20 މެއި 2021 - 08:43
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މި މަހުގެ ހަ ވަނަ ދުވަހުގެ ރޭ ގޮއްވާލި އައިއީޑީން، އެ މައްސަލައިގެ ތުހުމަތަށް ހައްޔަރުކޮށްފައިވާ މީހެއްގެ ޑީއެންއޭ ލިބިފައިވާކަން "މިހާރު" އަށް އެނގިއްޖެ އެވެ.
ހަމަލާގެ ތުހުމަތަށް އެންމެ ފުރަތަމަ މާލޭން ހައްޔަރުކުރި ތިން މީހުންގެ އިތުރުން ރޭގެ ވަގުތެއްގައި ބ. ދަރަވަންދޫން ވެސް މީހަކު ވަނީ ހައްޔަރުކޮށްފަ އެވެ. އެ މީހާ އަކީ އައިއީޑީ ހަރުކުރި ސައިކަލް ބެހެއްޓި މީހާ ކަމަށް ފުލުހުން ތުހުމަތުކުރާ މީހާ ކަމަށް ވަނީ އެނގިފަ އެވެ. އަދި ކުރިން މާލޭން ވަނީ ސައިކަލްގެ ވެރިމީހާ ވެސް ހައްޔަރުކޮށްފަ އެވެ.
ހަމަލާއާ ގުޅިގެން ހައްޔަރުކުރި މީހުންގެ ތެރެއިން ފުލުހުން މިހާތަނަށް މައުލޫމާތު ހާމަކޮށްފައިވާ މީހުންނަކީ އަދުހަމް އަހުމަދު ރަޝީދު/ ވ. ތިނަދޫ، ހިޔާ، މުޖާޒް އަހުމަދު/ މއ. ފޭރުގެ އަދި ތަހުމީން އަހުމަދު / ގއ. ކޮނޑޭ، ފޮޅޭމާ އެވެ. މީގެ ތެރެއިން ސައިކަލްގެ ވެރިމީހާ އަކީ ތަހުމީން ކަމަށް ފުލުހުން ވަނީ ބުނެފަ އެވެ. އަދި އައިއީޑީ ގޮއްވާލި ކަމަށް ތުހުމަތުކުރަނީ އަދުހަމަށެވެ.
އެނގިފައިވާ ގޮތުގައި އައިއީޑީން ތަހުމީންގެ ޑީއެންއޭ އެވެ. މި މައުލޫމާތު ފުލުހުން އަދި ހާމައެއް ނުކުރެ އެވެ. ތަހުގީގާ ބެހޭ ފަހުގެ މައުލޫމާތު ދިނުމަށް މިއަދު ހެނދުނު 10:50 ގައި ފުލުހުން ޕްރެސް ކޮންފަރެންސެއް ބާއްވާނެ ކަމަށް ވަނީ ބުނެފަ އެވެ.
ހަމަލާގެ ތުހުމަތަށް ހައްޔަރުކުރި މީހުންނާ ދެކޮޅަށް ފުލުހުން ގިނަ ހެކިތަކެއް ހޯދާފައި ވާއިރު މި ހަމަލާގެ ފަހަތުގައި ތިބި ބަޔަކު ހޯދުމަށް ބޮޑު އިސްކަމެއް ދޭނެ ކަމަށް ފުލުހުން ކުރިން ވަނީ ބުނެފަ އެވެ. ހައްޔަރުކޮށްފައިވާ މީހުންނަކީ ހަރުކަށި ފިކުރަށް ތާއީދުކުރާ މީހުން ކަމަށް ފުލުހުން ބުނެފައި ވާއިރު މައްސަލައިގެ ތަހުގީގު ފެށި ފަހުން ފުލުހުން ހިންގި އޮޕަރޭޝަންތަކުގައި ވަނީ ހަރުކަށި ފިކުރު ފަތުރާ ކަމުގެ ތުހުމަތަށް ބަޔަކު ހައްޔަރުކޮށްފަ އެވެ. ނަމަވެސް މި މީހުންނާ ހަމަލާއާ ގުޅުމެއް އޮތް ކަމަކަށް ފުލުހުން މިހާތަނަށް ހާމަކޮށްފައެއް ނުވެ އެވެ.