08 މެއި 2021 - 19:48
ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގައި ހިމެނޭ އެންމެ މުހިއްމު އެކަކު އަދިވެސް ހައްޔަރުކުރެވިފައި ނުވާ ކަމަށާއި އޭނާ ހޯދަން އާންމުންގެ އެހީ އަށް ފުލުހުން އެދިއްޖެ އެވެ.
އެ ހަމަލާއާ ގުޅިގެން މިހާތަނަށް ދެ މީހަކު ވަނީ ހައްޔަރުކޮށްފަ އެވެ. އެއީ މއ. ފޭރުގެ، މުޖާޒް އަހުމަދު، 21، އާއި ގއ. ހޮނޑޭ، ފޮޅޭމާ، ތަހުމީނު އަހުމަދު، 32، އެކެވެ.
މެންދުރެއްހާއިރު ހައްޔަރުކޮށް، އެ މީހުންގެ ވަނަވަރު އާންމުކޮށްފައި ވަނީ ހަވީރު ބޭއްވި ނޫސްވެރިންގެ ބައްދަލުވުމެއްގަ އެވެ.
އެ ބައްދަލުވުމުގައި ވަނީ ގ. ކެނެރީގެ އިން ނިކުމެ ވަޑައިގެން ސެކިއުޓީންނާއެކު ނަޝީދު، އޭނާގެ ކާރަށް އަރައިވަޑައިގަންނަވަން ދިޔަ ދަނޑިވަޅުގައި އަމާޒުވި ޓެރަރިސްޓް ހަމަލާގެ ވީޑިއޯއެއް ވެސް ދައްކާލައިފަ އެވެ.
އެ ހާދިސާ ހިނގި ސަރަހައްދުން އެންމެ މުހިއްމު ތުހުމަތު ކުރެވޭ ފަރާތް ހޯދުމުގެ މަސައްކަތް ފުލުހުން އަންނަނީ ކުރަމުންނެވެ. އޭނާގެ ފޮޓޯ ވެސް އާންމުކޮށް، އެ މީހާ އަތުލައިގަތުމަށް ފުލުހުން ވަނީ އާންމުންގެ އެހީ އަށް އެދިފަ އެވެ. ފޮޓޯގައި، ފެންނަނީ މާސްކް އަޅައިގެން ފާރެއްގައި ލެނގިލައިގެން ހުރި ފިރިހެނެކެވެ. އޭނާ ހުރީ އެ ހާދިސާ ހިނގި ތަނުގެ ކުރިމަތީ ހުރި ގެސްޓްހައުސެއްގެ ތިރީގަ އެވެ.
ރިޔާޒު ވިދާޅުވި ގޮތުގައި މި ހާދިސާއާ ގުޅޭ އިތުރު ފޫޓޭޖާއި އޭނާ އިތުރު އެހެން ތަންތަނުން ފެންނަ ވީޑިއޯ ވެސް ފުލުހުންގެ އަތުގައި އެބަ ހުއްޓެވެ. އެކަމަކު ހާދިސާ ހިނގީ އެ ސަރަހައްދުގައި ވަރަށް ގިނަ މީހުންް އުޅެމުންދިޔަ ވަގުތެއްގައި ކަމުން ހެކި ރައްކާތެރި ކުރުމުގެ ގޮތުން އިތުރު އެއްޗެހި އާންމު ނުކުރީ އެވެ.
"މީނާއަކީ މިވަގުތު ދިވެހި ފުލުހުން ތަހުގީގަށް ހޯދަމުންދާ އެންމެ މުހިއްމު ފަރާތް މި މައްސަލައާ ގުޅިގެން. މި މައްސަލައާ ގުޅޭ ފޫޓޭޖާއި އަދި މީނާ ހަރަކާތްތެރިވި މަންޒަރު ފެންނަ ބައެއް އެހެން ތަންތަނުގެ ވީޑިއޯ ވެސް އަޅުގަނޑުމެންގެ އަތުގައި އެބަ އޮތް،" އޭނާއާ ގުޅޭ އެއްވެސް މައުލޫމާތެއް ލިބިފައިވާނަމަ ހިއްސާކޮށްދިނުމަށް އެދިވަޑައިގަންނަވަމުންް ރިޔާޒު ވިދާޅުވި އެވެ.
ރިޔާޒު ވިދާޅުވި ގޮތުގައި ދިރިއުޅޭ ގެ ބަލައިފާސްކުރުމަށް ފަހު، މިއަދު ހައްޔަރުކުރި ދެ މީހުންގެ ތެރެއިން މިޖާޒު ލޮކޭޓް ކުރީ ހާދިސާ ހިނގި ތަނުންނެއް ނޫނެވެ. އެހެންނަމަވެސް އޭނާއަކީ އެ ހާދިސާއާ ގުޅުމެއް އޮތް މީހެއް ކަމުގެ ތުހުމަތު ފުލުހުންނަށް ކުރެވޭ ކަމަށް ރިޔާޒު ވިދާޅުވެ އެވެ.
"އަދި މި ވަގުތު އޭނާ ހާދިސާ ގުޅޭ ސަބަބުތައް ތަހުގީގަށް ބަލާފަ ދަންނަވަން ތަންކޮޅެއް ދަތިވާތީވެ، އަޅުގަނޑު ހިއްސާކޮށްލާނީ މީނާއަކީ މި ވަގުތު ތުހުމަތުކުރެވޭ މީހެއްގެ ގޮތުގައި،" ރިޔާޒު ވިދާޅުވި އެވެ.
އައިއީޑީ ހަރުކޮށްފައި ހުރި ސައިކަލުގެ ނަންބަރު ބޯޑު ހުރީ ބަދަލުކޮށްފަ އެވެ. އަދި އޭގެ އިންްޖީނު ނަމްބަރު ފޮރުވުމަށް ކަހަން މަސައްކަތްކޮށްފައި ހުރި ކަމަށް ވެސް ރިޔާޒު ވިދާޅުވި އެވެ. އެކަމަކު ފުލުހުންގެ ފޮރެންސިކުން އެ ސައިކަލުގެ އަސްލު ނަމްބަރު ބޯޑު ދެނެގަނެފައިވާ ކަމަށް ވިދާޅުވި އެވެ.
މިއަދު ހައްޔަރުކުރި ދެ މީހުންގެ ތެރެއިން އެކަކީ ސައިކަލުގެ ވެރި ފަރާތެވެ.
މިހާތަނަށް ތަހުގީގަށް ފާހަގަކުރެވުނު ކަންކަމަށް ބަލައި އެ ދެ މީހުން ހައްޔަރުކުރިއިރު ރިޔާޒު ވިދާޅުވި ގޮތުގައި މި ދެ މީހުންނަކީ ވެސް ތަފާތު ކުށްތަކުގެ ރިކޯޑް އޮތް ބައެކެވެ. އެކަމަކު، އެއީ ކޮން ކަހަލަ ކުށުގެ ރިކޯޑުތަކެއް އޮތް ބައެއްކަން ހިއްސާއެއް ނުކުރައްވަ އެވެ.
މި ހާދިސާއާ ގުޅޭ މައުލޫމާތު ނުވަތަ ފޮޓޯއެއް/ ވީޑިއޯ ހިއްސާކުރަން ބޭނުންވާ މީހުންނަށް u.police.mv/evidence ޕޯޓަލް މެދުވެރިކޮށް އެކަން ކުރެވޭނެ އިންްތިޒާމު ފުލުހުންް ވަނީ ހަމަޖައްސައިފަ އެވެ.