19 މެއި 2021 - 08:31
ދާދި ފަހުން އިއުލާންކުރި އިންޑިއާގެ މަޝްހޫރު ތެލެގޫ އެކްޓަރު މަހޭޝް ބާބޫގެ އާ ފިލްމުގެ ރޯލެއް ބޮލީވުޑްގެ ބަތަލާ ޝިލްޕާ ޝެޓީ އަށް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.
ޕިންކްވިލާ އިން ބުނި ގޮތުގައި އެ ފިލްމަކީ މި މަހުގެ އެކެއްގައި އިއުލާންކުރި މަހޭޝް އާއި ޑައިރެކްޓަރު ތުރިވިކަރަމްގެ އާ ފިލްމެވެ. ނަން އަދި އިއުލާންނުކުރާ އެ ފިލްމަކީ އެސް ރާދަ ކްރިޝްނާ (ޗިނަބާބޫ) ޕްރޮޑިއުސްކުރާ ފިލްމެކެވެ. ޝޫޓިން ފެށުމުގެ ކުރިން ވާން ޖެހޭ ތައްޔާރީތައް މިހާރު ވަމުން އަންނަ މި ފިލްމަކީ މަހޭޝް އާއި ތުރިވިކްރަމް 11 އަހަރުގެ މެދުކެނޑުމަކަށް ފަހު އެކީގައި މަސައްކަތްކުރާ ފުރަތަމަ ފިލްމެކެވެ. އެ ދެ މީހުން ކުރިން އެކީގައި މަސައްކަތްކުރީ 2010 ގެ "ޚަލޭޖާ" އާއި 2005 ގެ "އަތަޅޫ" ގަ އެވެ.
މަހޭޝް އަކީ ބޮލީވުޑްގެ ކުރީގެ ބަތަލާ ނަމްރަތާ ޝިރޯދުކަރްގެ ފިރިމީހާ އެވެ. ނަމްރަތާ އަކީ ކުރީގެ ބަތަލާ ޝިލްޕާ ޝިރޯދުކަރްގެ ކޮއްކޮ އެވެ.
ޕިންކްވިލާ އިން ބުނީ މަހޭޝްގެ ފިލްމަށް ޝިލްޕާ ގެންނަން މިހާރު ވާހަކަތައް ދެކެވެމުން އަންނަ ކަމަށާއި އެކަން ފައިނަލްވުމުން އިއުލާންކުރާނެ ކަމަށެވެ. މަހޭޝްގެ ފިލްމެއް ޝިލްޕާ އަށް ހުށަހެޅި އިރު، މަހޭޝް ބޮލީވުޑްގެ ފިލްމެއް ކުޅެން އުޅޭ ވާހަކަ އަކީ ވެސް ދޭތެރެ ދޭތެރެއިން މީޑިއާތަކުގައި ދެކެވޭ ވާހަކައެކެވެ.
އެކްޓިންއާ ދުރުގައި ހުންނަތާ 12 ވަރަކަށް އަހަރު ފަހުން ޝިލްޕާ 2019 ގައި ދެ ފިލްމަކަށް ސޮއިކޮށް، މިދިޔަ އަހަރު އެ އެއްޗެހީގެ މަސައްކަތް ނިންމާފައިވެ އެވެ. އެއީ އަދި ރިލީޒްކުރާނެ ތާރީހެއް އިއުލާންނުކުރާ "ނިކައްމާ" އާއި "ހަންގާމާ 2" އެވެ.