13 މެއި 2021 - 17:53
ލަންޑަން (13 މެއި) - އިނގިރޭސި ޕްރިމިއާ ލީގުގެ ޗެމްޕިއަނުންނަށް ދޭ އިނާމު ފައިސާ ކުޑަކުރުމަށް ޕްރިމިއާ ލީގުން ނިންމައިފި އެވެ.
ލީގުގެ ޗެމްޕިއަންކަން މީގެ ކުރިން ސިޓީ ހޯދީ 2019 ގަ އެވެ. އެ ސީޒަންގައި އިނާމު ފައިސާގެ ގޮތުގައި ސިޓީއަށް 150 މިލިއަން ޕައުންޑް ލިބުނެވެ.
އިނާމު ފައިސާގެ އަދަދު ކުޑަ ކުރަން، ޕްރިމިއާ ލީގުން ނިންމީ ކޮވިޑް-19 ގެ ސަބަބުން ލީގުގެ އާމްދަނީ އަށް އަސަރު ކުރުމުންނެވެ. މިދިޔަ އަހަރު ތިން މަސް ދުވަހަށް ޕްރިމިއާ ލީގު މެދުކަނޑާލި ނަމަވެސް، އޭރުގެ ޗެމްޕިިއަން ލިވަޕޫލަށްވެސް ވަނީ 150 މިލިއަން ޕައުންޑް އިނާމު ފައިސާގެ ގޮތުގައި ދީފަ އެވެ.
ކްލަބުތައް ލީގު ތާވަލުގައި އޮންނަ މަގާމަށް ބަލައި ލިބޭ އިނާމު ފައިސާ ބައި ބަޔަށް ބާހައިރު މިފަހަރު އެ އަދަދުތައްވެސް މަދު ވާނެ އެވެ. އެހެންނަމަވެސް ދަނޑަށް ސަޕޯޓަރުން ނުވައްދައި ކުޅެން ޖެހުމުން މުޅި ލީގަށް ވަނީ މާލީ ގޮތުންވެސް ބޮޑެތި ގެއްލުމެއް ކުރިމަތި ވެފަ އެވެ. ޕްރިމިއާ ލީގަކީ ދުނިޔޭގެ އެންމެ ބޮޑު އާމްދަނީއެއް ހޯދާ ފުޓްބޯޅަ ލީގެވެ. ބްރޮޑްކާސްޓިން ފީގެ ގޮތުގައި ދުނިޔޭގެ އެހެން އެއްވެސް ލީގަކުން ނުހޯދާ މިންވަރަށް ޕްރިމިއާ ލީގުން އާމްދަނީ ހޯދަ އެވެ.
މި ސީޒަންގެ ޔޫއެފާ ޗެމްޕިއަންސް ލީގުގެ ފައިނަަލަށް ސިޓީ ދަތުރު ކޮށްފައި ވުމުން އިނާމު ފައިސާ އިތުރު ވާނެ އެވެ. އެ މުބާރާތް ކާމިޔާބު ކޮށްފިނަމަ ލިބޭ ފައިސާ އާއެކު، މި ސީޒަންގެ ޖުމުލަ އިނާމު ފައިސާގެ ގޮތުގައި 200 މިލިއަން ޔޫރޯ ސިޓިއަށް ލިބިގެންދާނެ އެވެ.