14 މެއި 2021 - 23:55
އާންމުކުރި އެމްއެމްޕީއާރުސީގެ ހިޔާނާތުގެ ލިސްޓުގައި މައުސޫމު އެތައް ބައެއްގެ ނަން އެބަ އޮތް ކަމަށާއި އެކަމަކު ހިޔާނާތް ހިންގުމުގެ އެންމެ އަޑީގައި ތިބި މީހުންގެ ނަން ނެތް ކަމަށް އިދިކޮޅު ޕީޕީއެމް/ ޕީއެންސީ ކޯލިޝަނުން މިއަދު ބުނެފި އެވެ.
ހިޔާނާތާ ގުޅުންހުރި ކަމަށް ބުނެ ނެރެފައިވާ ލިސްޓުގައި ކުށެއް ނެތް އެތައް ބަޔަކު ހިމެނޭކަމަށް ބުނެ އެކަން ކުށްވެރިކޮށް އިދިކޮޅުން ނެރުނު ބަޔާނުގައި ބުނީ އެމްއެމްޕީއާރުސީގެ މައްސަލަ، 2015 ވަނަ އަހަރު ރައީސް އަބްދުﷲ ޔާމީންގެ ވެރިކަމުގައި ތަހުގީގުކުރަން ފެށި ކަމަށެވެ. އެގޮތުން މައްސަލައިގެ ތަހުގީގު ފައްޓައި، އެކަމުގައި ޝާމިލުވާ ބައެއް މީހުންގެ ޝަރީއަތް ކުރެވި، ހުކުމްކޮށްފައިވަނިކޮށް އެމްޑީޕީ ވެރިކަމާ ހަވާލުވެ، ހިޔާނާތުގެ އަޑީގައި ތިބި މީހުންނާ އެކު ޑީލް ހަދައި، އަދަބު ލުއިކޮށްދީފައިވާ ކަމަށް ބަޔާނުގައި ބުންޏެވެ. އަދި އެ މައްސަލައިގެ ތުހުމަތުގައި ރެޑް ނޯޓިސް ނެރެފައިވާ މީހުންގެ ނަން ވެސް ލިސްޓުން އުނިކޮށްފައިވާ ކަމަށް ބުނެފައިވެ އެވެ.
ޕީޕީއެމުން ވަނީ ދައުލަތުން ގެއްލުނު ފައިސާ ހޯދަން މި ސަރުކާރުގައި އެކުލަވާލި، އެސެޓް ރިކަވަރީ ކޮމިޝަނަށް ވެސް ވަރަށް ބޮޑަށް ފާޑުކިޔައިފަ އެވެ. އެއީ ރަނގަޅު ނިކަތެއްގައި އުފައްދާފައި އޮތް ތަނެއް ނޫން ކަމަށާއި އެތަނުގައި ހުންނެވި ރައީސް އަކީ ވެސް ކޮރަޕްޝަންގެ އެތައް ތުހުމަތެއް ކުރެވޭ ބޭފުޅެއް ކަމަށް ވެސް ބަޔާނުގައި ބުންޏެވެ.
އެ ބަޔާނުގައި ބުނީ، އެސެޓް ރިކަވަރީ ކޮމިޝަނުން ކުރަމުން އަންނަނީ ސިޔާސީ މަސައްކަތެއް ކަމަށާއި އެ ކޮމިޝަނަށް ދެ އަހަރުވެގެންދިޔައިރު ތައްޔާރުކުރެވުނު ހަމައެކަނި ލިސްޓާ މެދު ސުވާލު އުފެދޭ ކަމަށެވެ. އެގޮތުން، ބަޔަކު ބުނި ބަހަކަށް ނުވަތަ ފޯނެއްގައި ލިޔެފައި ހުރި ވާހަކަތަކެއްގެ މައްޗަށް ބުރަވެ، ކުށެއް ނެތް އެތައް ބައެއްގެ ނަންތައް ހިމަނައި، ލިސްޓެއް ތައްޔާރުކޮށް، އެ މީހުންނާ ސުވާލުކުރުމެއް ނެތި، ލިސްޓް މަޖިލީހާ ހިއްސާކުރުމުން ވެސް އިދިކޮޅުން ވަނީ ލިސްޓު ތައްޔާރުކުރި މަގްސަދާ މެދު ސުވާލު އުފައްދައިފަ އެވެ.
"އެއީ ޒިންމާދާރު މަސައްކަތެއްކުރާ ޕްރޮފެޝަނަލް ބަޔަކު ކުރާނެ ކަމެއް ވެސް ނޫން. އެސެޓް ރިކަވަރީ ކޮމިޝަނުން ތައްޔާރުކޮށްފައިވާ ލިސްޓުގައި 280 ފަރާތަށް ވުރެ ގިނަ ފަރާތެއްގެ ނަންތައް ހިމަނާފައިވާއިރު، އެމްއެމްޕީއާރުސީގެ ހިޔާނާތް ހިންގުމުގެ އެންމެ އަޑީގައި ތިބި ފަރާތްތަކުގެ ނަންތައް އެ ލިސްޓުގައި ނެތްކަން ވެސް ފާހަގަކުރަމެވެ،" އިދިކޮޅުގެ ބަޔާނުގައިވެ އެވެ.
އިދިކޮޅުން ބުނީ މި ހިޔާނާތުގައި ބައިވެރިވި މީހުން އިނގިރޭސިވިލާތުގައި އެބަ ތިބި ކަމަށާއި އެމީހުންނަކީ ސިޔާސީ ގޮތުން ސަރުކާރާ ވާދަވެރި ފަރާތްތަކުގެ އަބުރު ކަތިލަން ބޭނުންކުރާ ހަތިޔާރަކަށް ހަދާފައިވާ ކަމަށެވެ.
އިދިކޮޅުން ވަނީ ޕާޓީތަކުން ހިންގާ ހަރަކާތްތަކާއި އިންތިހާބުތަކަށް އާންމުކޮށް ހަރަދުކުރަނީ ހެޔޮއެދޭ ފަރާތްތަކުންދޭ ފައިސާ އިން ކަމަށާއި އެގޮތަށް އެ ޕާޓީއަށް ވެސް ފައިސާ ލިބޭ ކަމަށް ބުނެފަ އެވެ. އެފަދަ ފައިސާ ޕާޓީއަށް ހަރަދުކޮށްފައިވާނެ ކަމަށާއި އެގޮތުން އޭރު ޕާޓީއަށް ފަންޑު ހޯދުމުގައި އެންމެ އިސްކޮށް އުޅުނީ ޕީޕީއެމްގެ އޭރުގެ ނައިބް ރައީސް އަހުމަދު އަދީބު ކަމަށް ވެސް މި ބަޔާނުގައި ބުނެފައިވެ އެވެ. އަދި އަދީބު ހޯދި ފައިސާގެ ތެރޭގައި ހިޔާނާތުގެ ފައިސާ ހިމެނޭކަން ނޭނގޭ ކަމަށް ވެސް ޕީޕީއެމުގެ ބަޔާނުގައި ބުންޏެވެ.
އެ ބަޔާނުގައި ވަނީ ހިޔާނާތުގެ މައްސަލަ އޭސީސީން ތަހުގީގުކޮށް ނެރެފައިވާ ލިސްޓާއި އެސެޓް ރިކަވަރީ ކޮމިޝަނުން މަޖިލީހަށް ހިއްސާކުރި ލިސްޓާ ތަފާތުތަކެއް ހުރިކަން ވެސް ފާހަގަކޮށްފަ އެވެ. އެގޮތުން އެސެޓް ރިކަވަރީ ކޮމިޝަނުގެ ލިސްޓުގައި ބައެއް ނަންތައް އުނިވެ، އިތުރުވެފައިވާ ގޮތުގައި އޮޅުވާލުންތަކެއް ހުރުމުން ކަންބޮޑުވާ ކަމަށް ވެސް ބުނެފައިވެ އެވެ.
"އެހެންކަމުން، އެހާމެ ޒިންމާދާރުކަން ކުޑަކޮށް މައުސޫމް އެތައް ރައްޔިތެއްގެ އަބުރު ކަތިލުމަށް ސިޔާސީ ލިސްޓެއް ތައްޔާރުކޮށް ރައްޔިތުންގެ މަޖިލީހާއި ހިއްސާ ކުރި ކުރުމުގައި އެސެޓް ރިކަވަރީ ކޮމިޝަނުން ހިންގާފައިވާ ޖަރީމާއާއި، އަދި އެހާމެ ޒިންމާދާރުކަން ކުޑަކޮށް އެތައް ބައެއްގެ ހައްގަށް އަރައިގަނެ އެ ލިސްޓު ރައްޔިތުންގެ މަޖިލީހުން ޢާންމުކުރި ކުރުން އެންމެ ހަރުކަށި އިބާރާތުން ކުށްވެރި ކުރަމެވެ،" ބަޔާނުގައިވެ އެވެ.
އިދިކޮޅުން ވަނީ އެމްއެމްޕީއާރްސީ ހިޔާނާތުގައި ބައިވެރިވެފައިވާ ފަރާތްތައް އިންސާފުގެ ކުރިމައްޗަށް ގެނައުމަށް ޔާމީންްގެ ވެރިކަމުގައި އެމަނިކުފާނު ފެއްޓެވި މަސައްކަތްތައް އެގޮތަށް ކުރިއަށް ގެންދަން އެހެން ގައުމުތަކުގެ އެހީއާއެކު މިނިވަން އިންސާފުވެރި ތަހުގީގެއް ހިންގަން ގޮވާލައިފަ އެވެ. އަދި މައުސޫމު އެތައް ބައެއްގެ ނަން ލިސްޓުގައި ހިމަނާފައިވާތީ އެމީހުންގެ ކިބައިން މައާފަށް އެދުމަށް ވެސް ގޮވާލި އެވެ.
އެމްއެމްޕީއާރްސީގެ ހިޔާނާތުގެ ފައިސާ ލިބުނު މީހުންގެ ލިސްޓުގެ ގޮތުގައި ރައްޔިތުން މަޖިލީހުގެ އިދާރާ އިން ބުދަ ދުވަހު އާންމުކުރި ލިސްޓުގައި އޮތް 281 ނަމުގެ ތެރެއިން 63 ޕަސެންޓަކީ އެ މީހުންނާ ބެހޭ ގޮތުން އަދި މިހާތަނަށް ތަހުގީގު ވެސް ނުފަށާ މީހުން ކަމަށް ލިސްޓުގައިވެ އެވެ.
ލިސްޓު އާންމުކުރި އިރު ތަހުގީގަށް ހާޒިރު ނުކޮށް އަދި މިހާތަނަށް އެއްވެސް ސުވާލެއް ވެސް ނުކޮށް އެތައް ބައެއްގެ ނަން ލިސްޓުގައި ހިމަނާފައި ވާތީ ގިނަ ބަޔަކު ކަންބޮޑުވުން ފާޅުކޮށްފައިވެ އެވެ. އަދި ލިސްޓުގައި ތިބި މީހުންނަށް އާންމުންގެ ފާޑުކިޔުން އަމާޒުވުމާ އެކު ލިސްޓުގައި ނަން އޮތް ކޮންމެ މީހަކީ ކުށްވެރިއެއް ކަމަށް ބަލައިގެން ނުވާނެ ކޮމިޝަނުގެ ރައީސް އަހްމަދު އައްސަދު ވިދާޅުވެ އެވެ.