18 މެއި 2021 - 23:39
އާއިލީ ޒިންމާ ނެގުމުގެ ގޮތުން ގައުމީ ސްކޮޑުގެ ކޭމުޕުން ވަކިވި އަލީ އަޝްފާގް (ދަގަނޑޭ)ގެ ކޮވިޑްގެ ޓެސްޓް ނެގެޓިވް ކަމަށް ގައުމީ ޓީމުން ބުނެފި އެވެ.
ގައުމީ ޓީމުގެ މެނޭޖަރު، ޔާމީން އިބްރާހިމް "މިހާރަ"ށް ބުނީ ދަގަނޑޭގެ ޓެސްޓް ނެގެޓިވް ވުމުން މާދަމާ އޭނާ އަލުން ގައުމީ ޓީމުގެ ކޭމްޕާ ގުޅޭނެ ކަމަށެވެ.
ގައުމީ ސްކޮޑުން އިއްޔެ އަޝްފާގް ވަކިވީ، އޭނާގެ އަންހެނުން، ފަޒްނާ އިސްމާއީލް ކޮވިޑް-19 އަށް ޕޮޒިޓިވްް ވެގެންނެވެ. އެފްއޭއެމުން އިއްޔެ ބުނެފައި ވަނީ ގައުމީ ޓީމުގެ ކޭމްޕުން އަޝްފާގް ދޫކޮށްލީ އެފްއޭއެމުން އެކަމަށް ހުއްދަ ދިނުމުން ކަމަށެވެ. އަދި އެޗްޕީއޭގެ ގައިޑްލައިނާ އެއްގޮތަށް އޭނާ އަމަލު ކުރަމުންދާ ކަމަށާއި އޭނާ ހުރީ އަންހެނުންނާ ވަކިން، އޭނާގެ މަންމަގެ ގޭގައި ކަމަށެވެ.
ހޮޓެލް ޖެންގައި ގައުމީ ޓީމުގެ ކޭމްޕްކުރީ މިދިޔަ ބުރާސްފަތި ދުވަހު އެވެ. ދަގަނޑޭ ވެސް އެ ދުވަހު ޓީމާއެކު ކޭމްޕަށް ވަނެވެ. ގައުމީ ޓީމުގެ ހުރިހާ ކުޅުންތެރިންނާއި އޮފިޝަލުން ވެސް ކޭމްޕަށް ވަނުމުގެ ކުރިން ޕީސީއާރް ޓެސްޓް ހެދި އެވެ. ކޭމްޕަށް ވަނީ މި ޓެސްޓުން ނެގަޓިވް ނަތީޖާ ލިބުނު ކުޅުންތެރިންނާއި އޮފިޝަލުންނެވެ.
ދަގަނޑޭއަށް އަލުން ސްކޮޑްގައި ބައިވެރި ވެވޭ ގޮތްވުމަކީ ކޯޗް މާޓިން ކޫޕްމަން އަށް ލިބޭނެ އެންމެ ބޮޑު ހިތްހަމަޖެހުމެވެ. ކޮވިޑްގެ އުނދަގޫ ހާލަތުގައިވެސް ދަގަނޑޭ ވަނީ އޭނާގެ ފިޓްނަސް ވަރަށް ރަނގަޅަށް މެއިންޓެއިން ކޮށްފަ އެވެ. އެފްއޭއެމްގެ ރައީސް ބައްސާމް އަދީލް ޖަލީލް، ދަގަނޑޭ ސިފަ ކުރީ މިވަގުތު ސްކޮޑްގައި ހުރި އެންމެ ފިޓް އެއް ކުޅުންތެރިޔާގެ ގޮތުގަ އެވެ.
އެފްއޭއެމުން ކުރިން ހަމަޖައްސާފައި އޮތީ މާދަމާ ގައުމީ ޓީމު ޗައިނާއަށް ފުރާ ގޮތަށެވެ. ވޯލްޑް ކަޕް ކޮލިފިކޭޝަންގައި ރާއްޖެ ހިމެނޭ ގުރޫޕް އޭ ގެ ބާކީ މެޗުތައް އޮންނާނީ އަންނަ މަހު ޗައިނާގަ އެވެ. އެހެންނަމަވެސް މިހާރު މަންޒިލް ބަދަލުކޮށް އަރަބި އެމިރޭޓްސްގައި ކޭމްޕް ކުރުމަށް އެފްއޭއެމުން ވަނީ ނިންމައިފަ އެވެ. އެކަމަކު ޓީމު ފުރާނެ ތާރީހެއް އަދި މިހާތަނަށް ފައިނަލް ކޮށްފައެއް ނުވެ އެވެ.