15 މެއި 2021 - 11:13
އަރަބި ކަނޑުގައި އުފެދުނު ކޮޅިގަނޑު، ތޫފާނަކަށް ބަދަލުވެ ބާރުގަދަ ވެފައިވާއިރު އެ ތޫފާނުގެ ސަބަބުން ރާއްޖެ އަށް ޖެހެމުންދާ ގަދަ ވަޔާއި ވިއްސާރަ މިރެއިން ފެށިގެން މަޑުވާނެ ކަމަށް މޫސުމާ ބެހޭ ގައުމީ އިދާރާ (މެޓް) އިންް މިއަދު ބުނެފި އެވެ.
އެ އިދާރާ އިން ބުނީ، "ޓައުޓޭ" ގެ ނަން ދީފައިިވާ އެ ތޫފާނުގެ މިސްރާބު މިހާރު ހުރީ ރާއްޖެއާ ދުރަށް ކަމަށެވެ. ރާއްޖޭގެ އެންމެ އުތުރުން ހއ. ތުރާކުނާ، ގާތްގަނޑަކަށް 400 މޭލު ދުރުގައި ތޫފާން މިހާރު އޮތްއިރު ތޫފާނާ ގުޅިގެން ރާއްޖޭގެ ސަރަހައްދަށް ޖެހެމުންދާ ގަދަ ވަޔާއި ވިއްސާރަ ވެސް މިރެއިން ފެށިގެން މަޑުވަމުން ދާނެ ކަމަށް މެޓުން ލަފާކުރެ އެވެ.
ތޫފާނުގެ ސަބަބުން ގަދަ ވަޔާއި ވިއްސާރަ މަޑުވާން ފެށި ނަމަވެސް ހުޅަނގު މޫސުމުގެ ސަބަބުން ކުރިއަށް އޮތް 24 ގަޑިއިރު އެކި ސަރަހައްދުތަކަށް ވިއްސާރަކުރާނެ ކަމަށް ލަފާކުރެވޭ ކަމަށް މެޓުން ބުނެ އެވެ.
އެ ތޫފާން އަރާނެކަމަށް ލަފާކުރެވެނީ އިންޑިއާގެ ހުޅަނގު ސަަރަހައްދަށާއި ޕާކިސްތާނަށެވެ. ސައިންސްވެރިން ލަފާކުރަނީ އެއީ ކައިރި މާޒީއެއްގައި އިންޑިއާއަށާއި ޕާކިސްތާނަށް އަރާފައި ނުވާ ވަރުގެ ބާރުގަދަ ތޫފާނަކަށް ވާނެ ކަަމަށެވެ.
މޫސުން ގޯސްކަމުން، މުޅި ރާއްޖެ އަށް މިދިޔަ ދުވަހު އޮތީ އެކި އެލާޓްތައް ނެރެފަ އެވެ. އެގޮތުން ހއ. އިން ފެށިގެން ރ. އަތޮޅަށް ޔެލޯ އެލާޓް ނެރެފައިވާއިރު ބ. އަތޮޅުން އައްޑޫ އަށް ނެރެފައި ވަނީ ވަައިޓް އެލާޓެވެ.
އެންމެ މޫސުން ގޯސްވާނެ ކަމަށް ލަފާކޮށްފައި އޮތް ހއ. އިން ރ. އަށް ގަަޑިއަކު 55 މޭލަށް ވައިގަދަވެ، ކަނޑުތައް ވެސް ގަދަވާނެ ކަމަށާއި އަދި ރަށްރަށަށް ރާޅު އަޅާނެ ކަމަށް ވެސް މެޓުން ބުންޏެވެ.
އެންމެ އުތުރުގައި އޮތް ހއ. އަތޮޅަށް އިއްޔެ ވެސް ވަރަށް މޫސުން ގޯހެވެ. އެ ސަރަހައްދުގައި ދިރިއުޅޭ މީހުން ބުނާ ގޮތުގައި މިއިން ދުވަހަކު ވައިގަދަ ނުވާ ވަރަށް އިއްޔެ ވައި ބާރުވި އެވެ. ބިރުން މަގުމައްޗަށް ވެސް މީހުން ނުނިކުންނަ ކަމަށް ވެ އެވެ.
އިއްޔެ އެންމެ ބޮޑު ގެއްލުމެއް ލިބުނު އެއް ރަަށަކީ ހއ. ހޯރަފުއްޓެވެ. ރަށު ތެރެއިން ބިން ހިއްކަައިގެން ތަރަައްގީކޮށްފައި އޮތް ހޯރަފުށީ އެއާޕޯޓަށް ވަރަށް ބޮޑަށް ރާޅުއެރުމުގެ ސަބަބުން އެންމެ ފަހުންް ޝެޑިއުލް ދަތުރުތައް ވެސް ވަނީ މެދުކަނޑާލައިފަ އެވެ.
ވައިގަދަވެ، ގޭގޭގެ ފުރާޅު އެއްލާލުމާއި ގަސްތައް ވެއްޓި ގެއްލުން ވުމުގެ އިތުރުން ރަށްރަށަށް ވަރަށް ބޮޑަށް އުދަ އަރައިފައިވެ އެވެ.