17 ނޮވެމްބަރ 2016 - 15:22
ނިއު ދިއްލީ (ނޮވެމްބަރު 17) - އިންޑިއާގައި ދައުރުވާ ފައިސާގެ ތެރޭން 500 އާއި 1،000 ރުޕީސްގެ ނޫޓުތައް ކުއްލި ގޮތަކަށް ނެގުމުން ފައިސާގެ ދަތިކަން ޓޫރިސްޓުންނަށް ވެސް ވަރަށް ބޮޑަށް ފޯރަން ފަށައިފި އެވެ.
މިދިޔަ އަންގާރަ ދުވަހުގެ ރެއިން ފެށިގެން ފައިސާގެ ބޮޑެތި ނޫޓުތައް ބޭނުންކުރުން މަނާކުރީ ކޮރަޕްޝަނާއި ވަގު ފައިސާގެ މުއާމަލާތްތައް ހުއްޓުވުމަށެވެ. ކުރީގެ ނޫޓުތައް މާރުކުރަން އެތައް ހާސް ބަޔަކު ވަނީ ބޭންކުތަކާއި އޭޓީއެމްތަކުގައި ކިޔޫ ޖެހިފަ އެވެ. ބައެއް މެޝިންތަކުން ފައިސާ ހުސްވެ އަދި ބޭންކުތަކުގައި ވަނީ ހަމަނުޖެހުން ބޮޑުވެފަ އެވެ.
ގޯއާގައި ތިބި ޓޫރިސްޓުން ބުނީ އެ މީހުންގެ އަތުން ފައިސާ ހުސްވެ އަދި އޭޓީއެމްތަކުން ވެސް ފައިސާ ނުލިބޭތީ ވަރަށް އުނދަގޫވާ ކަމަށެވެ. އަދި އެއާޕޯޓްތަކުން ވެސް ފައިސާ ނުލިބޭ ކަމަށް ބައެއް ޓޫރިސްޓުން ވަނީ ބުނެފަ އެވެ.
ފޮރިން އެންޑް ކޮމަންވެލްތު އޮފީހުން ވަނީ އިންޑިއާގައި ތިބި އިނގިރޭސި ވިލާތުގެ ޓޫރިސްޓުން ވެސް ބޭންކުތަކުގައި ދިގު ކިޔޫތަކުގައި ތިބެން ޖެހިދާނެ ކަމަށް ބުނެ އެކަން ސަމާލު ކަމަށް ގެނެސްފަ އެވެ. ނަގުދު ފައިސާގެ ބަދަލުގައި ޑެބިޓް އަދި ކްރެޑިޓް ކާޑު ބޭނުން ކުރެވޭ ތަންތަނުގައި ކާޑު ބޭނުން ކުރުމަށް ވެސް ވަނީ ޓޫރިސްޓުންނަށް ލަފާދީފަ އެވެ.
އޭޓީއެމްތަކުން ކުރިން ދުވާލަކު ކާޑަކަށް 4،000 ރުޕީސް ނެގުނު ނަމަވެސް މިހާރު ވަނީ 2،000 ރުޕީސް އަށް މަދުކޮށްފަ އެވެ.
އިންޑިއާ އިން މިހާރު ވަނީ 500 އާއި 2،000 ރުޕީސްގެ އާ ނޫޓެއް ނެރެފަ އެވެ.