06 މެއި 2021 - 11:31
ގައުމީ ފުޓްބޯޅަ ޓީމުގެ ފިޓްނަސް ކޯޗަކަށް ހޮލެންޑްގެ ގާހާޑް ވާމިންކް ހަމަޖައްސައިފި އެވެ.
ފިޓްނަސް ކޯޗެއްގެ ގޮތުގައި ގައުމީ ޓީމުގައި އޭނާ މަސައްކަތްކުރާނީ ހެޑް ކޯޗް، ހޮލެންޑްގެ މާޓިން ކޫޕްމަންގެ އެސިސްޓެންޓެއްގެ ގޮތުގަ އެވެ.
މިއީ ގައުމީ ޓީމުގައި ބޭރުގެ ފިޓްނަސް ކޯޗެއް މަސައްކަތްކުރާ ތިން ވަނަ ފަހަރެވެ. ކުރީގެ ކޯޗް ކްރޮއޭޝިއާގެ ޕީޓާ ޝެގަޓްގެ ކޯޗް ކަމުގެ ދަށުން މޮންޓަނީގްރޯގެ ފިޓްނަސް ދެ ކޯޗުން ކަމަށްވާ، ވަލްޑަމީރު ކްރުނިޗް އާއި މިރުކޯ ކްރުނިޗް ވަނީ ރާއްޖޭގައި މަސައްކަތް ކޮށްފަ އެވެ.
ފިޓްނަސް ކޯޗް ކަމަށް މިފަހަރު ހަމަޖެއްސި ވާމިންކް، ވަނީ ހޮލެންޑްގެ ތަޖުރިބާކާރު ކޯޗުންނާ އެކު މަސައްކަތް ކޮށްފަ އެވެ. ޑަޗް ލީގުގައި ވާދަކުރަމުން އަންނަ ކްލަބު، ޕެކް ޒްވާލާގައި ވެސް އޭނާ މަސައްކަތް ކުރި އެވެ. އަދި ހޮލެންޑްގެ މަޝްހޫރު ކޯޗުން ކަމަށްވާ މެންޗެސްޓާ ޔުނައިޓެޑްގެ ކުރީގެ ތަރި ޔާޕް ސްޓާމް އަދި ހޮލެންޑްގެ މަޝްހޫރު އެހެން ކޯޗެއް ކަމަށްވާ، ޖޯން ވާންޓް ޝްކިޕްއާ އެކު ވެސް އެސިސްޓެންޓް ކޯޗެއްގެ ގޮތުގައި ވާމިންކް މަސައްކަތްކުރި އެވެ.
އެނގިފައިވާ ގޮތުގައި، ރާއްޖޭގެ ހުށަހެޅުން ވާމިންކް ގަބޫލު ކުރިއިރު، ހޮލެންޑްގެ ފުޓްބޯޅަ ފެޑްރޭޝަން (ކޭއެންވީބީ) އާއި ހޮލެންޑްގެ ފައިނޯޑްއާ އެކު ވެސް އޭނާ ދިޔައީ ވާހަކަ ދައްކަމުންނެވެ. ޔޫތު ފުޓްބޯޅައިގެ ތަޖުރިބާކާރެއްގެ ގޮތުގައިވެސް ފާހަގަވެފައިވާ ވާމިންކް ކޭއެންވީބީ އާއި ފައިނޯޑް އާ އެކު ވާހަކަ ދައްކަމުން ދިޔައީ ޔޫތު ސެޓަޕްގައި މަސައްކަތް ކުރުމަށެވެ. އެހެންނަމަވެސް އެއްބަސް ވުމަކަށް ނާދެވެނީސް ރާއްޖެއިން ހުށަހެޅުން ލިބުމުން އޭނާ ވަނީ ރާއްޖޭގެ ގައުމީ ޓީމުގައި މަސައްކަތްކުރަން އެއްބަސް ވެފަ އެވެ.
ގައުމީ ޓީމުގައި ހެޑް ކޯޗް ކޫޕްމަންގެ ދެ ވަނަ އެސިސްޓެންޓް ކޯޗެއްގެ ގޮތުގައި އެންމެ ފަހުން މަސައްކަތް ކުރީ، ހޮލެންޑްގެ ލެޖެންޑަރީ ކޯޗް ގޫސް ހިޑިންކްގެ ކޮއްކޮ ރެނޭ ހިޑިންކް އެވެ. އެފްއޭއެމުން މިހާރު ވަނީ އޭނާ 23 އަހަރުން ދަށުގެ ގައުމީ ޓީމުގެ ހެޑް ކޯޗް ކަމަށް ހަމަޖައްސައި ޑިވްލަޕްމެންޓްގެ ބޮޑު މަސައްކަތެއް ހަވާލު ކޮށްފަ އެވެ. ރެނޭގެ ބެލުމުގެ ދަަށުން 21 އަހަރާއީ 16 އަހަރާ ދެމެދުގެ އުމުރު ފުރާތަކުގެ ޑިވްލަމްޕެންޓްގެ މަސައްކަތްތައްވެސް ކުރިއަށް ގެންދިއުމަށް ވަނީ ހަމަޖެހިފަ އެވެ.
މިހާރު އެސިސްޓެންޓް ކޯޗުންގެ ގޮތުގައި ކޫޕްމަންއާ އެކު މަސައްކަތް ކުރާނީ ރާއްޖޭގެ ތަޖުރިބާކާރު ކޯޗް އަލީ ސުޒޭން އާއި ވާމިންކް އެވެ.
ކޫޕްމަން އާއި ރެނޭ ހިޑިންކްގެ ކޮންޓްރެކްޓްވެސް އެފްއޭއެމުން ވަނީ ތިން އަހަރަށް އާ ކޮށްފަ އެވެ. ރާއްޖޭގެ ކޯޗް ކަމަށް ކޫޕްމަން ހަމަޖެއްސީ ޖަނަވަރީ 2020 ގަ އެވެ. އޭނާގެ ކޯޗް ކަމުގެ ދަށުން އަދި މެޗެއް ކުޅެން ފުރުސަތެއް ނުލިބެ އެވެ. ކޮވިޑް-19 ގެ ސަބަބުން ގައުމީ ޓީމު މެޗުތައް ފަސް ވަމުން އައިސް އަންނަ މަހަށް މިހާރު ވަނީ ފަސްކޮށްފަ އެވެ.
ވޯލްޑް ކަޕް ކޮލިފިކޭޝަންގައި ރާއްޖެ ހިމެނޭ ގުރޫޕްގެ ބާކީ މެޗުތައް އަންނަ މަހު ކުޅޭނީ ޗައިނާގަ އެވެ. ގުރޫޕް ސްޓޭޖުގައި ރާއްޖެއަށް ބާކީ އޮތް ތިން މެޗުގެ ތެރެއިން ޗައިނާ އާ ދެކޮޅަށް ކުޅޭ މެޗު އޮންނާނީ އަންނަ މަހުގެ ތިން ވަނަ ދުވަހު އެވެ. ސިރިއާ އާ ދެކޮޅަށް ކުޅޭ މެޗު އޮންނާނީ އަންނަ މަހުގެ ހަތް ވަނަ ދުވަހު އެވެ. އަދި ފިލިޕީންސާ ދެކޮޅަށް ކުޅޭ މެޗު އޮންނާނީ އަންނަ މަހުގެ 15 ވަނަ ދުވަހު އެވެ.
މި ގުރޫޕްގެ އެއް ވަނައިގައި ސީރިއާ އޮތީ ކުޅުނު ފަސް މެޗުންވެސް މޮޅުވެ 15 ޕޮއިންޓް ހޯދައިގެންނެވެ. ދެ ވަނައިގައި އޮތް ޗައިނާއިން ހަތަރު މެޗު ކުޅުނު އިރު އެ ޓީމަށް ލިބިފައި ވަނީ ހަތް ޕޮއިންޓެވެ. ތިން ވަނައިގައި އޮތް ފިލިޕީންސަށްވެސް ހަތް ޕޮއިންޓެވެ. ގުއާމް އާ ދެކޮޅަށް ކުޅުނު ދެމެޗުންވެސް މޮޅުވެ ރާއްޖެއަށް ލިބިފައި ވަނީ ހަ ޕޮއިންޓެވެ. ގުއާމަށް ޕޮއިންޓެއް ނުލިބެ އެވެ.