04 ޖޫން 2016 - 09:23
ދުނިޔޭގައި އުފެދުނު އެންމެ މޮޅު އެއް ބޮކްސިން ތެޅުންތެރިޔާ އަދި 20 ވަނަ ގަރުނުގެ ކުޅިވަރު ޝަހުސިއްޔަތުގެ ގޮތުގައި ގިނަ ބަޔަކު ފާހަގަކުރާ އެމެރިކާގެ މުހައްމަދު އަލީ އުމުރުން 74 އަހަރުގައި، ދާދި ދެންމެއަކު މަރުވެއްޖެ އެވެ.
އުމުރުން 74 އަހަރުގެ މުހައްމަދު އަލީ ބުރާސްފަތި ދުވަހު އެމެރިކާގެ ފީނިކްސްގެ ހޮސްޕިޓަލެއްގައި އެޑްމިޓްކުރީ ނޭވާލާން އުނދަގޫވެގެންނެވެ. އޭނާ އަންނަނީ މީގެ އަހަރުތަކެއް ކުރިން ފެށިގެން ތުރުތުރު އަޅާ ބައްޔަށް ވެސް ފަރުވާ ހޯދަމުންނެވެ. އިއްޔެ އިން ފެށިގެން އަލީގެ ހާލަތު ދަށްވެ އޭނާ އަށް ފަރުވާ ދެމުން އައީ ލައިފް ސަޕޯޓް މެޝިނެއްގެ އެހީގަ އެވެ.
އުމުރުން 12 އަހަރުގައި ބޮކްސިންގެ ތެރެއަށް ވަން އަލީ ދުނިޔެއަށް މަޝްހޫރުވީ 1964 ވަނަ އަހަރު ދުނިޔޭގެ ހެވީވެއިޓް ބޮކްސިން ޗެމްޕިއަންކަން ހޯދުމާ އެކު އެވެ. އޭގެ ފަހުން 1974 އަދި 1978 ވަނަ އަހަރު ވެސް ދުނިޔޭގެ ޗެމްޕިއަންކަން ހޯދި އެވެ. އޭނާ ވަނީ 1960 ވަނަ އަހަރުގެ އޮލިމްޕިކް ގޭމްސްގައި އެމެރިކާ އަށް ރަން މެޑަލް ހޯދައިދީފަ އެވެ.
ގަރުނުގެ ކުޅިވަރުގެ ޝަހުސިއްޔަތުގެ ލަގަބާއި ގަރުނުގެ ކުޅިވަރު ކުޅުންތެރިޔާގެ ލަގަބް ލިބިފައިވާ އަލީ އަކީ ކުޅިވަރު ސްޓޭޑިއަމުން ބޭރުގައި ވެސް ފާހަގަކޮށްލެވޭ ޝަހުސިއްޔަތެކެވެ. އެގޮތުން ދީނީ މިނިވަންކަމާއި ނަސްލީ ތަފާތުކުރުންތަކާ ދެކޮޅަށް މަސައްކަތްކޮށް ގިނަ ބަޔެއްގެ ލޯބި ހޯދި އެވެ. "ދަ ގްރޭޓޭސްޓް" ގެ ނަމުން މަޝްހޫރުވެފައިވާ މުހައްމަދު އަލީ އިސްލާމްވެ އޭނާގެ ނަން ބަދަލުކުރީ 1964 ވަނަ އަހަރެވެ. އޭނާ ވަނީ އަމިއްލަ ހަޔާތާ ބެހޭ ގިނަ ފޮތްތައް ވެސް ލިޔެފަ އެވެ.
ބޮކްސިން ތެޅުން ހުއްޓާލުމުގެ ފަހުން ވެސް މުހައްމަދު އަލީގެ ނަމަށް ފަނޑުވުމެއް ނައީ އޭނާގެ ޝަހުސިއްޔަތު ވަރުގަދަކަމުންނެވެ. "ދަ ގްރޭޓެސްޓް" ގެ ނަމުން މަޝްހޫރުވި ތެޅުންތެރިޔާ 1964 ގައި ހެވީވެއިޓްގެ ޗެމްޕިއަންކަން އެމެރިކާގެ ސޮނީ ލިސްޓަން ބަލިކޮށް ހޯދުމަކީ ކުޑަ ކަމެއް ނޫނެވެ. އޭގެ ފަހުން ތިން ފަހަރެއްގެ މަތިން ހެވީވެއިޓް ޗެމްޕިއަންކަން ދެމެހެއްޓި އެވެ.
އޭނާގެ ކެރިއަރުގައި 61 ތެޅުން ތެޅިއިރު އޭގެ ތެރެއިން 56 ތެޅުން ކާމިޔާބުކުރި އެވެ. ހެވީވެއިޓް ޗެމްޕިއަންކަން 1964 އިން 1967 އަށް، 1974 އިން 1978 އަށް އަދި 1978 އިން 1979 އަށް ގެއްލިގެން ދިޔަ ނުދީ ހިފެހެއްޓި އެވެ.
އަލީއާ ތެޅުމުގެ ކުރިން ލިސްޓަން ބަލިވެފައެއް ނުވެ އެވެ. އަދި 1964 ގެ އެ މެޗަށް ނުކުތުމުގެ ކުރިން ގިނަ ބަޔަކު ހީކުރީ އަލީ ބަލިވާނެ ކަމަށެވެ. އެކަމަކު އުމުރުން އެންމެ 22 އަހަރުގައި އޭނާ ލިސްޓަން ބަލިކޮށް ހެވީވެއިޓް ޗެމްޕިއަންކަން ހޯދި އެވެ.
އެމެރިކާ އިން ކުރިއަށް ގެންދިޔަ ވީޓްނާމް ހަނގުރާމައާ އަލީ ދެކޮޅުހެދި އެވެ. އަދި ސިފައިންގެ ތެރެއަށް ވަންނަން ދެކޮޅުހެދުމުން ހެވީވެއިޓް ޗެމްޕިއަންކަންގެ ލަގަބު އަތުލުމުގެ އިތުރުން ބޮކްސިން ތެޅުން ވެސް އޭނާ އަށް މަނާކުރި އެވެ. އެކަމަކު އެންމެ ފަހުން 1971 ގައި އޭނާ އަށް އަލުން ހުއްދަ ލިބުމުން ރިންގަށް ނުކުމެ ދުނިޔެ އަށް ދެއްކީ މުހައްމަދު އަލީގެ ވަރުގަދަކަން އަދި އޮތީ ކުރިއަށް ކަމެވެ.
މުހައްމަދު އަލީ އަކީ ތެޅުމުގެ ކުރިންނާއި އޭގެ ފަހުން ވެސް ގޮތްދޫނުކުރާ ބަސްތައް ބޭނުންކޮށްގެން ވާހަކަ ދެއްކި މީހެކެވެ. އެވާހަކަތައް އޭރު މުޅި ދުނިޔެ އަށް މަޝްހޫރެވެ. ތިރީގައި އެވަނީ އޭގެ ތެރެއިން ބައެއް ވާހަކަތަކެވެ.
ފެބްރުއަރީ 1964 ގައި އޭރުގެ ހެވީވެއިޓް ބޮކްސިން ޗެމްޕިއަންއާ ތެޅުމުގެ ކުރިން އަލީ ބުންޏެވެ. "ސޮނީ ލިސްޓަން އަކީ ހަމަ އެއްވެސް މީހެއް ނޫން. އޭނާއަކަށް ނޭނގޭނެ ވާހަކަ ދައްކާކަށް. އޭނާއަކަށް ނޭނގޭނެ ތަޅާކަށް. އޭނާ އަށް އެބަ ބޭނުންވޭ ވާހަކަ ދައްކަން ދަސްކޮށްދޭނެ ފިލާވަޅުތަކެއް. އޭނާ އަށް އެބަ ބޭނުންވޭ ބޮސްކިން ތަޅަން ދަސްކޮށްދޭނެ ކްލާސްތަކެއް. އަހަންނާ ތަޅަން އޭނާ އުޅޭ އިރު ބުނެލަން ބޭނުންވަނީ ވެއްޓޭނެ ގޮތްތައް ވެސް ދަސްކޮށްގެން އަންނާށޭ."
ލިސްޓަން ބަލިކުރުމަށް ފަހު އަލީގެ ވާހަކަ އައީ މި ގޮތަށެވެ: "އަހަރެން މުޅި ދުނިޔެ ގުނޑުވާލައިފިން. މުޅި ދުނިޔެ ގުނޑުވާލައިފިން."
އާނީ ޓެރެލްއާ އެކު 1964 ގައި ތެޅި ތެޅުމުގެ ތެރޭގައި މުހައްމަދު އަލީގެ ނަން ކިޔަން އޭނާ ދެކޮޅު ހެދުމުން އަލީ ބުންޏެވެ. "އޭ މޮޔަޔާ، ކޮބާ އަހަރެންގެ ނަމަކީ؟ ކޮބައި އަހަރެންގެ ނަމަކީ؟"
ކެން ނޯޓަންއާ ތަޅައިގެން 1973 ގައި ބަލިވުމާ އެކު އަލީ ބުނެލި އެވެ: "އަހަރެން ހިއެއް ނުކުރަން ބަލިވެދާނެ ކަމަކަށް. ނަމަވެސް އެގޮތަށް އެކަން ވުމުން ދެން ޖެހޭނީ ރަނގަޅު ގޮތުގައި ބަލައިގަންނަން. އެއީ އަހަންނަށް ތާއީދުކުރާ މީހުންނަށް އަހަރެން އަދާކޮށްދޭން ޖެހޭ ވާޖިބެއް. ދިރިއުޅުމުގައި އަހަރެމެން އެންމެން ވެސް ޖެހޭނެ ނާކާމިޔާބީއާ ކުރިމަތިލާން."