީޕީން ބުނެފައިވެ އެވެ.
އެމްޑީޕީންް ބުނީ އީސާގެ މައްޗަށް ތުހުމަތުކުރެވޭ މައްސަލައާ ގުޅިގެން، ވަގުތުން އެޅެންހުރި ފިޔަވަޅުތަކާއި ޖިނާއީ ތަހުގީގު ހިނގާ ގޮތް ގާތުން ބެލުމުގެ މަސައްކަތް އެ ޕާޓީގެ މެޖޯރިޓީ އޮންނަ ރައްޔިތުންގެ މަޖިލީހުގެ ކަމާ ގުޅުންހުރި ކޮމެޓީތަކުން މިހާރު ވެސް ފަށާފައިވާ ކަމަށެވެ.
އެ ތުހުމަތާ އެކު އޭނާއަށް އެތައް ފާޑުކިޔުމެއް އަމާޒުވެފައިވާއިރު އިޖުތިމާއީ ކޮމިޓީގެ މުގައްރިރުކަމުން ވެސް އީސަ ވަނީ މިއަދު އިސްތިއުފާ ދެއްވައިފަ އެވެ.
އީސަ އިސްތިއުފާ ދެއްވީ އަނބިކަނބަލުންނަށް އަސްރާ ނަސީމަށް އަނިޔާކުރި މައްސަލަ ޕޮލިހަށް ހުށަހަޅައި ފުލުހުން އޭނާ ހައްޔަރުކުރަން މަސައްކަތް ފެށުމާ އެކު އިޖުތިމާއީ ކޮމިޓީގެ މުގައްރިރުކަމުން ވަކިކުރުމުގެ މަސައްކަތް ވެސް ކުރަނިކޮށެވެ.
މިއަދު މެންދުރު ފަހު ކޮމިޓީން ބޭއްވި ބައްދަލުވުމުގައި ކޯރަމް ހަމަނުވެގެން އީސަ ވަކިކުރެވޭ ގޮތް ނުވެފައިވަނިކޮށް އަމިއްލައަށް އިސްތިއުފާ ދެއްވާ ވިދާޅުވީ، ދައުލަތުގެ ކަމާބެހޭ މުއައްސަސާތަކަށް އެންމެ ފުރިހަމަ ގޮތުގައި އެއްބާރުލުން ދިނުމަށްޓަކައި އިސްތިއުފާ ދެއްވީ ކަމަށެވެ.
ނަމަވެސް ތުހުމަތަށް އިންކާރު ކުރައްވަމުން، އީސަގެ ބަޔާނުގައި ވިދާޅުވީ ރާއްޖޭގެ ގާނޫނުތަކާއި ގަވައިދުތަކާ ހިލާފު އެއްވެސް ކަމެއް ކޮށްފައި ނުވާނެ ކަމަށެވެ.
އެކަމަކު އީސަގެ ފަރާތުން ލިބުނު އަނިޔާތަކަށް އަނބިކަނބަލުން އަސްރާ ނަސީމް ވަނީ ހޮސްޕިޓަލުން ވެސް ފަރުވާ ހޯއްދަވައިފަ އެވެ. އަދި ފުލުހުންނަށް ބަޔާން ވެސް ދީފައިވެ އެވެ.